Ka pod en gi jootene ang’wen-go e Got Zeituni, Yesu goyonegi ngero machielo. Odiechienge manok motelo kane en Jeriko, Yesu nogoyo ngero mar mina konyisogo ni Pinyruoth ne pod ni nyime. Ngero ma koro ogoyoni nigi weche moko ma chalre gi manie ngero mar mina. Ngeroni bende dwoko mana penjo ma jootene nopenje e wi kinde ma biro yudo ka entie e loch kendo ni giko mar ndalo okayo machiegni. Ngerono nyiso ni jopuonjrene nyaka bed jokinda e tiyo gi mwandu kata migawo ma oket e lwetgi.

Yesu chako ngerono kama: “En mana kaka ng’at ma ne chiegni dhi wuoth e piny moro mabor ma noluongo wasumbnine kae to noketo gige e lwetgi.” (Mathayo 25:14) Nikech Yesu nosewacho ni en owuon ochalo gi ng’at ma ne odhi wuoth e piny moro mabor “mondo okete kaka ruoth,” jootene nyalo fwenyo mayot ni Yesu e “ng’at” miwuoyoe e ngero mogoyo sanini.​—Luka 19:12.

Ka ng’atno pok odhi wuoth e piny maborno, oweyo gige e lwet wasumbnine. Higni adek gi nus ma Yesu osebedogo e piny, osebedo koyalo wach Pinyruodh Nyasaye kendo kotiego jopuonjrene mondo gitim tijno. Koro sani ochiegni wuok e piny kendo en gadier ni jopuonjrene biro chopo tich mosebedo kotiegogi mondo gitim.​—Mathayo 10:7; Luka 10:1, 8, 9; pim gi Johana 4:38; 14:12.

Ka luwore gi ngerono, ere kaka ng’atno pogo gige? Yesu lero kama: “Achiel kuomgi nomiyo talanta abich, machielo ariyo, to pod machielo nomiyo achiel, kendo moro ka moro nomiyo ka luwore gi nyalone, eka nodhi wuoth e pinyno.” (Mathayo 25:15) Wasumbnigo dhi tiyo nade gi talanta ma opognegigo? Be gibiro nyiso kinda e tiyo gi talantago e yo ma biro moro ruodhgi?

Yesu nyiso jootenego kama: “Gikanyono, misumba ma nomi talanta abich nodhi moloko ohala kodgi kendo noyudo abich momedore. Kamano bende misumba ma nomi ariyo noyudo ariyo momedore. To misumba ma nomi mana achiel, nodhi mokunyo bur e lowo kendo nopando pesa ma ruodhe nomiye.” (Mathayo 25:16-18) Ang’o ma biro timore ka ruodhgi oduogo?

Yesu dhi nyime ka wacho kama: “Bang’ ndalo mang’eny, ruodh wasumbnigo nobiro mondo onon kwan pesago kodgi.” (Mathayo 25:19) Wasumbni ariyo mokwongo notimo duto ma ginyalo ‘ka luwore gi nyalo mar moro ka moro’ kuomgi. Wasumbni ariyogo ne gin jokinda ma tiyo matek kendo ma tiyo maber gi gik momigi e yo ma kelo nyak. Misumba ma ne omi talanta abich noloko ohala moyudo abich momedore, to mano bende e kaka misumba ma noyudo ariyo notimo moyudo ariyo momedore.  (E kinde machon-go, jatich ne nyaka ti gi kinda kuom higni 19 kama mondo eka oyud chudo ma romre gi talanta achiel.) Ruodhno pwoyo moro ka moro kuom wasumbninego niya: “Itimo maber, in misumba maber kendo mogen! Isebedo ng’at migeno kuom gik manok. Abiro keti e wi gik mang’eny. Donj e mor mar ruodhi.”​—Mathayo 25:21.

Kata kamano, misumba ma ne omi talanta achiel to ne opogore. Nowacho ne ruodhe kama: “Ruodha, ne ang’eyo ni in ng’at ma chuno gik moko, ma kayo cham kama ok nochuoyoe kendo ma choko cham kama ok nopiethoe. Omiyo, ne abedo maluor mi ne adhi ma apando talanta mari e lowo. Erigo, aduokonigo.” (Mathayo 25:24, 25) Misumbano ok okano kata mana pesa e bengi mondo onyuol ne ruodhe ohala moro e wiye. Mano nyiso ni ok otimo gima nyalo moro ruodhe.

Mano e momiyo ruodhe luonge ni “misumba marach kendo ma jasamwoyo.” Imaye talanta ma ne omiye kae to imiyo ng’at moikore tiyo gi kinda. Ruodh wasumbnigo nyiso kaka dwache obet. Owacho kama: “Ng’at ma nigo, nomedne kendo nobedgo mogundho. To ng’at ma ongego, kata mana ma en-go nomaye.”​—Mathayo 25:26, 29.

Kata mana e ngeroni, jopuonjre Yesu nigi weche mathoth monego gipar matut. Ginyalo fwenyo ni ting’ ma Yesu keto e lwetgi mar loko ji obed jopuonjrene en ting’ maduong’ miwuoro. Kendo odwaro ni gibed jokinda e tiyo gi thuolo makende momiyogino. Yesu ok tem wacho ni giduto nyaka gitim gik moko e okang’ ma romre sama gichopo tich mosemiyogi mar yalo. Kar mano, mana kaka ngerono nyiso, moro ka moro kuomgi onego otim duto monyalo “ka luwore gi nyalone.” Mano ok nyis ni Yesu biro bedo mamor kapo ni ng’ato en “jasamwoyo” ma ok tim duto monyalo mondo oti maber gi gige Ruoth.

Kata kamano, mano kaka nyaka bed ni jootego mor sama Yesu singo ni: “Ng’at ma nigo, nomedne”!