Jesuseʼ táan u núukik le kʼáatchiʼ tu beetaj u apostoloʼob yoʼolal baʼax señalil kun eʼesik way yaneʼ yéetel taʼaytak u xuʼulul tiʼ le yóokʼol kaabaʼ. Utiaʼal u maas tsoliktiʼob lelaʼ tu yaʼalaj uláakʼ junpʼéel kettʼaan. Lelaʼ unaj beetik tuláakal le máaxoʼob kun kuxtaloʼob tu kʼiiniloʼob way yanoʼ.

Letiʼeʼ tu káajsaj le kettʼaan beyaʼ: «U Reinoil kaʼaneʼ bey jeʼex diez x-chʼúupalaloʼob tu chʼaʼaj u lamparaʼob, ka jóokʼ u chʼaʼob u beel le noviotsiloʼ. Cinco u túulaleʼ minaʼan u naʼatoʼob, yéetel le uláakʼ cincooʼ yaan u naʼatoʼob» (Mateo 25:1, 2).

Teʼelaʼ maʼ táan u yaʼalik Jesús wa chúumuk tiʼ u disipuloʼob kun kʼamik le Reinooʼ yaan u naʼatoʼob yéetel le uláakʼ chúumukoʼ minaʼan u naʼatoʼob. Baʼaxeʼ táan u kaʼansikeʼ u disipuloʼob kun ilik wa yaan u náayal u yóoloʼob wa maʼ. Jesuseʼ maʼ táan u yeʼesik wa maʼatech u creertik wa jeʼel u páajtal u chúukpajal u yóol u disipuloʼob utiaʼal u kʼamkoʼob le utsiloʼob ken u tsʼáa u Taataoʼ.

Teʼ kettʼaanoʼ, tu diezil le x-chʼúupalaloʼob jóokʼoʼob u kʼamoʼob le novio ken kʼuchkoʼ. Le ken kʼuchkeʼ yaan u tʼabik u lamparaʼob utiaʼal u julkoʼob u beel, beyoʼ ku tsʼáaikoʼob nojbeʼenil tiʼ le táan u taal yéetel u noviaoʼ. Baʼaleʼ ¿baʼax úuch ka kʼuch le noviooʼ?

Jesuseʼ ku yaʼalik: «Le minaʼan u naʼatoʼoboʼ tu bisaj u lamparaʼob, baʼaleʼ maʼ tu bisoʼob uláakʼ aceiteiʼ, baʼaleʼ le yaan u naʼatoʼoboʼ tu bisoʼob  nuʼukuloʼob chuup yéetel aceite utiaʼal u lamparaʼob. Tumen maʼ séeb kʼuch le noviotsiloʼ, taakchaj u weenloʼobeʼ, ka túun weenoʼob» (Mateo 25:3-5). Le noviooʼ maʼ séeb kʼuch jeʼex u tuklaʼal kaʼachoʼ. Baʼaxeʼ xáanchaj maʼ tu taal, le oʼolal ween le x-chʼúupalaloʼob páaʼtikoʼ. Maʼ xaaneʼ lelaʼ tu kʼaʼajsaj tiʼ le apostoloʼob u kettʼaanil le «máak síij ichil u familia reyoʼob» bin utiaʼal «u tsʼaʼabal u beet u reyileʼ», tsʼoʼoleʼ ka suunaji (Lucas 19:11-15).

Jesús túuneʼ tu yaʼalaj baʼax úuch le ka kʼuch le novio tu kettʼaanil le diez x-chʼúupalaloʼoboʼ: «Jach chúumuk áakʼabeʼ uʼuyaʼab u kʼaʼam aʼalaʼal: ‹¡Jeʼel ku taal le noviotsiloʼ! Jóokʼeneʼex a kʼameʼex›» (Mateo 25:6). ¿U líiʼsmuba wa le diez x-chʼúupalaloʼob utiaʼal u yeʼeskoʼob maʼ naayal u yóoloʼoboʼ?

