Yésus a maneya ye’ele minlômane mié minyin e Nkôle Beolivier; a te ve be éyalane ya nsili ba te sili nye a lat a éyoñ a ye jôé, a asu’ulane ya nta’ane mame wu.

Môse Nisan 11 ô mbe njalan a bisaé! Éko éziñ a ne éyoñe ba bulane Béthanie nde Yésus a kate minlômane mié na: “Mia yeme na éyoñe môse mibaé mi lôteya, Pâque a ye boban, a mona môt a ye koñeban asu ya na a tyeléban [élé].”​—Matthieu 26:2, Mfefé Nkôñelan.

Yésus a yiane lôte môse wo tôé valé, môse nté wua, évôvoé été a minlômane mié. E môse tusedé, a nga komekane betebe ôsu ya miñyebe a kulane fe mimboone miap e bôt été. Éyoñe ji, ba jeñe na be wôé nye. Amu nalé, a nji yi na be yene nye môse Nisan 12; jam éziñ é nji yiane kamane nye na a di Pâque a minlômane mié ngô’é ya môs ôvok, éyoñe jôp da ye dim, nge na, atata’a ya môse Nisan 14.

Ve jame da, bivete beprêtre a bemvendé y’ayoñ be nji tabe ne mieññ ôsusua na Pâque a boban. Ba sulan nseñe ya beta prêtre Caïphe. Na be bo jé? Ba wô’ô abé amu Yésus a te kulane be e bôt été. Éyoñe ji, bese ba bôndé fe’e ya “bi Yésus e mvôle yôp a wôé nye.” Ba ye ñhe bo de aya a éyoñ évé? Ba jô na: “Saa ke éyoñ abôk é né, éngôngôm é za boban e be bôt.” (Matthieu 26:4, 5, Mfefé Nkôñelan) Ba ko woñ amu jama bôt a nye’e Yésus.

Nté ba fas jam ete, betebe ôsu ya ñyebe ba bi nneñ. Bese be ne fe’e ne vema, amu a ne nlômane wua ya minlômane mi Yésus, wu ba loone na Judas Iscariot. Satan a te futi nye ôsimesane na a ke koñe Yésus! Nde Judas a sili be  na: “Mi aye ve me jé me koñe mia nye?” (Matthieu 26:15) A meva’a mese ba “kui tyiñe na ba ye ve nye moné.” (Luc 22:5, Mfefé Nkôñelan) Ba ye ve nye tañeya? Ba vak a kañese ve nye bifase bi argent 30. É ne mfi ya yeme na moné ate a kui tañe moné ba kus ôlo, besikel 30. (Nkôlan 21:32) Betebe ôsu ba liti valé abim ébiasé ba biasé Yésus; e mise map a nji bi mfi éziñ. Ane Judas a taté na a “jeñe mbamba éyoñ a ne kalane be Yésus jama bôt teke yem.”​—Luc 22:6, Mfefé Nkôñelan.

Môse Nisan 13 wo taté e môse nté wua, éyoñe jôp da dim. A ne fe alu samane Yésus a kandane lôt e Béthanie. Mame tyé ba yiane taté na ba kômesane vôm ba ye di Pâque. Ba yiane jeñe na be bi mone ntômba a wôé nye a yame nye ngum, éyoñe môse Nisan 14 ô tatéya. Nne ba ye nyoñe bidi vé, a za a ye bie yam? Yésus a nji kate be mam mete. Ajô te Judas a vo’o kui na a kate de bemie beprêtre.

Éko éziñ, nné ane zañe môse ya môse beletô é lôteya, Yésus a lôme Pierre ba Jean e Béthanie, a jô be na: “Kela kômane bia Pâque, nalé ate bia ye di nye.” Ba yalan a jô na: “Wo kômbô na bi kôme nye vé?” Yésus a jô be na: “Mi lôô éyoñ mi nyiineya e tison, môt éziñ a be’e nde’e mendim a ye tôbane mia; tôñane nye e nda mia ye yen a nyi’in, a mia ye jô mie ndaa na: Masa a jô wo na: Aba nda bia be beyé’é bam bia ye di Pâque e ne vé? A a ye liti mia beta étune nda yôp, é too nkôman, e nne mia ye kôme Pâque valé.”​—Luc 22:8-12, Mfefé Nkôñelan.

Teke fo’o bisô na, mie ndaa a ne ñyé’é Yésus. Eko éziñ a yemelaneya na Yésus a kômbô belane nda jé asu jam ete. Éyoñe minlôman mibaé mia kui Jérusalem, mia koone na, mam mese ma boban fo’o ve aval Yésus a te be jô. Nde, ba yene na be maneya kômesan mone ntômba a na, mam mese me nto valé asu Yésus a minlômane mié 12 na mi di Pâque.