114-تاراۋ
ٴماسىح قويلار مەن سەركەلەردى سوتتايدى
-
يسا قويلار مەن سەركەلەر تۋرالى استارلى اڭگىمە ايتتى
ٴزايتۇن تاۋىندا وتىرعان يسا قىزدار مەن كۇمىس تيىندار تۋرالى استارلى ٴمانى بار ەكى اڭگىمە ايتىپ بەرگەن بولاتىن. ەندى، ٶزىنىڭ «وسىندا بولۋى» مەن اقىر زاماننىڭ بەلگىسىنە قاتىستى ەلشىلەردىڭ سۇراعىنا بەرگەن جاۋابىنىڭ سوڭى قانداي بولار ەكەن؟ ول قويلار مەن سەركەلەر تۋرالى استارلى اڭگىمە ايتىپ بەردى.
«ۇلىلىققا بولەنگەن ادام ۇلى پەرىشتەلەرىمەن بىرگە كەلگەندە، سالتاناتتى تاعىنا وتىرادى»،— دەپ، يسا جاعدايدى سۋرەتتەۋدەن باستادى (ماتاي 25:31). يسا بۇل اڭگىمەنىڭ باستى كەيىپكەرى ٶزى ەكەنىن انىق كورسەتتى. سەبەبى ول ٶزىن «ادام ۇلى» دەپ ٴجيى اتايتىن (ماتاي 8:20؛ 9:6؛ 20:18، 28).
استارلى اڭگىمەدەگى جايتتار قاشان ورىندالادى؟ «ۇلىلىققا بولەنگەن» يسا پەرىشتەلەرىمەن كەلىپ، «سالتاناتتى تاعىنا» وتىرعاندا. ول بۇعان دەيىن دە پەرىشتەلەرىمەن بىرگە «سالتاناتتى ۇلىلىقپەن بۇلتتاردا كەلەتىنىن» ايتقان بولاتىن. بۇل جايت قاشان ورىن الادى؟ «الاپاتتان كەيىن ىلە-شالا» (ماتاي 24:29—31؛ مارقا 13:26، 27؛ لۇقا 21:27). سونىمەن اتالمىش استارلى اڭگىمەدەگى جايتتار بولاشاقتا يسا ۇلىلىقپەن كەلگەندە ورىندالادى. سوسىن نە بولادى؟
«ادام ۇلى پەرىشتەلەرىمەن بىرگە كەلگەندە،.. ونىڭ الدىنا بارلىق حالىقتار جينالىپ اكەلىنەدى. ول شوپاننىڭ قويلاردى سەركەلەردەن بولگەنىندەي، ادامداردى ەكى توپقا ٴبولىپ، قويلاردى وڭ جاعىنا، سەركەلەردى سول جاعىنا قويادى»،— دەپ ٴتۇسىندىردى يسا (ماتاي 25:31—33).
وڭ جاعىنا قويىپ، ىقىلاسىن بىلدىرگەن قويلارعا قاتىستى يسا: «سوندا پاتشا وڭ جاعىنداعىلارعا بىلاي دەيدى: — اكەم جارىلقاعاندار، كەلىڭدەر! دۇنيەنىڭ نەگىزى قالانعاننان بەرى سەندەر ٷشىن اكەم دايارلاعان پاتشالىقتى مۇرا ەتىڭدەر»،— دەدى (ماتاي 25:34). پاتشانىڭ ىقىلاسى نەگە قويلارعا ٴتۇستى؟
مۇنى پاتشا بىلاي دەپ ٴتۇسىندىردى: «مەن اش بولعاندا تاماق، شولدەگەندە سۋ بەردىڭدەر. بەيتانىس بولسام دا، ماعان قوناقجايلىلىق تانىتتىڭدار. كيىمسىز قالعانىمدا، كيىندىردىڭدەر. اۋىرعانىمدا، قامقورلىق جاسادىڭدار. تۇرمەدە وتىرعانىمدا، ماعان كەلدىڭدەر». ادىلدەردى بەينەلەگەن قويلار بۇل جاقسىلىقتاردى قالاي جاساعانىن سۇراعاندا، پاتشا: «بۇلاردى ەڭ كىشى دەگەن باۋىرلارىمنىڭ بىرىنە جاساعاندارىڭ — ماعان جاساعاندارىڭ»،— دەپ جاۋاپ بەردى (ماتاي 25:35، 36، 40، 46). كوكتە اۋرۋ مەن اشتىق جوق بولعاندىقتان، ادىلدەر پاتشاعا بۇل جاقسىلىقتاردى كوكتە جاسامايدى. سوندىقتان اڭگىمە يسانىڭ جەردەگى باۋىرلارىنا جاسالاتىن جاقسىلىق جونىندە بولۋ كەرەك.
ال سول جاعىنا قويىلعان سەركەلەرگە پاتشا نە دەدى؟ «پاتشا سول جاعىنداعىلارعا بىلاي دەيدى: — مەنەن اۋلاق كەتىڭدەر، قارعىس اتقاندار! سەندەر ٸبىلىس پەن ونىڭ پەرىشتەلەرىنە دايىندالعان ماڭگىلىك وتقا تۇسەسىڭدەر! ويتكەنى سەندەر مەن اش بولعاندا تاماق، شولدەگەندە سۋ بەرمەدىڭدەر. بەيتانىس بولعانىمدا، قوناقجايلىلىق تانىتپادىڭدار، كيىمسىز قالعانىمدا، كيىندىرمەدىڭدەر، اۋىرعانىمدا جانە تۇرمەدە وتىرعانىمدا، ماعان قامقورلىق جاسامادىڭدار»،— دەدى يسا (ماتاي 25:41—43). سەركەلەر ٴماسىحتىڭ جەردەگى باۋىرلارىنا جاساۋ كەرەك جاقسىلىقتى جاساماعاندارى ٷشىن وسىنداي ۇكىمگە لايىق بولدى.
سوسىن ەلشىلەر بولاشاقتاعى سوت ۇكىمىنىڭ سالدارى ماڭگىلىككە جالعاساتىنىن ٴبىلدى. يسا ولارعا: «سول كەزدە ول [پاتشا]: — سەندەرگە شىندىعىن ايتامىن، بۇلاردى ەڭ كىشى دەگەن باۋىرلارىمنىڭ بىرىنە جاساماعاندارىڭ — ماعان جاساماعاندارىڭ،— دەپ جاۋاپ بەرەدى. ٴسويتىپ، ولار ماڭگىلىككە جويىلادى، ال ادىلدەر ماڭگىلىك ٶمىردى يەمدەنەدى»،— دەدى (ماتاي 25:45، 46).
يسا ەلشىلەرىنىڭ سۇراعىنا بەرگەن جاۋابىندا وي جۇگىرتۋلەرى كەرەك كوپ جايتتاردى ايتتى. بۇل ولارعا كوزقاراستارى مەن ٸس-ارەكەتتەرىن تەكسەرۋگە كومەكتەسپەك ەدى.
