Jesusqa Olivos muqupim 10 sipaskunamanta hinaspa talento nisqa qullqimanta rikchanachiykunata willakurqa. ¿Imaynatam Jesusqa chayamunan tiempomanta hinaspa tukupay punchawkunamanta apostolkunaman willakuyta tukurqa? Ovejakunamantawan cabrakunamanta rikchanachiywanmi.

Chaymi payqa willakuyta qallarispan nirqa: “Ancha atiyninpi runapa churin llapallan angelkunapiwan chayaramuspanmi achkirichkaq kamachinanpaq tiyananpi tiyaykunqa”, nispa (Mateo 25:31). Chaynatam Jesusqa paymanta astawan rimasqanta qawachirqa, payqa sapa kutim “runapa churin” kasqanwan riqsichikuq (Mateo 8:20; 9:6; 20:18, 28).

¿Haykapitaq Jesuspa willakusqanman hina kanqa? Ancha atiyninpi angelkunapiwan Jesus chayaramuspan “achkirichkaq kamachinanpaq tiyananpi” tiyaykuptinmi. Payqa ñam willakurqaña runapa churinqa angelkunapiwan ‘hatun atiywan hinaspa kanchariywan puyupi hamunanmanta’. ¿Haykapitaq chayqa kanqa? “Ñakariy [punchaw] pasaruptillanmi” (Mateo 24:29-31; Marcos 13:26, 27; Lucas 21:27). Chaynaqa hatun atiywan hinaspa kanchariywan Jesus hamuptinraqmi chayqa kanqa. Hinaspaqa, ¿imatam ruwanqa?

Jesusmi nirqa: ‘Ancha atiyninwan runapa churin chayamuptinmi qayllanpi llapallan nacionkuna huñunasqa kanqaku, chaymi runakunata rakinqa imaynam michiqpas cabrakunamanta ovejakunata rakichkaq hina. Ovejakunatam rakinqa alliq lawninman, cabrakunatañataqmi ichuq lawninman’, nispa (Mateo 25:31-33).

Chaymantam ovejakunapaq ima kananmanta nirqa: “Hinaptinmi alliq lawninpi kaqkunata kamachiqqa ninqa: ‘Hamuychikyá, taytaypa  bendecisqankuna, hinaspayá chaskiychik runakuna rikurisqanmantapacha qamkunapaq alistasqa Diospa munaychakuyninta’”, nispa (Mateo 25:34). ¿Imanasqataq ovejakunaqa kamachiqpa chaskisqan kanqaku?

Kikin kamachiqmi ninqa: “Qamkunaqa yarqaymanta kaptiymi imallatapas mikuykachiwarqankichik, yakumanta kaptiymi tomaykachiwarqankichik, forastero kaptiymi samaykachiwarqankichik, mana pachayuq kaptiymi pachaykachiwarqankichik, unquruptiymi atiendeykuwarqankichik, carcelpi kaptiypas watukaykamuwarqankichikmi”, nispa. Ovejakunañataqmi utaq allin ruwaqkunañataqmi ninqaku haykapi chaykuna ruwasqankumanta. Hinaptinmi kamachiqqa ninqa: “Chiqaptapunim nikichik: Kay wawqiykunamanta huknin uchuychan kaqpaq allin kaqta ruwaspaykichikqa ñuqapaqmi ruwarqankichik”, nispa (Mateo 25:35, 36, 40, 46). Chayqa manam hanaq pachapi allin kaqkunata ruwasqankuchu, aswanqa Jesuspa wawqinkunarayku kay pachapi ruwasqankum. Hanaq pachapiqa manam pipas unqunchu nitaq yarqaymantachu kachkan.

¿Imatam Jesusqa cabrakunata ninqa? Jesusmi nirqa: “Ichuq lawninpi kaqkunatañataqmi ninqa: ‘Yaw ñakasqa kaqkuna, qayllaymantayá pasawaychik diablopaqwan angelninkunapaq alistasqa wiña-wiñaypaq ninaman. Qamkunaqa yarqaymanta kaptiymi mana mikuykachiwarqankichikchu, yakumanta kaptiymi mana tomaykachiwarqankichikchu. Forastero kaptiymi mana samaykachiwarqankichikchu, mana pachayuq kaptiymi mana pachaykachiwarqankichikchu, unquruptiypas hinaspa carcelpi kaptiypas manam atiendeykuwarqankichikchu’”, nispa (Mateo 25:41-43). Chaynapim tukunqaku Jesuspa wawqinkunata mana yanapasqankurayku.

Chaywanmi apostolkunaqa musyakurqaku hamuq punchawpi Jesuspa chayna tanteasqanqa wiñaypaq kananmanta. Chaymi Jesusqa nirqaraq: “‘Chiqaptapunim nikichik: Kay uchuychakunamanta hukninpaq mana ruwaspaykichikqa ñuqapaqmi mana ruwarqankichikchu’, nispa. Chaymi paykunaqa wiña-wiñaypaq wañunqaku, allin ruwaqkunam ichaqa wiña-wiñaypaq kawsanqaku”, nispa (Mateo 25:45, 46).

Apostolninkuna tapukuptinku chaynata Jesuspa nisqanqa ancha yuyaymananankupaq hinam karqa, lliw qatiqninkunam yuyaymanananku karqa imayna kasqankupi hinaspa ima ruwasqankupi.