O me Kĩĩmanĩ kya Mĩthata, Yesũ nĩwatavisye atũmwa make ana ngelekany’o ĩngĩ. Mĩthenya kauta mĩvĩtu e Yeliko, aĩ anaelesya ngelekany’o ĩũlũ wa mina nĩ kana onany’e kana Ũsumbĩ ndwaĩ wũke mĩtũkĩ. Ngelekany’o ĩla Yesũ wanenganie ĩtina wa vau yĩ na maũndũ amwe mavw’anene na maũndũ ala me ngelekany’onĩ ĩsu ya mina. Anenganie ngelekany’o ĩsu nĩ kana asũngĩe ĩkũlyo wakũlilw’e ĩũlũ wa kwĩthĩwa vo kwake, na ĩũlũ wa mũminũkĩlyo wa ĩvinda yĩĩ. Ngelekany’o ĩsu ĩkindĩlĩĩle kana no nginya amanyĩw’a make methĩwe na kĩthito maitandĩthya kĩla wĩmanenga.

Yesũ ambĩĩie na kwasya atĩĩ: “Ũsumbĩ wa ĩtu ũilye ta mũndũ waĩ vakuvĩ kũthi nthĩ ĩngĩ na eeta ngombo syake na aitiĩa syĩndũ ila waĩ nasyo.” (Mathayo 25:14) Na nũndũ Yesũ aĩ aneeyĩelekany’a na mũndũ waendie nthĩ ĩngĩ “nĩ kana akanengwe ũsumbĩ,” atũmwa make maĩ matonya kũelewa o laisi kana Yesũ nĩwe “mũndũ” ũsu wawetaa.—Luka 19:12.

Mũndũ ũla ũwetetwe ngelekany’onĩ ĩsu nĩwanengie ngombo syake syĩndũ sya vata mũno atanamba kũthi nthĩ ĩngĩ. Ĩvindanĩ ya ĩla myaka ĩtatũ na nusu ya ũthũkũmi wake kũũ nthĩ, Yesũ nĩwatavanasya mũno ũvoo mũseo wa Ũsumbĩ wa Ngai, na nĩwamanyĩisye amanyĩw’a make wĩa ũsu. Ĩvinda yake ya kuma kũũ nthĩ yavika, Yesũ aĩ na mũĩkĩĩo kana amanyĩw’a asu nĩmekũendeea kũtethya wĩa ũsu wamamanyĩĩtye.—Mathayo 10:7; Luka 10:1, 8, 9; sianĩsya na Yoana 4:38; 14:12.

Nthĩnĩ wa ngelekany’o ĩsu, mũndũ ũla ũwetetwe aaie syĩndũ syake ata? Yesũ aisye: “Na anenga ngombo ĩmwe talendi itano, ĩngĩ amĩnenga ilĩ, na ĩngĩ amĩnenga ĩmwe, na kĩla ĩmwe amĩnengae kwosana na ũtonyi wayo, na athi nthĩ ĩngĩ.” (Mathayo 25:15) Ngombo isu syaaĩle kwĩka ata na kĩla syanengiwe? Syo nĩsyeethĩiwe na kĩthito kya kwĩka kĩla vwana wasyo wendaa syĩke na talendi isu? Yesũ ameie atũmwa make atĩĩ:

“Na o mĩtũkĩ, ngombo ĩla yanengiwe talendi itano yathi yakũna viasala nasyo na yakwata ingĩ itano. O ta ũu, nayo ĩla yanengiwe ilĩ yakwata ingĩ ilĩ. Ĩndĩ ngombo ĩla yanengiwe ĩmwe yathi yenza ĩima, na yavitha mbesa sya vwana wayo.” (Mathayo 25:16-18) Vesaa kwĩthĩwa ata vwana wa ngombo isu asyoka?

