Ekolo kena vana mongo ye alongoki andi, Yesu otele diaka kingana kiankaka. Mu lumbu yavioka, vava Yesu kakala muna Yeriko wata e kingana kia mina muna songa vo mambu ma Kintinu kuna sentu melunganena. E kingana katele owau kifwananene ye kingana kia mina mu mambu mayingi. Kingana kiaki ngwizani kina ye mvutu za yuvu mu kuma kia ngiz’a Yesu ye mbaninu a tandu kiaki. Kisongele vo alongoki bafwete toma lunga-lunga ina bavewa.

Yesu ovovele vo: “E Kintinu kina nze muntu okwenda mu nkangalu. Una se kekwenda, obokele ntaudi zandi yo kubayekeka ovua kwandi.” (Matai 25:14) Wau vo Yesu ukitezanese kala yo muntu wele ku nsi yandá “kimana kayadikwa kintinu,” alongoki babakwidi vo Yesu yandi kibeni i “muntu” ndioyo kayikidi.—Luka 19:12.

Muna kingana kiaki, vitila o muntu kenda ku nsi yandá, ovene o vua kwa ntaudi zandi. Mu mvu ntatu ye ndambu ova ntoto, Yesu ukivene emvimba mu salu kia samuna e nsangu zambote za Kintinu kia Nzambi, olongele mpe alongoki andi basala e salu kiaki. Owau o Yesu se kekwenda kwandi, una ye vuvu vo alongoki andi besala e salu kabalongele.—Matai 10:7; Luka 10:1, 8, 9; tezanesa ye Yoane 4:38; 14:12.

Muna kingana kia Yesu, aweyi o muntu kakayanesene mavua mandi? Yesu ovovele vo: “Omosi umvene talanta zitanu, wankaka zizole ye wankaka imosi, ovene kwa konso muntu mun’owu wa ngolo zandi, i bosi wele kwandi.” (Matai 25:15) Adieyi e ntaudi bevanga muna mavua baveno? Nga betoma mo sadila muna nungununa e salu kia mfumu au? Yesu osasidi dio kwa alongoki, ovovele vo:

“Ndiona watambula talanta zitanu, vana vau wele zo kitila, obakidi nluta mia talanta zitanu. Diau dimosi mpe kavanga ona watambula zizole, obakidi nluta mia talanta zizole. Kansi, ndiona watambula imosi, wele, otimini e wulu, ozikidi nzimbu za mfumu andi.” (Matai 25:16-18) Nkia diambu divangama vava o mfumu kevutuka?

Yesu ovovele vo: “Una kiavioka kolo kiayingi, o mfumu a ntaudi zazi wizidi, otele yau e mbalu.” (Matai 25:19) Ona wantete yo wanzole bavangidi dina balendele, “mun’owu wa ndendelo zau.” Yau awole basala ye fululu yo lungisa e mbebe au una ufwene. Ona watambula talanta tanu, obakidi nluta mia talanta tanu, ona watambula talanta zole, obakidi mpe nluta mia talanta zole. (Muna lumbu yayina, diavavanga vo muntu kasala mvu 19 muna vua talanta imosi.) O mfumu osanisini yau awonso, oku vo: “‘Otomene sala, u ntaudi ambote ye kwikizi! Osongele kwikizi muna lekwa yakete. Ikuvana kiyekwa kia lekwa yayingi. Kota muna nkembo a mfumu aku.’”—Matai 25:21.

Kansi, ke diau ko divangamene kwa ntaudi ona watambula talanta imosi. O Ntaudi ovovele vo: “‘E Mfumu, yazaya wo vo u nkwa ntim’ambadi, ovelanga ina walembi kuna yo kutika ina walembi veva. Dianu vo, yabakama kwa wonga, yayenda sweka talanta aku muna ntoto. I yau yiyi, bonga e talanta aku.’” (Matai 25:24, 25) O ntaudi ndioyo kalundisa nkutu e nzimbu ku banco ko, kimana zakulamena yo twasa nluta kwa mfumu andi. Tulenda vova vo ntaudi ndioyo kasadila mfumu andi ko.

O ntaudi ndioyo wafwana yikilwa kwa mfumu andi vo, “ntaudi ambi ye molo.” O mfumu untambwidi e talanta, ovene yo kwa ntaudi una wakubama muna sala. Ovovele vo:“Konso ona una ye lekwa, yayingi kevewa yo wokela. Kansi ndiona kena ye lekwa ko, kina kena kiau nkutu katulwa kikunkatulwa.”—Matai 25:26, 29.

Alongoki a Yesu mambu mayingi bena yindula, kumosi mpe ye mana Yesu kavovele muna kingana kiaki. Babakwidi vo e salu kina Yesu kabavene kia kitula wantu se alongoki, salu kiamfunu kikilu. Yesu ubavovese vo bakivana emvimba muna salu kiaki. Yesu kayindwidi ko vo yau awonso mpila mosi bekala sadila e salu kabavene. Nze una kavovele muna kingana kiandi, konso nlongoki ovanga mawonso “mun’owu wa ngolo zandi.” Ediadi ke disongele ko vo Yesu oyangalala avo nlongoki andi “molo” ye ke toma salanga ko muna wokesa mavua ma mfumu andi.

Kansi antumwa batomene yangalela o nsilu owu: “Konso ona una ye lekwa, yayingi kevewa yo wokela!”