Le tiaʼan Jesús tu puʼukil le Olivoʼoboʼ tu yaʼalajtiʼob uláakʼ junpʼéel kettʼaan. Cinco kʼiinoʼob paachil, le tiaʼan tu kaajil Jericoeʼ, tu yaʼalajtiʼob u kettʼaanil le minas utiaʼal u yeʼesiktiʼob le Reinooʼ yaʼab u bin u káajal u meyaj. Le kettʼaan ken u yaʼal beoraaʼ yaʼab tiʼ baʼax igual yéetel u kettʼaanil le minasoʼ. Lelaʼ meyajnaj xan utiaʼal u núukik le kʼáatchiʼ tu beetoʼob utiaʼal u yojéeltikoʼob baʼax kʼiin ken suunak yéetel ken xuʼulsaʼak tiʼ le yóokʼol kaabaʼ. U disipuloʼobeʼ unaj u tsʼáaik u yóoloʼob u beetoʼob le meyaj kun tsʼaabiltiʼoboʼ.

Jesuseʼ tu yaʼalaj: «U reinoil kaʼaneʼ bey jeʼex juntúul máak nukaʼaj jóokʼol viaje táanxel luʼumileʼ. Letiʼeʼ tu tʼanaj u palitsiloʼobeʼ ka tu kʼubéentajtiʼob le baʼaxoʼob yaantiʼoʼ» (Mateo 25:14). Tumen Jesús tsʼoʼok u ketkuba yéetel juntúul máak bin náach utiaʼal «ka tsʼaʼabak u beet u reyil[eʼ]», le apostoloʼoboʼ tu naʼatoʼobeʼ le «máak» tu yaʼaloʼ láayliʼ letiʼeʼ (Lucas 19:12).

Táanil tiʼ u bin le máak táanxel luʼumiloʼ, tu tsʼáaj tiʼ u palitsiloʼob baʼaloʼob koʼojtak u tojol. Ichil óoxpʼéel jaʼab yéetel táanchumukeʼ Jesuseʼ tu tsʼáaj u yóol u kʼaʼayt u Reino Dios yéetel tu kaʼansaj u disipuloʼob utiaʼal u beetkoʼob xan le meyajaʼ. Beora táan u yooratal u binaʼ, letiʼeʼ u yojel yaan u tsʼáaik u yóol u beetoʼob le baʼax tu kaʼansajtiʼoboʼ (Mateo 10:7; Lucas 10:1, 8, 9; ket yéetel Juan 4:38; 14:12).

¿Bix túun úuchik u tʼoxik le baʼaxoʼob yaantiʼoʼ? Jesuseʼ ku yaʼalik: «Tiʼ juntúuleʼ tu tsʼáaj cinco talentos, tiʼ uláakʼeʼ kaʼapʼéel yéetel tiʼ uláakʼeʼ junpʼéel. Tiʼ cada juntúuleʼ tu tsʼáaj le jaypʼéel jeʼel u páajtal u meyajtikeʼ, ka túun bin táanxel luʼumil» (Mateo 25:15). ¿Baʼax tu beetaj le palitsiloʼob yéetel le baʼaxoʼob pʼaʼat tiʼoboʼ? ¿Tu tsʼáaj wa u yóoloʼob meyaj yéetel le baʼaxoʼob koʼojtak pʼaʼat tiʼoboʼ? Jesuseʼ tu yaʼalaj tiʼ u apostoloʼob:

«Le máax tu kʼamaj cinco talentosoʼ bin tu séebaʼanileʼ ka meyajnaj tu yéeteloʼob, ka tu náajaltaj uláakʼ cinco. Bey xan le máax tu kʼamaj kaʼapʼéeloʼ, tu náajaltaj uláakʼ kaʼapʼéel. Baʼaleʼ le palitsil tu kʼamaj chéen junpʼéeloʼ bineʼ, tu páanaj le luʼumoʼ ka tu mukaj le taakʼin de plata tsʼaʼabtiʼ tumen u tsʼuuliloʼ.» (Mateo 25:16-18.) ¿Baʼax kun úuchul ken suunak le tsʼuuloʼ?

