Ainda Hesus i su kuater apòstelnan tabata riba Seru di Oleifi. I el a konta nan un otro ilustrashon. Un par di dia promé, ora e tabata na Yériko, el a konta un ilustrashon tokante mina pa mustra ku ainda tabata falta hopi tempu pa e Reino bini. E ilustrashon ku e tabata bai konta awor tin algun aspekto similar na esun tokante e minanan i ta forma parti di su kontesta riba e pregunta tokante e señal di su presensia i di e konklushon di e era. E ilustrashon ta enfatisá ku Hesus su disipelnan mester kumpli diligentemente ku e asignashon ku el a duna nan.

Hesus a kuminsá e ilustrashon, bisando: “E Reino ta manera ora un hòmber ku tabata kla pa biaha pa eksterior a manda yama su esklabonan i a enkargá nan ku su pertenensianan.” (Mateo 25:14) Komo ku Hesus a yega di kompará su mes ku un hòmber ku tabata biaha pa eksterior “pa keda koroná komo rei,” e apòstelnan por a komprondé fásilmente ku e “hòmber” den e ilustrashon ta representá Hesus.—Lukas 19:12.

Promé ku e hòmber den e ilustrashon a biaha pa eksterior, el a enkargá su esklabonan ku su pertenensianan di balor. Durante su sirbishi di tres aña i mei riba tera, Hesus a enfoká riba e trabou di prediká e bon notisia di e Reino di Dios i a entrená su disipelnan pa hasi e trabou akí. Awor ku e tabata serka di bai shelu, e tabatin konfiansa ku su disipelnan lo a sigui ku e trabou ku el a entrená nan pa hasi.—Mateo 10:7; Lukas 10:1, 8, 9; kompará ku Huan 4:38; 14:12.

Kon e hòmber den e ilustrashon a parti su pertenensianan? Hesus a konta: “El a duna e promé esklabo sinku talento di moneda di plata; e di dos esklabo, dos talento; i e di tres esklabo, ún talento; kada un segun su kapasidat, i el a biaha pa eksterior.” (Mateo 25:15) Kiko e esklabonan akí a hasi ku e talentonan ku nan a risibí? Nan a usa nan na bienestar di nan doño? Hesus a sigui konta:

“Mesora esun ku a haña sinku talento a bai hasi negoshi ku e talentonan, i el a gana sinku mas. Meskos tambe, esun ku a haña dos talento a gana dos mas. Ma e esklabo ku a haña ún talento so a bai koba un buraku den tera i a skonde e monedanan di plata di su doño.” (Mateo 25:16-18) Kiko a sosodé ora e doño a bini bèk?

Hesus a bisa: “Despues di hopi tempu, doño di e esklabonan ei a bolbe, i el a hasi kuenta ku nan.” (Mateo 25:19) E promé dos esklabonan a hasi tur loke nan tabata por, “kada un segun su kapasidat.” Nan tabata diligente; nan a traha duru i a hasi algu útil ku loke nan a haña di nan doño. Tantu e promé esklabo komo esun di dos a dòbel e kantidat di nan talento. (E tempu ei,  un trahadó mester a traha mas o ménos 19 aña pa gana ún talento.) E doño a elogiá ámbos esklabo ku e palabranan akí: “Hopi bon, mi bon i fiel esklabo! Bo tabata fiel riba poko kos. Lo mi enkargá bo ku hopi kos. Drenta i kompartí e alegria di bo doño.”—Mateo 25:21.

Ma e kaso di e esklabo ku a haña ún talento tabata diferente. El a bisa su doño: “Shon, mi tabata sa ku bo ta un hòmber eksigente, ku ta kosechá kaminda bo no a sembra i ku ta rekohé kosecha ku bo no a traha p’e. P’esei mi a haña miedu i a bai skonde bo talento den tera. Ata loke ta di bo aki.” (Mateo 25:24, 25) E no a ni sikiera depositá e plaka pa asina su doño por a haña algu di interes. E no a traha na bienestar di su doño.

Ta komprendibel ku e doño a yam’é un “esklabo floho i malbado.” E doño a kita e talento ku e tabatin for di dje i duna esaki na un otro esklabo ku sí tabata dispuesto pa traha diligentemente. Anto e doño a bisa: ‘Tur hende ku tin lo risibí mas, i nan lo tin na abundansia. Ma pa loke ta esun ku no tin, asta loke e tin lo ser kitá for di dje.’—Mateo 25:26, 29.

E ilustrashon akí tambe a duna e disipelnan di Hesus hopi kos di pensa riba dje. Nan a komprondé ku e trabou di hasi disipel ku Hesus a enkargá nan kuné tabata un gran privilegio, un trabou sumamente importante. Nan a komprondé tambe ku Hesus ta ferwagt pa su disipelnan hasi e trabou akí diligentemente. Ta klaru ku lo e no spera mas di loke nan por hasi. Manera e ilustrashon ta mustra, kada disipel mester hasi loke e por, “segun su kapasidat.” Esaki no ke men ku Hesus lo keda kontentu ku un persona “floho” ku no ta hasi tur su esfuerso pa promové interes di e Doño.

E apòstelnan lo a keda masha kontentu ku e siguiente garantia ku Hesus a duna nan. El a bisa nan: ‘Tur hende ku tin lo risibí mas’!