Yesũ aendeeie kũmea atĩĩ: “Ĩtina wa ĩvinda yĩasa vwana wa ngombo isu [nĩwookie] na eeka ĩsavu vamwe nasyo.” (Mathayo 25:19) Ila ngombo ilĩ sya mbee nĩsyatatie ũndũ itonya, “kĩla ĩmwe . . . kwosana na ũtonyi wayo.”  Ngombo isu syĩ ilĩ syaĩ na kĩthito mũno na nĩsyakũnie viasala na kĩla syanengiwe. Ngombo ĩla yanengiwe talendi itano nĩyakwatie ingĩ itano, nayo ĩla yanengiwe talendi ilĩ yakwata ingĩ ilĩ. (Ĩvinda yĩu yaĩ no nginya mũthũkũmi atethye wĩa kwa myaka ta 19 nĩ kana ethĩwe atonya kũkwata mbesa sianene na talendi ĩmwe.) Vwana wasyo nĩwakathie ngombo isu syelĩ. Eeie kĩla ĩmwe atĩĩ: “Nĩwĩkĩte nesa, ngombo nzeo na ndĩkĩĩku! Ũnaĩ mũĩkĩĩku syĩndũnĩ nini. Nĩngũũtw’ĩkĩthya mũnene wa syĩndũ mbingĩ. Lika ũtanunĩ wa vwana waku.”—Mathayo 25:21.

Ĩndĩ maũndũ maĩ kĩvathũkany’o kwa ngombo ĩla yanengiwe talendi ĩmwe. Ngombo ĩsu yaisye: “Vwana, nĩneesĩ wĩ mũndũ mwetu, ũkethaa vala ũtaavanda na ũmbanasya vala ũtaaũlũkĩlya. Na nũndũ wa ũu, nakĩa na nathi nenzĩa talendi yaku mũthanganĩ. Kwata ĩ kyaku.” (Mathayo 25:24, 25) O na ndyaaia mbesa isu vengi nĩ kana yĩthĩwe ĩtonya kũkwata ũsyao mũna kwondũ wa vwana wayo. Kwoou, no twasye ngombo ĩsu ndyaaĩka kĩla vwana wayo wendaa yĩke.

Vwana wa ngombo ĩsu nĩwamĩnengie ĩsyĩtwa yaĩle. Amĩtie “ngombo nthũku na ndulu.” Kĩla yaĩ nakyo nĩkyoosiwe na kyanengwa ngombo ĩla yeeyũmbanĩtye kũthũkũma na kĩthito. Vwana ũsu aisye: “Kĩla mũndũ wĩ na kĩndũ akongeleelwa, na ayĩthĩwa na mbingĩ. Ĩndĩ ũla ũte na kĩndũ, o na kĩla wĩ nakyo akavenwa.”—Mathayo 25:26, 29.

O na kau amanyĩw’a ma Yesũ maĩ na maũndũ maingĩ ma kũsũanĩa, vaĩ maũndũ angĩ maingĩ maaĩle kũsũanĩa ĩũlũ wa ngelekany’o ĩsu. Nĩmoonie kana Yesũ nĩwamanenga kĩanda kya vata mũno, nakyo nĩ kĩanda kya mwanya kya kũtw’ĩkĩthya andũ amanyĩw’a. Na nĩwendaa methĩwe na kĩthito wĩanĩ ũsu. Mayaaĩlĩte kũsũanĩa kana no nginya onthe methĩwe na ũtonyi wĩanene wĩanĩ ũsu wa kũtavany’a wamanengie. O tondũ ngelekany’o ĩsu yonanĩtye, kĩla ũmwe woo aaĩlĩte kwĩka kyonthe kĩla ũtonya “kwosana na ũtonyi” wake. Ĩndĩ ũu ti kwonany’a kana Yesũ aĩ atane ethĩwa mũndũ nĩ ‘mũtulu’ na ndekwĩka kĩla ũtonya nĩ kana syĩndũ sya Vwana wake syongeleke.

No nginya atũmwa methĩwe matanie mũno meew’a ndeto ii: “Kĩla mũndũ wĩ na kĩndũ akongeleelwa”!