Casi biluxe guníʼ Jesús ejemplu stiʼ chii binnidxaapaʼ ne stiʼ ca talentu lu dani Olivo. Ora gunabadiidxaʼ ca apóstol que laabe xi señal zusihuinni presencia stibe ne dxi guiluxe guidxilayú. ¿Xi últimu gúdxibe laacaʼ? Gúdxibe laacaʼ ejemplu stiʼ ca dendxuʼ ne ca chiva.

Bizeeteʼ Jesús xi zazaaca ora gaca cumplir ejemplu ni gudixhe: «Ora gueeda Xiiñiʼ Hombre né stale autoridad, ne guedané guiráʼ ángel, zabí lu trono nandxóʼ stiʼ» (Mateo 25:31). Zacá bisihuínnibe laabe nga ni chiguzeetebe lu ejemplu riʼ, purtiʼ stale biaje huaniʼbe laabe nga «Xiiñiʼ Hombre» (Mateo 8:20; 9:6; 20:18, 28).

¿Padxí zaca cumplir ejemplu riʼ yaʼ? Zaca ni ora gueeda Jesús «né stale autoridad, ne guedané guiráʼ ángel, zabí lu trono nandxóʼ stiʼ». Maca guniʼbe zeeda Xiiñiʼ Hombre «lu za né stale poder ne gloria», ne zedané ca ángel stiʼ. ¿Padxí guizaaca ndiʼ yaʼ? «Casi peʼ tidiʼ yuubaʼ ni gaca ca dxi que» (Mateo 24:29-31; Marcos 13:26, 27; Lucas 21:27). Nga runi zaca cumplir ejemplu riʼ ora gueeda Jesús lu gloria stiʼ. ¿Xi chigúnibe ora gueedabe yaʼ?

Bisiene Jesús ora gueeda Xiiñiʼ Hombre: «Zaca reunir guiráʼ guidxi nezalube, ne zabeechube caadxi binni lade xcaadxi, cásica ribeechú pastor dendxuʼ lade chiva. Zaguube ca dendxuʼ ladu derechu stibe, peru ca chiva ladu bigaʼ» (Mateo 25:31-33).

¿Xi zazaaca ca dendxuʼ yaʼ? Jesús bisiene: «Óraque zabi Rey que ca ni nuu ladu derechu stiʼ: “Latáʼ, laatu ca ni maʼ guluu Bixhozeʼ ndaayaʼ, laguicaa Reinu ni maʼ nexheʼ chaahuiʼ para laatu dede dxi gule binni lu guidxilayú”» (Mateo 25:34). ¿Xiñee sicaríʼ guníʼ Rey riʼ de ca dendxuʼ?

Rey peʼ riʼ bisiene: «Purtiʼ bidiitu ni gudahuaʼ dxi candaanaʼ. Bidiitu nisa güeeʼ dxi cayateʼ nisa. Bidxaagalutu naa ra lídxitu, neca qué runibiaʼtu  naa. Bigácutu naa lari dxi nuaaʼ xieeladeʼ. Gúpatu naa dxi gucaʼ huaraʼyaʼ. Yegánnatu naa dxi bieguayuaaʼ». Óraque gunabadiidxaʼ ca dendxuhuiiniʼ o «ca ni nachaʼhuiʼ», padxí bíʼnicaʼ ca cosa riʼ, ne zacabi Rey que laacabe: «Dxandíʼ peʼ cayabeʼ laatu, guiráʼ ni bíʼnitu pur tobi de ca bicheʼ ni jma nahuiiniʼ, bíʼnitu ni naa» (Mateo 25:35, 36, 40, 46). Nánnanu cadi guibáʼ bíʼnicabe ca cosa riʼ purtiʼ guirutiʼ rindaana guibáʼ ne guirutiʼ raca huará. Nga runi ni caníʼ Jesús nga ni bíʼnicabe pur ca biʼchiʼ ni nuu lu Guidxilayú.

¿Xi zazaaca ca chiva, ni guluu Jesús ladu bigaʼ stiʼ yaʼ? Laapebe guniʼbe: «Óraque zábibe ca ni zuhuaa ladu bigaʼ: “Laguixeleʼ de naa, laatu ca ni maʼ guca maldecir. Laché lu bele ni qué ziuu dxi guizuíʼ ni maʼ guca preparar para Binidxabaʼ ne ca ángel stiʼ. Purtiʼ qué nudiitu ni ñahuaʼ dxi candaanaʼ. Ne qué nudiitu nisa ñeeʼ dxi cayateʼ nisa. Qué nidxaagalutu naa ra lídxitu neca qué runibiaʼtu naa. Qué nugácutu naa lari dxi biaanaʼ xieeladeʼ. Qué ñápatu naa dxi gucaʼ huaraʼyaʼ ne dxi bieguayuaaʼ”» (Mateo 25:41-43). Runi merecer ca chiva castigu riʼ purtiʼ qué ñácacaʼ nachaʼhuiʼ né ca biʼchiʼ Cristu, casi biʼniʼ mandarbe laacaʼ gúnicaʼ.

Bidii ca apóstol que cuenta, castigu ni chicaa ca chiva que zácani para siempre ne ca ndaayaʼ chicaa ca dendxuʼ que laaca zácani para siempre. Sicaríʼ bisiene Jesús ni: «Óraque zacábibe [Rey que] laacaʼ: “Dxandíʼ peʼ cayabeʼ laatu, ni qué ñúnitu pur tobi de ca bicheʼ ni jma nahuiiniʼ la? qué ñúnitu ni naa”. Ca ndiʼ nga ni chiguinitilú ne maʼ qué ziuuruʼ dxi guibánicaʼ, peru ca ni nachaʼhuiʼ la? zápacaʼ guendanabani ni qué zaluxe”» (Mateo 25:45, 46).

Modo bicabi Jesús ni gunabadiidxaʼ ca apóstol stiʼ laa lu dani Olivo que, rucaani ca xpínnibe guiníʼ íquecaʼ modo nácacaʼ ne pa cayúnicaʼ ni jneza.