Yésus a ngenan Nkôle Beolivier a minlômane mié minyin, nde a kane be nkana. Bone melu ôsusua, valé a nga’ane Jéricho, a nga kane nkana bemin asu na a liti na, éyoñe ba ye telé Éjôé é ngenan ôyap. Nkana a kan éyoñe ji, wo tôbane fe a wu bemin. A ne ngabe jia ya éyalan a ve a lat a nsili ajô ya nsoone wé a asu’ulane ya nta’ane mame wu. Ja ngôné na, beyé’é bé ba yiane bo mban ésaé a ve be.

Yésus a taté a jô’ô na: “Amu a ne aval ane môt a nga ye ke si fe, a nga loene bebo bisaé bé, a ve be akume dé.” (Matthieu 25:14) Mbôle Yésus a tatéya ve’ émien a môt a ke dulu si é ne ôyap “be ve nye ngule ya jôô bôt,” minlômane mi ne ngule ya yemelane tyi’ibi na, Yésus émiene nnye a ne “môt” a jô nye nkana wu.​—Luc 19:12.

Ôsusua na môte ya nkana a ke dulu, a li’i bebo bisaé bé akume dé. E mimbu milal a étun a nga bo ésaé nkañete jé si va, Yésus a nga belan éyoñe jé ése na a kañete mbamba foé ya Éjôé Zambe, a yañele fe beyé’é bé asu na be bo ésaé te. Éyoñe ji a nga ke, a too ndi na ba ye ke ôsu a bo ésaé a nga ye’ele be.​—Matthieu 10:7; Luc 10:1, 8, 9; ve’e a Jean 4:38; 14:12.

Aval avé môte ya nkana wu a kab akume dé? Yésus a kañete na: “A nga ve môte wua betalent betan, nyô mbo’o bebaé, nyô mbo’o wua: a nga ve môt ase abim de ayian ngule jé; ane a nga ke mfa’ a nga ke.” (Matthieu 25:14) Bebo bisaé ba ye bo akume ba te li’i be aya? Ye ba ye fo’o saé a ngul ése asu na masa wob a bi nseñge? Yésus a jô minlômane na:

“Ane môt a nga nyoñe betalent betan a nga ji’a ke kuan abom, a yene betalent befe betan. Nalé fe môt a nga nyoñe betalent bebaé, a nga yene betalent befe bebaé. Ve môt a nga nyoñe wua a nga kôlô a fa’a si a solé moné ésa wé si.” (Matthieu 25:16-18) Jé ja ye kui éyoñe masa a ye so?

Yésus a ke ôsu a jô na: “Ayab éyoñ é lôteya, nde masa bebo bisaé bana a ke so a nga bo be sito’o.” (Matthieu 25:19, Mfefé Nkôñelan) Bebo bisaé bebaé b’ôsu be nga ve ngule jab ése, “amu be ne mbamba bebo ésaé.” Bebo bisaé bete be nga saé a ngule jab ése, a kô’ôlan akume be nga li’i be. Nyô a nga nyoñe betalent betan a nga kô’ôlane be, avale te fe nyô a nga nyoñe betalent bebaé a nga bo. (E melu mvus, mbo ésaé a mbe a yiane saé mimbu 19 asu ya na a bi talent wua.) Masa a se’e môt ase y’été avale da: “Ô boya mvaé, ô ne mbamba mbo ésaé, wo abo mewôk: ô nga ba’ale biôm abui; za’a ke tabe mbamba éto éso wôé a ve wo.”​—Matthieu 25:21.

 Nsela’ane a yené be mbo ésaé a nga nyoñe talent wua. A jô nye na: “A Tat, me nga yeme na, ô ne ayete môt, wo ava bidi vôm ô nga bo te bé, a kôan vôm ô nga bo te mias. Ane me nga ko woñ, a ke solé talent wôé si été: tame yen, ô bili jôm jôé.” (Matthieu 25:24, 25) Mbo ésaé ate a nji jeñe jeñe na a futi moné e bank asu na a bi nseñge asu masa wé. A nga bo fo’o na, masa wé a jañele nseñge a nga yiane bi.

Avale da yiane fo’o nye, masa wé a loone nye na, “éles mbo ésaé.” Be nga nyoñ akum a mbe a bili a ve de mbo ésaé a bili nkômbane ya bo ésaé a ngule jé ésé. Masa a ve abendé dé a jô’ô na: “Môt ase a bili, nnye be aye beta ve, wôna a ye bi abui: ve môt a ne momo, be aye fo’o va nye jôm a bili.”​—Matthieu 25:26, 29.

Beyé’é be Yésus ba yiane tu’a fase jam ete, ja’a é tii a nkana ôte wuwua. Ba yiane yeme na, ésaé Yésus a li’i be (beta mvome ya bo bôte beyé’é) é ne akum é ne dia. A yi na be bo ésaé éte a ngule jab ése. Yésus a nji simesane na bese ba ye bo ésaé nkañete a nga li’i be na be bo, avale da. Avale nkana wo liti, môt ase a ye bo abim a ne ngule ya bo “abime ngule jé é ne.” Nalé a nji tinane na, Yésus a ye wô’ô mvaé nge môt a ne ‘nleles’ a bo te ve ngule jé ése na a kô’ôlan akume Masa wé.

Minlômane mia yiane wô’ô angôndô ya mvaé amu ndi nlem nyu: “Môt ase a bili, nnye be aye beta ve”!