Ha naglabay, ginbaton ni Jesus an pakiana han mga apostol mahitungod han tigaman han iya presensya ngan han ikatarapos hini nga sistema. Ini an iya ginhuhunahuna han naghatag hiya ha ira hin maaramon nga sagdon pinaagi hin dugang nga ilustrasyon. An katumanan hini matin-aw nga makikita han mga nagkikinabuhi durante han iya presensya.

Gintikangan niya an ilustrasyon: “An Ginhadian han langit pariho hin napulo nga birhen nga nagdara han ira mga lampara ngan ginawas pagtapo ha karaslon nga lalaki. An lima ha ira diri-maaramon, ngan an lima maaramon.”—Mateo 25:1, 2.

Diri iginpapasabot ni Jesus nga an katunga han iya mga disipulo nga makakapanunod han Ginhadian han langit diri-maaramon ngan an katunga maaramon. Lugod, iginpapakita niya nga may kalabotan ha Ginhadian, an tagsa han iya mga disipulo makakagpili kon magigin mabinantayon hira o diri. Pero, waray magruhaduha hi Jesus nga an tagsa han iya mga surugoon makakapabilin nga matinumanon ngan makakakarawat han mga bendisyon han iya Amay.

Ha ilustrasyon, an napulo nga birhen ginawas basi tapoon an karaslon nga lalaki ngan umupod ha prosesyon han kasal. Pag-abot han karaslon, lalawagan han mga birhen an dalan pinaagi han ira mga lampara, papasidunggan nira hiya samtang iya gindadara an iya maarasawa ngadto ha igin-andam nga balay. Pero ano an nahitabo?

Hi Jesus nagsaysay: “An mga diri-maaramon nagdara han ira mga lampara kondi waray pagdara hin reserba nga lana, pero an mga maaramon nagdara han ira mga lampara ngan hin reserba nga lana. Han waray pa aabot an karaslon nga lalaki, ginpiraw hira ngan nanhingaturog.” (Mateo 25:3-5) An karaslon nga lalaki waray dayon umabot sugad han ginlalaoman nga pag-abot. Baga hin maiha ito nga kaatrasar, salit nahingaturog an mga birhen. Bangin nahinumdoman han mga apostol an igin-istorya ni Jesus mahitungod han usa nga lalaki nga nagtikang ha hadianon nga pamilya nga nagbiyahe hin hirayo ngan ha urhi ‘binalik katapos makarawat an pagkahadi.’—Lucas 19:11-15.

Ha ilustrasyon mahitungod han napulo nga birhen, iginhulagway ni Jesus an nahitabo pag-abot han karaslon nga lalaki: “Ha katutnga han gab-i may nagsinggit, ‘Aadi na an karaslon nga lalaki! Gawas na kamo pagtapo ha iya.’” (Mateo 25:6) Mationan-o kaandam ngan kamabinantayon an mga birhen?

Hi Jesus nagpadayon: “Binuhát an napulo nga birhen ngan gin-andam an ira mga lampara. An mga diri-maaramon nagsiring ha mga maaramon, ‘Tagi kami han iyo lana kay mapaparong na an amon mga lampara.’ An mga maaramon binaton: ‘Bangin magkulang ini ha aton ngatanan. Kadto lugod kamo ha parabaligya ngan palit kamo han para ha iyo.’”—Mateo 25:7-9.

Salit an lima nga diri-maaramon nga birhen diri mabinantayon ngan diri andam ha pag-abot han karaslon nga lalaki. Diri igo an lana para han ira lampara ngan kinahanglan pa nira mamiling hito. Hi Jesus nagsiring: “Paglakat nira basi pumalit, inabot an karaslon nga lalaki, ngan an mga birhen nga andam na inupod ha iya ngadto ha panagtawo ha kasal, ngan ginsadhan an purtahan. Katapos, inabot an lima nga birhen ngan nagsiring, ‘Ginoo, Ginoo, abrihi kami!’ Binaton hiya, ‘Susumatan ko kamo han kamatuoran, diri ako nakilala ha iyo.’” (Mateo 25:10-12) Makasurubo gud ito nga resulta han diri pagpabilin nga andam ngan nagbabantay!

Nasantop han mga apostol nga an karaslon nga lalaki nga gin-unabi ni Jesus nagrirepresentar ha iya. Diri pa la maiha, iginpariho pa ngani ni Jesus an iya kalugaringon ha karaslon nga lalaki. (Lucas 5:34, 35) Hin-o man liwat an maaramon nga mga birhen? Han gin-unabi ni Jesus an “gutiay nga panon,” nga makakapanunod han Ginhadian, gin-gamit niya an mga pulong nga: “Pag-epron ngan pag-andam kamo, palagaha an iyo mga lampara.” (Lucas 12:32, 35) Salit hini nga ilustrasyon mahitungod han mga birhen, nasabtan han mga apostol nga an gin-uunabi ni Jesus amo an mga sugad ha ira. Kon amo, ano nga mensahe an iginpapahibaro ni Jesus pinaagi hini nga ilustrasyon?

Ginklaro mismo ito ni Jesus. Gintapos niya ini nga ilustrasyon ha pagsiring: “Salit, padayon kamo nga magbantay kay diri kamo maaram han adlaw ngan han oras.”—Mateo 25:13.

Matin-aw nga ginsagdonan ni Jesus an iya matinumanon nga mga sumurunod nga kinahanglan hira ‘padayon nga magbantay’ may kalabotan han iya presensya. Maabot hiya, ngan kinahanglan hira magin andam ngan mabinantayon—pariho han lima nga maaramon nga birhen—basi diri mawara an ira pokus ha presyoso nga paglaom ngan ha premyo nga mahimo nira makarawat.