Jesuseʼ ku yaʼalik: «Tuláakal túun le x-chʼúupalaloʼoboʼ líikʼoʼobeʼ ka tu listokíintaj u lamparaʼob. Le minaʼan u naʼatoʼoboʼ tu yaʼaloʼob tiʼ le yaan u naʼatoʼoboʼ: ‹Tsʼáaʼextoʼon junpʼíit aceite, tumen k-lamparaʼobeʼ jach taʼaytak u tuʼuploʼob›. Le x-chʼúupalaloʼob yaan u naʼatoʼoboʼ tu yaʼaloʼob: ‹Wa k-tsʼáaikteʼexeʼ maʼ xaaneʼ maʼ kun chúukpajal tiʼ toʼoniʼ. Maas maʼalob ka xiʼikeʼex tu yiknal le máaxoʼob konikoʼ ka a man a tiaʼaleʼexiʼ›» (Mateo 25:7-9).

Bey túunoʼ le cinco x-chʼúupalaloʼob minaʼan u naʼatoʼoboʼ maʼ u líiʼsmubaʼob tubeel le ka kʼuch le noviooʼ. Kʼaʼabéet uláakʼ aceite utiaʼal u lamparaʼob, ka bin u manoʼob. Jesuseʼ ku yaʼalik: «Baʼaleʼ le bijaʼan u manoʼob le aceiteoʼ kʼuch le noviotsiloʼ, le x-chʼúupalaloʼob túun u listokíintmaj u lamparaʼobeʼ ookoʼob tu yéetel tu festejoil le tsʼoʼokol beeloʼ, ka túun kʼaʼal le joonajoʼ. Ka suunaj túun le uláakʼ x-chʼúupalaloʼoboʼ, tu yaʼaloʼob: ‹¡Yuumtsil, Yuumtsil, jeʼekʼabttoʼon le joonajoʼ!›. Letiʼ túuneʼ tu núukaj: ‹U jaajil kin waʼalikteʼexeʼ, maʼ in kʼaj óoleʼexiʼ›» (Mateo 25:10-12). ¿Máasaʼ jach yaj baʼax úuchtiʼob tumen náay u yóoloʼob?

Le apostoloʼoboʼ tu tsʼáajoʼob cuentaeʼ le novio tu yaʼalaj Jesusoʼ letiʼ láayliʼeʼ. Letiʼeʼ tsʼoʼok u yáax ketkuba yéetel juntúul novio (Lucas 5:34, 35). ¿Kux túun le x-chʼúupalaloʼob yaan u naʼatoʼoboʼ? Ka tʼaanaj Jesús tiʼ u «chan múuchʼ taman[oʼob]» kun tsʼaabiltiʼob le Reinooʼ tu yaʼalaj: «Líiʼsabaʼex yéetel tʼabeʼex a lamparaʼex» (Lucas 12:32, 35). Le oʼolal le apostoloʼoboʼ tu naʼatoʼobeʼ, u kettʼaanil le x-chʼúupalaloʼoboʼ láayliʼ tiʼ letiʼob ku tʼaaneʼ. ¿Baʼax túun u kʼáat u kaʼans Jesús yéetel le kettʼaanaʼ?

Jesuseʼ tu tsolaj xan tu tsʼoʼokbal le kettʼaanoʼ. Tu yaʼalaj: «Maʼ a weenleʼex, tumen maʼ a wojleʼex mix u kʼiinil mix u yorailiʼ». Letiʼeʼ yaan u suut, le oʼolal u disipuloʼobeʼ maʼ unaj u náayal u yóoloʼob jeʼex le cinco x-chʼúupalaloʼob yaan u naʼatoʼoboʼ, beyoʼ yaan u kʼamkoʼob le siibal aʼalaʼan u tsʼaʼabaltiʼoboʼ.