Kinde ma Yesu ubino asu ku jukwenda pare ang’wen iwi got Zeituni, emio igi lapor mange. Nindo moko ma nok iwang’e, kinde m’ebino i Yeriko, elar emio lapor mi mola pi ninyutho igi nia Ker fodi utie bor, niwacu fodi ebibino abina. Lembe mi lapor m’emaku kawoni de urombo ku mi lapor m’elar emaku iwang’e. Etie kum dwokowang’ penji ma jukwenda pare gipenjo iwi bedonuti pare man iwi ajiki mi ng’om maeni. Lapor maeno uketho julubne ginyang’ nia gicikiri nitimo tic ma jumio igi kud amora.

Yesu ucaku laporne kumae: “Kum en e calu ka ng’atu acel ubecidho i ng’om mange, elwong’o jumiru pare madhe, emio jupiny pare de igi.” (Matayo 25:14) Calu ma Yesu ular uporere en gire ku ng’atu m’ucidho i wotho ma bor pi “nigamu ker ire gire,” jukwenda pare giromo ninyang’ kamaleng’ nia Yesu re ma tie “ng’atu” ma jubino niweco pire.​—Luka 19:12.

Ma fodi ng’atu ma juweco pire i lapor maeno ucidho ngo i wotho pare ma bor, emio piny pare ma pigi tek ni jurutic pare. Pi oro adek ku nusu ma Yesu utimo ie tic pare, eketho wie kwa ikum tic mi rweyo lembanyong’a mi Ker pa Mungu, man etendo bende julub pare i tije. Calu ma kawoni ebecibedo mbe, etie ku genogen nia gibicopo nitimo tic m’etendogi i ie.​—Matayo 10:7; Luka 10:1, 8, 9; som bende Yohana 4:38; 14:12.

Nimakere ku laporne, ng’atu maeno upoko piny pare nenedi? Yesu uyero kumae: “Ni ng’atu acel emio talanto abic, ni ng’atu mange de ario, ni mange ke acel, kubang’gi nzu ng’atuman calu ma ka kore; e ecidho i wotho pare.” (Matayo 25:15) Jurutic maeno gibitimo ang’o ku piny ma jumio igi? Nyo gibitimo ticne kud amora kara piny ma rwoth migi umio unyai? Yesu uyero ni jukwenda pare kumae:

“Ndhu ndhu nica ng’atu m’ugamu talanto abic ecidho eloko ko talanto abic mange. Ng’atu m’ugamu ario bende kumeca eloko ko ario mange. Ento ng’atu m’ugamu acel re ecidho ekunye i ng’om, ekanu sente pa rwoth pare.” (Matayo 25:16-18) Rwoth bitimo ang’o kan edwogo ku yo woth pare?

Yesu umedere niyero kumae: “Nie ka nindo ton hai rwoth mi jumiru maeno bino, e gikwanu wel gikugi.” (Matayo 25:19) Jurutic ario ma kwong’a ‘gitimo nimakere ku copo migi.’ Jaraticman utimo matek, kud amora, man enyayu gin ma jumio ire. Ng’atu ma jumio ire talanto abic unyayu pare wang’ ario, man ng’atu ma jumio ire talanto ario de kumeno. (Con eca, kara jucul ng’atini ku talanto 1, ukwayu etim tic pi oro 19.) Rwoth uyero lembe marom igi ceke kumae: “Itimo dre, i jatic ma ber mandha de: ibedo mandha i gin ma nyanok, abikethi  iwi gin dupa; mond i mutoro pa rwoth peri.”​—Matayo 25:21.

Jaratic ma jumio ire talanto acel utimo tung’ ku juwagi. Eyero pare kumae: “Rwoth, ang’eyo nia in i ng’atu ma lembe peri tek, ikayu ka ma i coyo i ie ngo, icoko de ka m’imoyo i ie in ungo; e lworo maka, acidho de akanu talanto peri i ng’om: nen, piny peri ni giri.” (Matayo 25:24, 25) Ecidh ekanu de ngo sente i bang’ jukuloka kara enwang’ faida moko ni rwoth pare. Etimo ngo nimakere ku yeny pa rwoth pare.

Pieno, eromo nia rwoth pare ulwong’e ‘jaratic ma rac man janyap.’ Jumayu talanto m’ebino kudo cen man jumie ni jaratic m’utimo tic kud amora. Rwoth udok uyero kumae: “Kum ku ba dhanu ceke ma tek ubedo ko emiere ire, man ebibedo ko lee: ento ng’atu m’ubedo ko ngo, cil maeno m’ebedo ko de jubimayu woko.”​—Matayo 25:26, 29.

Iwi lapor acel maeni kende, julub pa Yesu gibino ku lembe lee m’ukwayu ginyam ie. Gicopo nineno kamaleng’ nia gin ma Yesu ubemio igi, niwacu tic mi ketho dhanu udok julub, pire tie tek lee. Man egeno nia gibibedo kud amora i pong’o rwom m’emio igi. Yesu ung’eyo nia gibitimo ngo tic mi rweyo lembanyong’a m’emio i korgi i ayi marom. Calu ma jular junyutho i lapor, gin ceke gicikiri ‘nitimo nimakere ku copo migi.’ Eno ubenyutho nia Yesu bibedo ngo kud anyong’a ka ng’atu moko bibedo “janyap” man bitimo ngo ku tego pare ceke, tic ma rwoth pare umio i kore.

Jukwenda gicopo bedo kud anyong’a lee mandha, kum ging’eyo nia ‘ku ba dhanu ceke m’ubedo ko, jubimio ire ma sagu.’