Jesusqa apostolkunamanmi willarqa haykapi chayamunanmanta hinaspa tukupay punchawkunamanta. Chaymantam rikchan-rikchanlla kanankupaqpas huk rikchanachiymanta willakurqa. Chay willakusqanpa imayna cumplikusqantam chayamunan tiempopi kawsakuqkuna qawananku karqa.

Jesusmi nirqa: “Hanaq pacha Diospa munaychakuyninqa rikchakun mecheronkuta aparikuspa novio taripaq chunka sipaskunamanmi. Pichqa sipaskunam karqa mana yuyayniyuq, pichqañataqmi allin yuyayniyuq”, nispa (Mateo 25:1, 2).

Ichaqa manam Diospa munaychakuyninpi kanankupaq kaqkunaqa wakin yuyayniyuq, wakinñataq mana yuyayniyuq kasqankumantachu rimachkarqa, aswanqa rikchan-rikchanlla kanankupaq sapakama tanteakunankumantam rimachkarqa. Chaywanpas Jesusqa manam iskayrayarqachu qatiqninkuna Diosman sunqu kaspa bendecisqa kanankumantaqa.

Jesuspa willakusqanpi chay 10 sipaskunaqa novio taripaq rispankum noviawan novio tupaptin paykunawan kuska kananku karqa. Chaymi novio chayamuptinqa mecheronkuwan ñanta achkinanku karqa, chaynapi novianta novio allichasqa wasiman pusanankama. Ichaqa, ¿chaytachu chay sipaskuna ruwarqaku?

Jesusmi nirqa: “Mana yuyayniyuqkunam mecheronkuta apaspanku ratachinapaq aceitetañataq mana aparqakuchu, allin yuyayniyuqkunam ichaqa aparqaku mecheronkuta hinaspa aysakuchankupi aceitetapas. Novio unamuptinmi, llapallanku puñuywan aysachikuspanku puñururqaku”, nispa (Mateo 25:3-5). Chay sipaskunaqa yaqachusmi noviota unay suyasqankurayku  puñururqaku. Chaywanqa ichapas apostolninkunaqa yuyarirqaku ‘kamachiq kananpaq nombramientonta chaskiq’ runamanta Jesuspa willakusqanta, chay runaqa ‘nombramientonta chaskiramuspanmi kutimurqa’ (Lucas 19:11-15).

Chaymantam Jesusqa novio chayaramuptin chay 10 sipaskuna ima ruwasqankumanta nirqa: “Hinaptinmi chawpi tutata uyarikurqa kayna qayakuy: ‘¡Kaypiñam novioqa kachkan! Tupanaykichikpaqyá lluqsimuychik’”, nispa (Mateo 25:6). Hinaptinqa, ¿imatataq chay sipaskunaqa ruwarqaku?

Jesusmi nirqa: “Hinaptinmi llapallan sipaskuna hatarispanku mecheronkuta alistarqaku. Mana yuyayniyuq sipaskunam allin yuyayniyuqkunata nirqaku: ‘Aceitekichiktayá rakiykullawayku mecheroykum wañuruchkanña’, nispanku. Allin yuyayniyuqkunañataqmi nirqaku: ‘Manapaschá qamkunapaqwanqa haypanmanchu. Rantikuqkunaman rispaykichikyá qamkunapaq rantiramuychik’”, nispa (Mateo 25:7-9).

Chaynaqa, mana yuyayniyuq pichqa sipaskunam novio chayamunanpaqqa mana rikchan-rikchanllachu nitaq aysakuchankupi aceiteyuqchu karqaku, chaymi rantiqraq rirqaku. Jesusmi nirqa: “Chaymi rantiq rinankukama novioqa chayaramurqa, hinaptinmi listo kaq sipaskuna casarakuy convidoman noviowan yaykurqaku, chaymantam punku wichqakururqa. Chaymantañam wakin sipaskunapas hamurqaku, hinaspam nirqaku: ‘¡Señor, señor, kichaykamullawaykuyá!’, nispanku. Payñataqmi nirqa: ‘Chiqaptapunim nikichik: Manam riqsikichikchu’”, nispa (Mateo 25:10-12). Chayna llakikuypaqmi tukurqaku mana rikchan-rikchanlla hinaspa mana yuyayniyuq kasqankurayku.

Jesuspa apostolninkunaqa ñawpaqtapas noviowan Jesus tupachikusqanraykum novioqa pay kasqanta musyarqaku (Lucas 5:34, 35). Ichaqa, ¿pikunawantaq tuparqa yuyayniyuq sipaskunaqa? Diospa munaychakuyninman yaykunankupaq ‘aslla kaq ovejakunamanta’ rimaspanmi Jesusqa ñawpaqtaraq nirqa: “Qamkunaqa pachasqa kaspayá listolla kaychik, mecheroykichikpas ratachisqayá kachun”, nispa (Lucas 12:32, 35). Chaymi apostolkunaqa musyarqaku sipaskunaqa paykuna hina Dios kuyaqkunawan tupasqanta. ¿Imatam Jesusqa chay willakusqanwan yachachiyta munarqa?

Nirqam: “Qawan-qawanllayá kaychik, manam yachankichikchu imay punchaw nitaq imay hora kanantaqa”, nispa (Mateo 25:13).

Chaynaqa, Jesusqa chayamunan tiempopi qatiqninkuna qawan-qawanlla kanankutam munarqa. Pay chayamunanpaqqa yuyayniyuq sipaskuna hinam rikchan-rikchanlla hinaspa listolla kananku karqa, chaynapi imam chaskinankuta chaskinankupaq.