Ngke bon raona naba ana abotoro ake aman i aon te Maunga ae Oriweta, ao e a taekina Iesu te kaikonaki riki teuana nakoia. Tabebong n nako ngke e mena i Ieriko, ao e taekina te kaikonaki ae taekan te mina ni kaotia iai bwa e na rangi ni maan te tai imwain rokon te Tautaeka n Uea. Iai baika bati aika titeboo iai ma te kaikonaki ae e a taekinna ngkai. Bon iteran ana kaeka nakon te titiraki ibukin okina ma tikuna ao tain tokin te waaki ae ngkai i aon te aba. E kateretereaki iai bwa a riai taan rimwina n taningamarau nakoni baike e mwiokoiia iai.

E moanna Iesu ni kangai: “Te Tautaeka n Uea kaanga ai aron naba te aomata ae nangi mwananga nakon te aba teuana, ae weteiia ana toro, ao e mwiokoiia n ana bwai.” (Mataio 25:14) A kai ataia abotoro ae “te aomata” are e taekinaki ngkai bon Iesu, ibukina bwa e a kamani kabotaua Iesu ma te aomata are mwananga nakon te aba teuana “bwa e na karekea mwaakana n uea iai.”​—Ruka 19:12.

Imwaini mwanangan te aomata are n te kaikonaki nakon te aba teuana, ao e mwiokoi ana bwai nakoia ana toro. N ana tai ni mwakuri ni minita Iesu i nanon tenua ao te iterana te ririki, ao e kaatuua tataekinan te rongorongo ae raoiroi ae taekan te Tautaeka n Uea ao ni kataneiaia taan rimwina bwa a na karaoa te mwakuri aei. E nangi nako ngkai, ao e aki nanokokoraki bwa a na bon reitaanako karaoan te baere e kataneiaia iai.​—Mataio 10:7; Ruka 10:1, 8, 9; kabotaua ma Ioane 4:38; 14:12.

E kangaa n tibwatibwai ana bwai te aomata are n te kaikonaki? E taku Iesu: “E angan temanna nimaua te tarena, temanna uoua, ao temanna teuana, n ai aron nako aia konabwai, ao e nako n te aba teuana.” (Mataio 25:15) Tera ae a na karaoia tooro aikai ma baike a mwiokoaki iai? A na taningamarau ni kabonganai ni karikirakea iai ana bwai aia toka? E taku Iesu nakoia abotoro:

“N te tai naba arei ao e taonnako teuare anganaki nimaua te tarena, ao e karikirakea ao e karakaa nimaua riki. N aron naba anne, e karakaa uoua riki, teuare anganaki uoua. Ma teuare anganaki tii teuana, e nako ao e kena aontano ao e karabaa iai ana mwane ana toka.” (Mataio 25:16-​18) Tera ae e na riki ngkana e a oki te toka?

E reitia Iesu ni kangai: “Imwin te tai ae rangi ni maan ao e a roko aia toka tooro akanne, ao e kaeta ana mwane ma ngaiia.” (Mataio 25:19) A karaoa aia kabanea ni konaa teuare te moan ao te kauoman “n ai aron nako aia konabwai.” A taningamarau tooro aikai ma ni mwakuri korakora, ao a karakai mwaitini baike a mwiokoaki iai. Teuare anganaki nimaua te tarena e karakaa ni kataboroa mwaitina, ao ai aron naba teuare anganaki uoua te tarena. (N taai akekei ao e riai te tia mwakuri ni mwakuri 19 te ririki bwa e na karekea te boo ae boraoi ma teuana te tarena.) E kamoamoaia te toka n taeka aikai: “E tamaroa am mwakuri, te toro ngkoe ae ko raoiroi ma ni kakaonimaki! Ko kakaonimaki ni kaineti ma au bwai tabeua, mangaia ae N na mwiokoiko i aoni baika bati riki. Ko na uaia ni kimwareirei ma am toka.”​—Mataio 25:21.

Ma tiaki aei aron te toro are e anganaki teuana te tarena. E taku: “Te toka, I ataia bwa bon te aomata ngkoe ae ko tuamatoa, ae ko rikoi uaa n taabo ake ko aki ununiki iai, ao ko ikoikotii koraa n taabo ake ko aki kamaenakoi iai mani kunia. Mangaia are I maaku ao I nako ni karabaa am tarena i aantano. Ao aei am bwai.” (Mataio 25:24, 25) E aki naba karina te mwane n te bangke n te aro ae e na reke rakana teutana ibukin ana toka. E bon aki karikirakei ana bwai ana toka.

E bon tau n aranna te toka bwa ‘te toro ae buakaka ma n taningaroti.’ E anaaki are irouna ao n anganaki te toro are kukurei ni mwakuri korakora. E kaota te kaetieti ae kakawaki irouna te toka ni kangai: “Bwa ane iai irouna ao e na anganaki riki, ao e na bati ana bwai. Ma ane akea irouna ao e na anaaki are irouna.”​—Mataio 25:26, 29.

A bati baika a riai n iaiangoi taan rimwin Iesu, ae irekereke naba ma te kaikonaki ae teuana aei. A ataia bwa e rangi ni kakawaki te bwai ae e mwiokoiia iai Iesu, ae te tibwanga ae tamaroa ae karekeaia taan rimwina. Ao e kantaningaiia bwa a na taningamarau nakon te tibwanga aei. E aki kantaningaia Iesu bwa a riai ni bane ni karaoa ae titeboo n te mwakuri n uarongorongo are e tua bwa a na karaoia. A riai ni karaoa aia kabanea ni konaa n “ai aron nako aia konabwai” n aron ae e kaotaki n te kaikonaki. E aki nanonaki n aei bwa e na kukurei Iesu ngkana temanna e “taningaroti” ao n aki karaoa ana kabanea ni konaa ni karikirakei ana bwai te Toka.

Ai kukureira abotoro n te taeka ni karaunano aei: “Bwa ane iai irouna ao e na anganaki riki”!