Zezi w’a wie i akoto nnan’n be like kle Olivie oka’n su lɔ. Be usɛli i like ng’ɔ́ klé kɛ ɔ lɛ’n ɔ nin mɛn’n i awieliɛ’n i nzɔliɛ’n be su ndɛ. Kpɛkun ɔ tɛli be su.

Ɔ yoli ninnge kpanngban Nizan i le blu-nin-kun (11) sɔ’n nun. I sin’n, ɔ nin i akoto’m be ko lali Betanin. Kɛ bé kɔ́’n, ɔ seli be kɛ: “Amun si kɛ ɔ ka cɛn ba nɲɔn Delɛ cɛn’n jú. Bé wá fá Sran wa’n bé wlɛ́ i sran’m be sa nun, naan be kun i waka’n su.”​—Matie 26:2.

Nizan i le blu-nin-kun (11) sɔ’n ti Jɔlɛ cɛn. Cɛn sɔ’n nun’n, Zezi yiyili Farizifuɛ nin mmla klɛfuɛ’m be bo sran’m be kwlaa be ɲrun. I sɔ’n ti’n, be kunndɛli kɛ bé kún i. Ɔ maan w’a yimɛn i wun nglo Nizan i le blu-nin-nɲɔn’n (12) nun. Kpɛkun Nizan i le blu-nin-nsan’n (13) m’ɔ ti Mlan cɛn’n, ɔ nin i akoto’m b’a tuman be bo. I liɛ’n, kɛ Nizan i le blu-nin-nnan’n (14) sɛnzɛ’n ko tɔ’n, m’ɔ nin i akoto’m bé kó di Delɛ cɛn’n, sran fi su kleman be yalɛ.

Ɲanmiɛn ɲrun jranfuɛ’m be su kpɛn mun nin nvle su kpɛn’m be liɛ’n, be tran diin-ɔn, ɔ yoman ye. Yɛle kɛ ka naan Delɛ cɛn’n w’a ju’n, be yiali Kaifu m’ɔ ti Ɲanmiɛn ɲrun jranfuɛ dan’n, i awlo lɔ. ?Ngue ti-ɔ? Afin Zezi yiyili be bo. Yɛ i sɔ’n yoli be ya dan. I sɔ’n ti’n, be ko tili be wun aniɛn naan “bé fá gblɛ bé trá Zezi naan bé kún i.” ?Wafa sɛ yɛ bé yó i sɔ-ɔ? ?Yɛ blɛ benin nun yɛ bé trɛ́ i bé kún i-ɔ? Be seli kɛ: “Nán maan ɔ yo cɛn dilɛ’n nun. Sɛ ɔ yo sɔ’n, sran’m bé trí.” (Matie 26:4, 5) Ɔ maan srɛ kunnin be. Afin sran kpanngban be klo Zezi i sa.

Sanngɛ sran kun ɔli Zuifu’m be Ɲanmiɛn sulɛ wafa’m be su kpɛnngbɛn’m be wun wunlɛ. Sran sɔ’n yɛle Zida Iskariɔti. Zezi i akoto’m be nun kun-ɔn. Nanwlɛ, i sɔ’n boli kpɛnngbɛn sɔ’m be nuan dan. Zida ɔli be wun wunlɛ afin Satan fali akunndan kun wlɛli i klun. Yɛle kɛ Zida fɛ i Min Zezi man be! Ɔ maan Zida usali be kɛ: “?Sɛ n fɛ i n man amun’n, ngue yɛ  amún mán min-ɔn?” (Matie 26:15) Kɛ be tili i sɔ’n, ɔ yoli be fɛ dan. I sɔ’n ti’n, “be nuan sɛli su kɛ bé mɛ́n i sika.” (Liki 22:5) ?Be waan bé mán Zida nɲɛ? Be waan bé mɛ́n i jɛtɛ ufue ablasan (30). Blɛ sɔ’n nun’n, sran’m be yo kanga atɛ jɛtɛ ufue ablasan. (Lɔ Tulɛ 21:32) Ɔ maan kpɛnngbɛn sɔ’m be kleli kɛ be buman Zezi i like fi. Afin sika nga be nuan sɛli su’n ti kaan sa. Kɛ ɔ fɛ i lɛ’n, Zida “kunndɛli blɛ kpa kun mɔ sran kpanngban nunman lɛ’n naan ɔ́ fɛ́ i mán be.”​—Liki 22:6.

