Olivos orqopi tawa apostolninkunawan rimashaspan Jesusqa paykunaman willaran qolqe bolsakunata chaskiq kamachikunamanta ejemplota. Yaqa chay jina ejemplotan willaranña Jericó llaqtapi kashaspa, chay kutipiqa chayta willaran Diospa gobiernon chayamunanpaq unayraq faltasqanta rikuchinanpaqmi. Qolqe bolsakunamanta willaspanmi ichaqa rikuchiran paypa discipulonkuna tukuy sonqowan Diospaq llank’ananku kasqanta.

Jesusmi niran: “Juj runan karu llaqtaman ripunanpaqña kashaqtin kamachinkunata wajachimuran, jinaspa paykunaman saqeran kaqninkunata”, nispa (Mateo 25:14). Apostolkunaqa repararankuchá chay ejemplopi runaqa Jesusta representasqanta. Ñan Jesusqa pay kikinta comparakuranña ‘nombramiento chaskinanpaq karu llaqtaman viajaq runawan’ (Lucas 19:12).

Kamachinkunaman kaqninkunata saqeq runa jinan Jesuspas manaraq cieloman ripushaspa discipulonkunaman juj jatun llank’anata saqenan karan, chaymi karan Diospa gobiernonmanta lliuman willananku. Chaypaqmi Jesusqa kinsa wata kuskanña discipulonkunata preparasharan. Jesusqa paykunapi confiaspan chay llank’anataqa saqenan karan (Mateo 10:7; Lucas 10:1, 8, 9; tupachiy Juan 4:38; 14:12 textokunawan).

Chay ejemplopi viajaq runa, ¿jayk’a qolqetan qoran kamachinkunaman? Chaymantan Jesús niran: “Jujninmanmi qoran pisqa bolsa qolqeta, jujninmantaq iskay bolsata, jujkaqmantaq juj bolsata; sapankamanmi qoran maychus ruway atisqankuman jina. Jinaspan karu llaqtaman ripuran”, nispa (Mateo 25:15). Chaymantataq Jesusqa niran:

“Pisqa bolsa qolqeta chaskiqmi chaskispa jina riran chaywan negocio ruwaq, jinaspa pisqa bolsa qolqetawan ganaran. Iskay bolsa qolqeta chaskiqpas iskay bolsa qolqetawanmi ganaran. Juj bolsa qolqellata chaskiqmi ichaqa rispa pampata t’oqospa patronninpa qolqenta chaypi pakaran”, nispa (Mateo 25:16-18). ¿Iman pasaran chay kamachikunaq patronninku kutimuqtin?

Chaymantan Jesús niran: “Unay tiempomantataq chay kamachikunaq patronninqa kutimuran, jinaspa paykunamanta cuentata mañaran”, nispa (Mateo 25:19). Pisqa bolsa qolqeta chaskiq, iskay bolsa qolqeta chaskiqpas ‘maychus ruway atisqankuman jinas’ allinta llank’asqaku, chaysi qolqe chaskisqankuta mirachisqaku, jujnin kaqsi pisqa bolsa qolqetawan ganasqa, juj kaqtaq iskay bolsa qolqetawan. (Chay tiempopiqa juj bolsa qolqeqa karan 19 wata llank’asqamanta pagon). Chaysi chay patronqa chay kamachinkunata sapankata nisqa: “¡Kusapuni, allin kamachi! Qanqa junt’aqmi kanki. Pisi kaqniykunata  qhawaspan allinta junt’aranki. Chaymi askha kaqniykunata qhawanaykipaq churasayki. Kunanqa patronniykiwan kuska kusikuy”, nispa (Mateo 25:21).

Juj bolsa qolqeta chaskiq kamachis ichaqa mana chhaynatachu llank’asqa. Chaysi patronninta nisqa: “Patronníy, noqaqa yachanin nishu mañakuq kasqaykita, mana t’akasqaykimanta cosechaq kasqaykita, mana wayrachisqaykimanta oqariq kasqaykitapas. Chaymi noqaqa manchakuymanta bolsa qolqeykita pampaman pakamurani. Kayqa apampushaykin chay qolqeykita”, nispa (Mateo 25:24, 25). Chay kamachiqa manas bancollamanpas chay qolqeta churasqachu, chhaynapi imallatapas ganananpaq.

Chaysi chay patronqa chay kamachita nisqa: “Mana allin qella kamachi”, nispa. Jinaspa bolsa qolqenta qechuchispa juj kaq allin kamachiman qochisqa. Jinaspa nisqa: “Pipas kaqniyoqmanqa astawanmi qokunqa, chhaynapin imanpas aswan askharaq kanqa, mana kaqniyoqmantan ichaqa tukuy imanpas qechusqa kanqa”, nispa (Mateo 25:26, 29).

Jesuspa discipulonkunaqa allintan piensananku karan chay ejemplopi. Allintan reparananku karan jujkunata yachachinankupaq llank’ay chaskisqankuqa chay qolqe bolsakuna jina ancha valorniyoq kasqanta. Jesusqa munaran paykuna tukuy atisqankuta chay llank’aypi llank’anankutan. Manaña kaqtakamachu chay chaskisqanku “qolqe bolsakunata” mirachinanku karan chaypas, “maychus ruway atisqankuman jinan” tukuy sonqowan llank’ananku karan. Chhaynaqa manapunin chay “qella” kamachi jinaqa kanankuchu karan.

Apostolkunaqa anchatachá kusikuranku chay ejemplopi patronpa: “Pipas kaqniyoqmanqa astawanmi qokunqa”, nispa nisqanwan.