Omu Yesu apwile haPili yaMilive, ahanjikile chifwanyisa chavajike vamapwevo likumi nachajitalende. Uno akumishile ngachilihi kukumbulula chihula chize vamuhulishile vaposetolo jenyi kupandama kuchinjikizo chakupwako chenyi nachikukulwishi chakatwamino kamyaka yino? Alingile ngocho hakuhanjika chifwanyisa chamakumishilo chamikoko navapembe.

Aputukile kuhanjika ngwenyi: “Omu mwakeza Mwanamutu muupahu wenyi, navangelo jenyi vosena hamwe, mwakatwama halitanda lyenyi lyaupahu.” (Mateu 25:31) Asolwele hatoma nge chifwanyisa kana chashindakanyine chikuma hali ikiye. Alivulukile ivene ngwenyi ikiye “Mwanamutu.”—Mateu 8:20; 9:6; 20:18, 28.

Uno lwola muka nachikatesamo chifwanyisa kana? Nachikatesamo omu Yesu mwakeza “muupahu wenyi” navangelo jenyi hamwe nakutwama “halitanda lyenyi lyaupahu.” Halwola kana alingile hanahanjika lyehi ngwenyi “Mwanamutu ali nakwiza hamavwi amwilu nangolo naupahu waunene” hamwe navangelo jenyi. Mwaka uka navikasoloka vyuma kanevi? “Omu nawakalinga makumbi aze aluyando anakumu.” (Mateu 24:29-31; Mako 13:26, 27; Luka 21:27) Chifwanyisa kana nachikatesamo kulutwe omu Yesu mwakeza muupahu. Vyuma muka mwakalinga?

Yesu alumbunwine ngwenyi: “Omu mwakeza Mwanamutu . . . , vaka-mafuchi osena navakavakungulwila kumeso enyi, kaha mwakahandununa mutu kuli mukwavo, nganomu kafunga eji kuhandununanga mikoko kuli vapembe. Kaha mwakahaka mikoko kulivoko lyenyi lyachilyo, oloze vapembe kuchimoswe.”—Mateu 25:31-33.

Kutalisa kumikoko vaze vanawane uselewa, Yesu ambile ngwenyi: “Jino Mwangana mwakamba kuli vaze vali kuchilyo ngwenyi: ‘Twayenu, enu vanakisula kuli Tata, swanenu Wangana vamiwahishila kufuma kukwala chihela chakaye.’” (Mateu 25:34) Mwomwo ika mikoko vavevwilile uselewa kuli Mwangana?

 Mwangana alumbunwine ngwenyi: “Ngwevwile zala, kaha mwanguhanyine vyakulya. Ngwevwile lipwila, kaha mwanguhanyine meya. Ngwapwile ngungeji, kaha mwangutambwile nachisambo. Ngwapwile nauvu, kaha mwanguvwikile. Ngwavijile, kaha mwangulamine. Ngwapwile mukamenga, kaha mwejile nakungumona.” Omu vaze mikoko, “vaka-kwoloka,” vahulishile Yesu avalweze mujila vamulingilililemo vyuma vyamwaza, ikiye avakumbulwile ngwenyi: “Omu mwachilingile kuli umwe wakuli ava vandumbwami vavandende, mwachilingile kuli ami.” (Mateu 25:35, 36, 40, 46) Evi vyuma kavavilingililile mwiluko, mwomwo mwilu kamwatwama vaka-kuviza chipwe vaka-zalako. Evi kafwe hivyuma vize valingililile vandumbu jaKulishitu hano hamavu.

Nyi ngachilihi vapembe vaze vapwile kulivoko lyachimoswe? Yesu ambile ngwenyi: “Jino [Mwangana] mwakamba kuli ava vali kulivoko lyenyi lyachimoswe ngwenyi: ‘Fumenu kuli ami, enu vanashingi, yenunga mukakahya kahaya myaka yosena kaze vawahishila Liyavolo navangelo jenyi. Mwomwo ngwevwile zala, oloze kamwanguhanyine vyakulyako, ngwevwile lipwila, oloze kamwanguhanyine vyakunwako. Ngwapwile ngungeji, oloze enu kamwangutambwile nachisamboko. Ngwapwile nauvu, oloze enu kamwanguvwikileko. Ngwavijile kaha nawa ngwapwile mukamenga, oloze enu kamwangulamineko.’” (Mateu 25:41-43) Echi kusopesa kana chapwa chakutamo mwomwo vaze vapembe vahonene kutwama kanawa navandumbu jaKulishitu nakuvasolwela likoji hano hamavu.

Tumbaji vatachikijile ngwavo echi kusopesa chakulutwe nachikapwa chahaya myaka yosena. Yesu avalwezele ngwenyi: “Jino [Mwangana] mwakavakumbulula ngwenyi: ‘Chamuchano vene nangwamba kuli enu ngwami, hakuwana nge kamwachilingile kuli umwe wakuli ava vandumbwami vavandendeko, ngocho kamwachilingile kuli amiko.’ Kaha ava navakavatetako haya myaka yosena, oloze vaka-kwoloka navakatambula kuyoya chahaya myaka yosena.”—Mateu 25:45, 46.

Vyuma akumbulwile Yesu kuchihula vamuhulishile vaposetolo vyalingisa vaka-kumukavangiza vashinganyeke havyuma vyavivulu nakuvakafwa vakekese michima yavo navilinga vyavo.