Beberapa hari sebedau nya lebuh Jesus ba Jeriko, iya madahka jaku sempama pasal duit mina kena nunjukka Perintah Petara deka datai ba jemah ila. Diatu, Jesus enggau empat iku rasul iya agi ba Bukit Kana. Lalu iya madahka siti da agi jaku sempama ke nyauka sama enggau sempama duit mina. Tu sebagi ari saut Jesus ngagai tanya sida pasal tanda ti nunjukka kemaya Jesus pulai baru, sereta pasal pengujung dunya. Jesus ngena jaku sempama tu kena nekanka, amat penting bala murid iya bagas ngereja pengawa ke diberi ngagai sida.

Jesus madahka: “Perintah serega mega baka siku lelaki, ke baru deka bejalai ngagai menua bukai. Iya ngangauka bala ulun iya, lalu ngasuh sida ngemataka reta tengkira iya.” (Matthew 25:14) Dalam jaku sempama pasal duit mina, Jesus nyemaka diri baka siku lelaki ke ngagai endur ti jauh laban “iya deka nyadi raja.” Nya alai, bala rasul nemu Jesus nya “lelaki” dalam sempama nya.—Luke 19:12.

Sebedau lelaki nya bejalai ngagai menua bukai, iya ngasuh bala ulun iya ngemataka reta tengkira iya. Pengelama tiga setengah taun, Jesus bebendar nginjil ba dunya sereta nusui Berita Manah pasal Perintah Petara. Iya mega ngelatih bala murid iya ngereja pengawa ti sama. Enda lama da agi, Jesus deka ninggalka bala murid iya, lalu iya andal sida deka terus ngereja pengawa tu.—Matthew 10:7; Luke 10:1, 8, 9; banding John 4:38; 14:12.

Dalam sempama nya, baka ni lelaki nya bagi reta iya ngagai bala ulun? Ku Jesus madah: “Siku diberi iya lima beg duit pirak, siku da agi diberi iya dua beg duit pirak, lalu siku ke bukai diberi iya sebeg duit pirak, nitihka pengelandik sida siku-siku. Udah nya, iya mupuk ngagai menua bukai.” (Matthew 25:15) Pengudah bulih reta nya, nama deka digaga bala ulun nya? Kati sida deka bagas gawa nambahka reta ke tuan sida?

Jesus madah ngagai bala rasul iya: “Ulun ke nerima lima beg duit pirak, lalu tekala nya bedagang ngena duit nya. Iya bulih untung lima beg agi duit pirak. Pia mega, ulun ke nerima dua beg duit pirak, bulih untung dua beg agi duit pirak. Tang ulun ke nerima sebeg duit pirak, numbak lubang tanah lalu ngelalaika duit pirak tuan iya ba dalam lubang nya.” (Matthew 25:16-18) Nama deka nyadi lebuh tuan sida pulai baru?

Jesus madah: “Nyau kelama, tuan bala ulun nya pulai. Iya meresa nama ke udah digaga sida enggau duit iya.” (Matthew 25:19) Dua iku ulun ti keterubah bebendar gawa “nitihka pengelandik sida siku-siku.” Ketegal seduai nya amat bagas gawa, ulun ke nerima lima beg duit pirak enggau ulun ke nerima dua beg duit pirak bulih untung dua kali lipat. (Ba jeman nya, sebeg  duit pirak sama penyampau enggau gaji siku orang ke gawa kira-kira 20 taun.) Nyadi tuan nya sama muji dua iku ulun nya: “Manah nya! Nuan meh ulun ke manah sereta tetap ati. Nuan tau dikearapka ngemataka utai ti mimit. Nya alai, aku deka milih nuan ngemataka mayuh agi utai. Aram sama gaga ati enggau tuan nuan.”—Matthew 25:21.

Tang, nama nyadi ngagai ulun ke nerima sebeg duit pirak? Ku ulun nya: “Tuan, aku nemu nuan endang orang ke terit. Nuan ngetau taja pan nuan enda nanam, lalu nuan ngumpul gandum ke udah ditampi orang. Nya alai, aku takut lalu ngelalaika duit pirak nuan dalam tanah. Nah, tu duit nuan.” (Matthew 25:24, 25) Ulun nya indah enda nyimpan duit pirak dalam bank ngambika bulih bungai ari duit nya. Ketegal nya, iya ngasuh tuan iya rugi.

Nya alai, tuan nya madah iya “ulun ke jai sereta ngelusu!” Nyadi, tuan nya ngambi duit pirak ari ulun nya lalu meri ngagai ulun ke bagas. Ku tuan nya madah: “Genap iku orang ke bisi utai, deka diberi mayuh agi, ngambika iya bisi mayuh utai, lebih ari ke chukup. Tang orang ke nadai utai, indah utai ti dikemisi iya deh, deka diambi ari iya.”—Matthew 25:26, 29.

Bala murid Jesus ulih berunding enggau dalam pasal jaku sempama tu. Sida nemu Jesus meri pengawa ti berega ngagai sida, iya nya ngaga orang nyadi murid iya. Tu siti basa ti besai ba sida lalu Jesus deka sida bagas gawa. Tang iya enda arapka asil ti sama ba tiap iku murid iya. Baka ba sempama nya, sida patut kereja enggau naka ulih “nitihka pengelandik sida siku-siku.” Taja pia, Jesus enda lantang ati enti sida “ngelusu” sereta enda bebendar gawa.

Bala rasul tentu berasai gaga ati ninga jaku peransang ke disebut Jesus: “Genap iku orang ke bisi utai, deka diberi mayuh agi”!