Jesuseʼ seguernaj u yaʼalik: «Ka máan yaʼab kʼiinoʼobeʼ, taal u tsʼuulil le palitsiloʼoboʼ ka joʼopʼ u kʼáatiktiʼob baʼax tu beetoʼob yéetel le taakʼin tu kʼubéentajtiʼoboʼ» (Mateo 25:19). Le yáax kaʼatúuloʼ tu beetoʼob le bukaʼaj páajchaj u beetkoʼobeʼ. Cada juntúuleʼ tu tsʼáaj u yóol meyaj yéetel le baʼax kʼubéentaʼabtiʼoʼ. Le tu kʼamaj cinco talentosoʼ tu náajaltaj uláakʼ cinco, le tu kʼamaj kaʼapʼéel talentosoʼ tu náajaltaj xan uláakʼ kaʼapʼéel. (Teʼ kʼiinoʼob jeʼeloʼ, unaj u meyaj máak kex óoliʼ 19 años utiaʼal u náajaltik junpʼéel talento.) Le tsʼuuloʼ jach kiʼimakchaj u yóol yoʼolal le baʼax tu beetaj le kaʼatúuloʼ ka tu yaʼalajtiʼob: «Jach maʼalob  baʼax ta beetaj palitsil, jach utsech yéetel chúukaʼan a wóol. Tumen chúukpaj a wóol tiʼ jujunpʼéel baʼaloʼobeʼ yaan in kʼubéentiktech yaʼab baʼaloʼob. Kiʼimakchajak a wóol yéetel a tsʼuulil» (Mateo 25:21).

Baʼaleʼ le palitsil tsʼaʼab junpʼéel talento tiʼoʼ maʼ bey tu beetiliʼ. Letieʼ ku yaʼalik: «In tsʼuulil, teneʼ in wojel kaʼach jach yaʼab baʼax ka kʼáatik tiʼ a palitsiloʼob, ka jooch tuʼux maʼ paakʼalnajechiʼ, yéetel ka molik baʼal tuʼux maʼ ta kʼíitchʼintaj mix baʼaliʼ. Le oʼolal sajakchajeneʼ ka binen in muk a taakʼin. Jeʼel a taakʼinaʼ» (Mateo 25:24, 25). Mix teʼ banco tu bisaj utiaʼal u cobrartaʼal u interesil tumen u tsʼuuliloʼ. Maʼ meyajnaj yéetel le taakʼin tsʼaʼabtiʼoʼ.

Le tsʼuul túunoʼ tu yaʼalajtiʼ: «Kʼasaʼan yéetel maʼakʼóol palitsil». Ka chʼaʼab le baʼax yaantiʼ kaʼachoʼ ka tsʼaʼab tiʼ le palitsiloʼob tu tsʼáaj u yóoloʼob meyajoʼ. Le tsʼuul túunoʼ tu yaʼalaj: «Tiʼ le máax yaantiʼeʼ yaan u tsʼaʼabal uláakʼ tiʼ, yéetel yaan u beetaʼal u yaʼabtal le baʼax yaantiʼoʼ, baʼaleʼ le máax minaʼantiʼeʼ tak le bukaʼaj yaantiʼoʼ yaan u luʼsaʼaltiʼ» (Mateo 25:26, 29).

U disipuloʼob Jesuseʼ joʼopʼ u jach tuukuloʼob tiʼ le baʼax aʼalaʼab teʼ kettʼaanaʼ. Letiʼobeʼ tu tsʼáajoʼob cuentaeʼ junpʼéel nojoch meyaj bey junpʼéel baʼal jach koʼoj u tojol tsʼaʼab u beetoʼobeʼ. Jesuseʼ u kʼáat xan ka u tsʼáa u yóol u beetoʼob le meyajoʼ. Baʼaleʼ u yojel maʼ kun béeytal u beetkoʼob le bukaʼaj ku beetik u maasileʼ. Jeʼex úuchik u yaʼalik teʼ kettʼaanoʼ, cada juntúuleʼ ku beetik le ku páajtaleʼ. Leloʼ ku yeʼesikeʼ maʼ kun kiʼimaktal u yóol Jesús wa chéen «maʼakʼóol» máak u beet le meyaj ku tsʼáaik le Tsʼuuloʼ.

¡Bix wal tu yuʼubiluba le apostoloʼob le ka tu yuʼuboʼob u yaʼalaʼal «tiʼ le máax yaantiʼeʼ yaan u tsʼaʼabal uláakʼ tiʼ»!