Samtang kaupod pa ni Jesus an iya upat nga apostol didto ha Bukid han mga Olibo, ginsumatan niya hira hin usa pa nga ilustrasyon. Pipira pa la ka adlaw an naglabay, han nakadto hiya ha Jerico, naghatag hiya hin ilustrasyon mahitungod han mga mina basi ipakita nga an Ginhadian maiha pa umabot. An ilustrasyon nga iya yana ig-iistorya may mga kaparihoan hito. Bahin ini han iya baton ha pakiana mahitungod han iya presensya ngan han ikatarapos hini nga sistema. Ginpapabug-atan hini nga an iya mga disipulo kinahanglan magin maduruto ha pagbuhat han igintapod ha ira.

Ha pagtikang, hi Jesus nagsiring: “An Ginhadian pariho liwat hin tawo nga mabiyahe ha iba nga nasud. Antes hiya lumakat, gintawag niya an iya mga uripon ngan igintapod ha ira an iya mga panag-iya.” (Mateo 25:14) Tungod kay iginpariho na ni Jesus an iya kalugaringon ha tawo nga nagbiyahe ha iba nga nasud “basi makarawat gud niya an pagkahadi,” nasabtan dayon han iya mga apostol nga hiya an “tawo” nga ginhihisgotan ha ilustrasyon.—Lucas 19:12.

Antes magbiyahe ha iba nga nasud an lalaki ha ilustrasyon, may igintapod hiya nga birilhon nga mga panag-iya ha iya mga uripon. Durante han tulo ngan tunga ka tuig nga ministeryo ni Jesus, nagpokus hiya ha pagsangyaw han maopay nga sumat han Ginhadian han Dios, ngan ginbansay an iya mga disipulo para hini nga buruhaton. Yana nga malakat na hiya, nasarig hiya nga padayon nira nga tutumanon an buruhaton diin hira ginbansay.—Mateo 10:7; Lucas 10:1, 8, 9; itanding an Juan 4:38; 14:12.

Ha ilustrasyon, paonan-o iginpanhatag han tawo an iya mga panag-iya? Hi Jesus nagsiring: “May gintagan hiya hin lima ka talanton, may gintagan hin duha, ngan may gintagan hin usa. An kada tagsa gintagan sumala han ira abilidad, katapos nagbiyahe hiya.” (Mateo 25:15) Ano an bubuhaton hini nga mga uripon ha igintapod ha ira? Magigin maduruto ba hira ha paggamit hito para ha kapulsanan han ira agaron? Ginsidngan ni Jesus an mga apostol:

“An usa nga kinarawat hin lima ka talanton linakat dayon ngan igin-negosyo ito ngan nakaganansya hin lima. Sugad man, an kinarawat hin duha nakaganansya hin duha. Pero an uripon nga kinarawat hin usa la, linakat ngan iginlubong ha tuna an silber nga kwarta han iya agaron.” (Mateo 25:16-18) Ano an mahitatabo pagbalik han agaron?

Hi Jesus nagpadayon: “Paglabay hin maiha nga panahon, inabot an agaron hito nga mga uripon ngan nakigtuhay ha ira.” (Mateo 25:19) Ginbuhat han siyahan nga duha nga uripon an ngatanan nga ira mahihimo, ‘an kada tagsa sumala han ira abilidad.’ An tagsa ha ira maduruto, mauyatom, ngan malampuson ha pagbuhat han igintapod ha ira. Nakapatubo hin doble an nakakarawat han lima ka talanton, sugad man an nakakarawat han duha ka talanton. (Hadto, kinahanglan magtrabaho hin 19 ka tuig an usa nga trabahador basi makatirok hin katugbang han usa ka talanton.) Pariho hira ginkumendasyonan han agaron: “Maopay an imo ginbuhat, matataporan ngan matinumanon nga uripon! Tungod kay matinumanon ka ha gutiay nga butang, tataporan ko ikaw hin damu nga butang. Malipay ka upod han imo agaron.”—Mateo 25:21.

Pero iba an ginbuhat han uripon nga nakakarawat han usa ka talanton. Hiya nagsiring: “Agaron, maaram ako nga istrikto ka, gin-aani mo an waray mo igsabwag ngan gintitirok mo adton diri ikaw an nagpalíd. Salit tungod ha kahadlok, linakat ako basi ilubong ha tuna an imo talanton. Adi ibabalik ko na ha imo.” (Mateo 25:24, 25) Waray man la niya ideposito ha bangko an kwarta basi tumubo ito ngan maihatag niya ha iya agaron. Kon sugad, waray niya buhata an karuyag han iya agaron.

Angay la nga tawagon hiya han agaron nga “maraot ngan hubya nga uripon.” Ginkuha an nakada ha iya ngan iginhatag ha uripon nga andam magtrabaho hin maduruto. An agaron naghatag hin surundon: “An bisan hin-o nga may-ada na, dudugangan pa ngan magigin hura hiya, pero an waray, kukuhaon bisan an aada ha iya.”—Mateo 25:26, 29.

Bisan hini pa la nga ilustrasyon, damu gud an angay hunahunaon han mga disipulo ni Jesus. Nasabtan nira nga birilhon gud an igintapod ha ira ni Jesus—an presyoso nga pribilehiyo ha paghimo hin mga disipulo. Ngan naglalaom hiya nga magigin maduruto hira ha pagtuman hini. Diri naghuhunahuna hi Jesus nga kinahanglan parapriho an mahihimo han ngatanan may kalabotan ha pagsangyaw nga buruhaton nga igintapod ha ira. Sugad han igin-ilustrar, an tagsa sadang magbuhat han bug-os niya nga mahihimo ‘sumala han iya abilidad.’ Diri ini nagpapasabot nga nalilipay hi Jesus kon an usa “hubya” ngan diri nagbubuhat han iya pinakamaopay ha pagpauswag han mga panag-iya han Agaron.

Pero nalipay gud an mga apostol hini nga pasarig: “An bisan hin-o nga may-ada na, dudugangan pa”!