I luga i te Mauga o Olive, ne fatoa fakamatala atu ne Iesu a te tala fakatusa e uiga ki tamafine e toko sefulu mo taleni. Ne fakaoti atu pefea ne ia tena tali ki te fesili a te kau apositolo e uiga ki fakailoga o tena fakatasi mai mo te gataga o te olaga masei tenei? Ne fai atu ne ia a te ‵toe tala fakatusa, e uiga ki mamoe mo kouti.

Ne kamata o fai ne Iesu se fakatokaga, mai te fai atu ki a latou: “Kafai e vau te Tama a te tagata i tena ‵malu, fakatasi mo ana agelu katoa, ko sagasaga ei a ia ki lalo i tena nofogaaliki ‵malu.” (Mataio 25:31) E seai se fakalotolotolua me i a Iesu, ko te tino tāua i tena tala fakatusa tenei. Ne masani o taku ne ia a ia eiloa ki “te Tama a te tagata.”—Mataio 8:20; 9:6; 20:18, 28.

Ka fakataunu māfea a te tala fakatusa tenei? I te taimi e vau ei a Iesu “i tena ‵malu” fakatasi mo ana agelu, ka sagasaga a ia i luga “i tena nofogaaliki ‵malu.” Ne faipati mai eiloa a ia e uiga ki “te Tama a te tagata e vau i kaumana o te lagi mo tena ‵mana mo tena ‵malu sili” fakatasi mo ana agelu. Ko te taimi fea tenā? “Mai tua malie faeloa o te fakalavelave.” (Mataio 24:29-31; Maleko 13:26, 27; Luka 21:27) Tela la, e fakataunu eiloa te tala fakatusa tenei i te taimi e vau ei a Iesu i aso mai mua mo te ‵malu. Ne a ana mea ka fai i ei?

Ne fakamatala mai a Iesu: “Kafai e vau te Tama a te tagata . . . , Ka fakamaopoopo atu ki ana mua a atufenua katoa, kae ka vaevae ne ia a tino, e pelā eiloa mo te tausi mamoe e ‵vae ne ia a mamoe mai kouti. Kae ka tuku ne ia a mamoe i tena feitu fakaatamai, kae ko kouti i tena feitu fakamaui.”—Mataio 25:31-33.

Ne fai mai a Iesu e uiga ki mamoe, kolā ne ‵vae atu ki tena feitu ‵lei: “Ko fai atu ei te Tupu ki a latou kolā i tena feitu fakaatamai, ‘‵Mai, a koutou kolā ko oti ne fakamanuia ne toku Tamana, ke fai mō koutou te Malo telā ne fakatoka mō koutou talu mai te faitega o te lalolagi.’” (Mataio 25:34) Kaia ne fiafia ei te Tupu ki mamoe?

 Ne fakamatala mai te Tupu: “Me i a au ne fiakai kae ne fagai au ne koutou; au ne fiainu kae ne fainu au ne koutou. Au se fakaalofa kae ne talimalo au ne koutou; ne nofo fuafua kae ne fakapei ne koutou a gatu ki a au. Au ne masaki kae tausi ne koutou au. Au ne ‵pei ki te falepuipui, kae ne asi mai koutou ki a au.” I te taimi ne fesili atu ei a mamoe konei, kolā ko “tino amio‵tonu,” me ne a auala ne fai ei ne latou a mea ‵lei konei, ne tali atu a ia: “Ona ko te mea ne fai ne koutou te mea tenā ki te ‵toe tino fatauva i oku taina konei, ne fai eiloa ne koutou a mea konā ki a au.” (Mataio 25:35, 36, 40, 46) E se fai ne latou a galuega ‵lei konei i te lagi, me e seai ne tino ma‵saki io me ne tino fia‵kai i konā. Ko mea ‵lei konei ne fai ki taina o Keliso i te lalolagi nei.

Kae e a kouti kolā ne tuku atu ki te feitu fakamaui? Ne fai mai a Iesu: “Kae ka fai atu a [te Tupu] ki tino i tena feitu fakamaui: ‘Olo keatea mai i a au, koutou kolā ko oti ne fakamalaiagina ki te afi se-gata-mai telā ne fakatoka mō te Tiapolo mo ana agelu. Me i a au ne fiakai, kae ne seki fagai au ne koutou; au ne fiainu kae seki fainu au ne koutou. Au ne fakaalofa, kae seki talimalo au ne koutou; ne nofo fuafua kae seki fakapei ne koutou au ki gatu; ne masaki kae ‵pei ki te falepuipui kae seki tausi au ne koutou.’” (Mataio 25:41-43) Ne fai penei te fakamasinoga me ne fakata‵mala a kouti o atafai faka‵lei atu ki taina o Keliso i te lalolagi, e pelā mo mea ne ‵tau o fai ne latou.

Ne iloa aka ne te kau apositolo me ka tumau eiloa ki te se-gata-mai a mea kolā ka iku mai i te fakamasinoga tenei i aso mai mua. Ne fai atu a Iesu ki a latou: “Kae ka tali atu a [te Tupu] ki a latou, ana muna: ‘Au e fai ‵tonu atu ki a koutou, ona ko te mea e seki fai ne koutou a mea konā ki se tokotasi o tino fatauva konei, e seki fai foki ne koutou a mea konā ki a au.’ Ka olo atu a latou konei ki te fakaseaiga se-gata-mai, kae ko tino amio‵tonu ki te ola se-gata-mai.”—Mataio 25:45, 46.

E tuku atu ne te tali a Iesu ki te kau apositolo a fakamatalaga e uke ke mafau‵fau ki ei ana soko, telā e fesoasoani atu ke iloilo aka olotou kilokiloga mo faifaiga.