Omu Yesu apwile lika haPili yaMilive navaposetolo jenyi vawana, avalwezele chifwanyisa chikwavo. Hakavanga omu apwile muYeliko, avalwezele chifwanyisa chajimina hakusaka kusolola nge Wangana uchapwile hahasuku. Chifwanyisa asakile kuvalweza jino chapwile navyuma vyavivulu vyakulifwana nachize chajimina. Chifwanyisa kana nachikiko chakumbulwile chihula chize chatalishile kukupwako chenyi nakuchikukulwishi chakatwamino kamyaka yino. Chasoloka nge tumbaji twenyi vatelelele kuzata nangolo mulimo avahanyine.

Yesu ahanjikile ngwenyi: “Chinapu nge mutu uze apwile kwakamwihi nakuya kulifuchi lyeka, uze asanyikile vandungo jenyi nakuvasela vyuma vyenyi.” (Mateu 25:14) Hakuwana nge Yesu alifwanyishile lyehi ivene kuli mutu uze ayile kulifuchi lyeka “mangana akatambule ngolo jawangana,” ngocho vaposetolo vatachikijile jino ngwavo “mutu” uze apwile nakuvuluka Yesu apwile ikiye vene.—Luka 19:12.

Shimbu kanda uze mutu wamuchifwanyisa akatuke ungeji wakuya kulifuchi lyeka, ahanyine vandungo jenyi vikumba vyavilemu. Omu mwahichile myaka yitatu nachimbwa, Yesu azachilenga chikuma mulimo wakwambulula mujimbu wamwaza waWangana waKalunga nakukafwa tumbaji twenyi navakiko vazate mulimo kana. Kahomu apwile kwakamwihi nakuya, afwelelele ngwenyi tumbaji twenyi navatwalaho lika kuzata mulimo uze avanangwile.—Mateu 10:7; Luka 10:1, 8, 9; esekesenuko Yowano 4:38; 14:12.

Uze mutu wamuchifwanyisa chize ahanjikile Yesu apangilile ngachilihi vikumba vyenyi? Yesu ambile ngwenyi: “Umwe amuhanyine jitalende jitanu, mukwavo jivali, weka yimwe. Avahanyine mutu himutu kweseka nangolo jenyi, kaha ayile kulifuchi lyeka.” (Mateu 25:15) Uno ava vandungo valingile ngachilihi navyuma vavahanyine? Kutala vazachishile kanawa vikumba avaselelele kaka yavo tahi? Yesu alwezele vaposetolo ngwenyi:

“Uze atambwile jitalende jitanu hahaze vene ayile nakusekasana, kaha awanyinyineho jeka jitanu. Chochimwe nawa nauze atambwile jivali, awanyinyineho jeka jivali. Oloze ndungo uze atambwile yimwe ayile, afulile mumavu nakusweka luze lumbongo lwakaka yenyi.” (Mateu 25:16-18) Vyuma muka vyasolokele omu kaka yavo akindulukile?

Yesu atwalileho ngwenyi: “Omu hahichile tando yayisuku, kaka yavaze vandungo ejile nakuhituluka navo mujimbongo.” (Mateu 25:19) Vaze vandungo vavali vesekele kulingako mumwe, “mutu himutu kweseka nangolo jenyi.” Ndungo hindungo azachile nangolo nakuhundangana chikuma havyuma vavahanyine kuli kaka yavo. Ndungo uze atambwile jitalende jitanu, awanyinyineho jikwavo jitanu, omu mukiko chapwile nakuli uze ndungo atambwile jitalende jivali. (Kushikulu, mutu azachilenga myaka 19 vamuhanyine fweto yize yatesekele hamwe natalende.) Kaka yavo avasangejekele namazu akwamba ngwenyi: “Wazachila, ove ndungo wamwaza wakushishika! Unapunga  uwakushishika havyuma vyavindende. Nangukutongola ulamenga vyuma vyavivulu. Wahilila hamwe nakaka yove.”—Mateu 25:21.

Oloze omu keshi mukiko chapwile kuli ndungo vahanyine talende yimweko. Ambile ngwenyi: “Ove Mwata, ngwatachikijile ngwami wapwa umutu wamukalu, weji kwahanga kuze kawakuvilileko, kaha weji kukungululanga kuze kawapekwilileko. Ngocho ngwevwile woma, kaha ngwayile nakusweka talende yove mumavu. Tala, talende yove eyi.” (Mateu 25:24, 25) Ou ndungo katwalile jize jimbongo kunyambaulu mangana jivuleko. Kalingile nge muze mwayile muchima wakaka yenyiko.

Chatelemo kumwamba kuli kaka yenyi ngwenyi “ndungo wakuhuka wamuvwa.” Natalende yize yimwe apwile nayo vamutambwileyo nakuyihana kuli ndungo uze apwile namuchima wakufwila kuzata nangolo. Uze kaka yenyi ahanyine lushimbi luze vatela kukavangiza hakwamba ngwenyi: “Mwomwo weshowo ali navyo, navamuwezelako vikwavo, kaha mwapwa navyavivulu. Oloze ou keshi navyoko, nachize ali nacho navamutambulacho.”—Mateu 25:26, 29.

Ngocho tumbaji twaYesu vapwile navyuma vyavivulu vatelele kushinganyeka hali echi chifwanyisa. Vatachikijile ngwavo Yesu avahanyine mulimo waulemu chikuma wakunangula vatu vapwenga tumbaji. Kuzata mulimo kana chapwa hikutokwa chachinene chikuma. Kaha afwelelele ngwenyi navakakilikita chikuma hamulimo navahane. Yesu kalumbunwine nge vosena vatelele kulinga vyuma vyakuteseka hamwe hakuzata mulimo wakwambulula uze avahanyine kuzatako. Ngocho mutu himutu atela kuzata ‘kweseka noho hakumina ngolo jenyi.’ Echi kachalumbununa nge Yesu mwawahilila namutu mwapwa “muvwa” nakuhona kuzata kweseka nahakumina ngolo jenyi mukukundwiza vikumba vyaKaka yenyiko.

Chikupu vene vaposetolo vevwile kuwaha chikuma omu Yesu ambile ngwenyi: “Weshowo ali navyo, navamuwezelako vikwavo.”