Ua faatoʻā māeʻa ona faamatala e Iesu talafaatusa e faatatau i taupou e toʻasefulu ma taleni, a o iai pea i le mauga o Olive. Ua faapefea ona faaiʻu e Iesu lana tali i le fesili a ona aposetolo e toʻafā, e faatatau i le faailoga o lona faatasi mai ma le taufaaiʻuiʻuga o lenei faiga o mea? Ua ia faia faapea e ala i le faamatala atu o le talafaatusa mulimuli, e faatatau i mamoe ma ʻoti.

Ua amata e Iesu le talafaatusa i lona faamatala atu lea o le taimi o le a tupu ai lenā mea: “Pe a taunuu le Atalii o le tagata i lona mamalu, ma agelu uma faatasi ma ia, ona tiʻetiʻe ai lea o ia i lona nofoālii mamalu.” (Mataio 25:31) Ua faamanino atu e Iesu, o ia le tagata autū o lenei talafaatusa. E masani ona ia taʻua o ia o “le Atalii o le tagata.”—Mataio 8:20; 9:6; 20:18, 28.

O afea e faataunuu ai lenei talafaatusa? E faataunuuina pe a “taunuu” mai Iesu “i lona mamalu” faatasi ai ma agelu, ma tiʻetiʻe “i lona nofoālii mamalu.” Ua uma ona ia fetalai e faatatau i “le Atalii o le tagata o loo sau i ao, ma le mana tele, ma le mamalu” faatasi ai ma ana agelu. O afea o le a tupu ai lenā mea? ʻPe a mavae le puapuaga.’ (Mataio 24:29-31; Mareko 13:26, 27; Luka 21:27) O lea, e faataunuuina lenei talafaatusa pe a taunuu mai Iesu i lona mamalu i le lumanaʻi. O le ā o le a ia faia ai i lenā taimi?

Ua faamatala e Iesu e faapea: ʻPe a taunuu le Atalii o le tagata, e faapotopotoina atunuu uma i ona luma, ona tuueseeseina lea e ia o tagata, e pei ona tuueseeseina e se leoleo mamoe o mamoe ma ʻoti. Ona ia tuuina lea o mamoe i lona itu taumatau, a o ʻoti i lona itu tauagavale.’—Mataio 25:31-33.

Ua fetalai atu Iesu e faatatau i mamoe ua tuuesea i le itu taumatau lea e finagalo malie i ai o ia: “Ona fai atu lea o le tupu i ē o i lona itu taumatau, ʻŌ mai ia outou o ē ua faamanuiaina e loʻu Tamā, ia fai mo outou tofi le malo ua saunia mo outou talu ona faavaeina le lalolagi.’” (Mataio 25:34) Aiseā ua maua ai e mamoe le finagalo malie o le Tupu?

Ua fetalai atu le Tupu: “Na ou fia ʻai ona outou aumai ai lea o se mea ou te ʻai ai; na ou fia inu ona outou aumai ai lea o ni vai ou te inu ai. Na avea aʻu o se tagata ese ona outou talileleia lea o aʻu. Na ou lē lavalavā, ona outou faaofuina lea o aʻu. Na ou maʻi ona outou tausia lea o aʻu. Na ou iai i le falepuipui ona outou asiasi mai ai lea iā te aʻu.” Ina ua fesili atu i latou ua pei o ni mamoe po “o ē e amiotonu,” po o le ā le auala na latou faia ai nei galuega lelei, ae ua tali mai le Tupu: “Auā na outou faia i se tasi o oʻu uso e sili ona faatauvaa, o aʻu lava lea ua outou faia i ai.” (Mataio 25:35, 36, 40, 46) E lē faia nei galuega lelei i le lagi, talu ai e lē o iai ni tagata mamaʻi pe e fia aai i inā. O lona uiga la, e faia nei galuega mo uso o Keriso i luga o le lalolagi.

Ae faapefea ʻoti ia ua tuuesea i le itu tauagavale? Ua fetalai atu Iesu: ʻOna faapea atu lea o le Tupu iā i latou o i lona itu tauagavale, “Inā ō ese atu ia outou iā te aʻu, auā ua faamalaiaina outou i le afi e faavavau ua saunia mo le Tiapolo ma ana agelu. Auā na ou fia ʻai ae tou te leʻi aumai se mea ou te ʻai ai, na ou fia inu ae tou te leʻi aumai ni vai ou te inu ai. Na avea aʻu ma tagata ese, ae e tou te leʻi talileleia aʻu, na ou lē lavalavā ae e tou te leʻi faaofu iā te aʻu, na ou maʻi ma iai i le falepuipui ae e tou te leʻi tausia aʻu.”’ (Mataio 25:41-43) Ua tatau lenei faamasinoga i ē e pei o ni ʻoti, ona e latou te leʻi agalelei i uso o Keriso o loo i luga o le lalolagi, e pei o le auala sa tatau ona feutagaʻi ai ma i latou.

Ua aʻoaʻoina e aposetolo, o le a iai aafiaga tumau o lenei faamasinoga lea o le a faia i le lumanaʻi. Ua fetalai atu Iesu iā i latou: ʻOna faapea atu lea o le Tupu iā i latou, “E moni ou te fai atu iā te outou, Auā na outou lē faia i se tasi o ē sili ona faatauvaa o i latou nei, o aʻu lava lea ua outou lē faia i ai.” Ona ō atu ai lea o i latou nei i le faaumatiaga e faavavau, a o ē e amiotonu e ō atu i le ola e faavavau.’—Mataio 25:45, 46.

E tele mea ua manatunatu loloto i ai soo o Iesu, ona o lana tali i le fesili a ona aposetolo. Ua fesoasoani foʻi iā i latou e toe iloilo ai o latou uiga faaalia faapea a latou gaoioiga.