Nizan i le blu-nin-nsan’n (13) tɔli Mlan cɛn. Kɛ sɛnzɛ’n tɔli’n yɛ cɛn sɔ’n boli i bo-ɔ. Cɛn sɔ’n nun’n, Zezi nin i akoto’m be lali Betanin lɔ kɔnguɛ ekun. Kɔnguɛ kasiɛn nga be dili i lɔ’n yɛ ɔ o lɛ-ɔ. I aliɛ m’ɔ́ cɛ́n m’ɔ ti Wue cɛn’n, ɔ ti Nizan i le blu-nin-nnan (14). Cɛn sɔ’n nun yɛ ɔ fata kɛ sran’m be wie be wun siesie naan b’a di Delɛ cɛn’n niɔn. Yɛle kɛ ɔ fata kɛ be kunndɛ bua kun, be kpɛ i kɔmin, kpɛkun be ɲintɔn. Kɛ Nizan i le blu-nin-nnan’n (14) ko bo i bo’n yɛ be yo i kwlaa sɔ’n niɔn. ?Nin yɛ Zezi nin i akoto’m bé kó dí Delɛ cɛn aliɛ’n niɔn? ?Yɛ wan yɛ ɔ́ tɔ́n like mán bé-ɔ? Zezi w’a kɛnmɛn i ndɛ. Ɔ maan Zida w’a kwlá kanman w’a kleman Ɲanmiɛn ɲrun jranfuɛ’m be su kpɛn mun.

Atrɛkpa’n, Wue cɛn nnɔsua wia nun’n, Zezi sunmannin Piɛli nin Zan. Ɔ seli be kɛ: “An wɔ ko tɔn Delɛ cɛn aliɛ’n man e naan e di.” Be seli i kɛ: “?Lika onin nun yɛ a kunndɛ kɛ e wɔ naan e ko tɔn-ɔn?” Ɔ seli be kɛ: “Kɛ amún wlú klɔ’n nun lɔ’n, amun nin bian kun mɔ w’a sua nzue sɛ kun’n, bé wá yía. Amun su i su. Sua ng’ɔ́ wlú nun’n, amun wlu lɔ wie. Kpɛkun amun se awlo’n i fuɛ’n kɛ, ‘Like klefuɛ’n waan e usa ɔ kɛ: “?Sua ba nga a sike aofuɛ nun mɔ min nin min sɔnnzɔnfuɛ mun e kwla di Delɛ cɛn’n i nun’n, ɔ o nin?”’ Bian’n wá klé amun sua ba dan kun. Ɔ o nglo lɔ, like kwlaa o nun. Amun tɔn aliɛ’n i lɔ.”​—Liki 22:8-12.

Awlo i fuɛ’n ti Zezi i sɔnnzɔnfuɛ. Atrɛkpa’n, ɔ seli i wun kɛ cɛn kun’n, Zezi wá sé i kɛ ɔ fɛ i sua’n mɛn i naan ɔ di Delɛ cɛn’n nun. Kɛ Zezi i akoto nɲɔn’m be ɔli’n, be wunnin kɛ ɔ yoli kɛ nga Zezi kan kleli be’n sa cɛ.” Ɔ maan be ɲintɔnnin bua’n, kpɛkun be siesieli ninnge uflɛ wie mun ekun naan be sran blu-nin-nsan’n (13) be di Delɛ cɛn aliɛ’n.