Iesu a ase hamë ini kowe lo foa lao aposetolo hune la Wetr Elaio, me sa la hnyinge i angatr göi ijine celë hë nyidrë, me ijine nyipune la fene celë.

Tha fene drai kö la 11 Nisan! Nge ma heji lapa ha la angatr a bëeke a tro Bethania, nge öni Iesu koi angatr: “Atre hi nyipunie laka, lue drai pe hi matre feetëne jë la Paseka, nge tro ha nue la Nekö i atr me jei faonyi angeic hune la sinöe ne iaxösisi.”—Mataio 26:2.

Kola mekune laka, Iesu casi me itretre dreng la drai thupen, lo Draihnacian. Ngo e Draiangedic, hnei nyidrë hna wesitrë itre hene ne hmi, me amamane la thiina i angatr. Matre angatr a thele jëne troa humuthi nyidrë. Ngo tha tro iamamanyi kö nyidrë la drai 12 Nisan, wanga ajolë nyidrëti jë troa feetëne la Paseka me itre aposetolo, e heji ne 14 Nisan thupene la kola lö la jö.

Ngo tha lapa hnyawa kö la itretre huuj, me itre qatre ne la nöj qëmekene la Paseka. Angatr a icasikeu ngöne la götrane ka pë ihakun ne la hnalapa i Kaiafa, atre huuje ka sisitria. Göi nemen? Angatr a elëhni pine Iesu qaja amamane la thiina i angatr. Matre enehila, angatr a thele jëne troa “traa thethi Iesu, matre xolouth me humuthi nyidrë.” Ngo eu, nge tune kaa? Öni angatr: “Tha tro kö a kuca lai ngöne la ijine feet, ke wanga hetre icilekeu jë nyipine la ka ala nyim.” (Mataio 26:4, 5) Angatr a xou, ke kola kepe Iesu hnene la ka ala nyim.

Ngo utra xulu pi la ketre atr. Angatr a sesëkötr ke ketre aposetolo i Iesu hi, Iudra Isakariota. Hnei Satana hna amë e kuhu hni angeic troa salemëne la Maseta i angeic! Matre öni Iudra jë hi: “Nemene la hnei nyipunieti hna troa hamë ni e tro ni a nue Iesu koi nyipunie?”  (Mataio 26:15) Tha fene madrine kö angatr, matre angatr a axeciëne troa hamë angeic la “itre manie sileva.” (Luka 22:5) Ijetre? Angatr a ce axeciën troa hamëne la thupene la hlu, 30 lao piese sileva. (Esodo 21:32) Qa ngöne lai, kola mama la imethinë ne la itre hene ne hmi koi Iesu, ke ame koi angatr, ka pë pengöne la mele i nyidrë. Matre qaane ju hi lai, Iudra a “nyiqaane thupëne la ijine patre la ka ala nyimu matre nue nyidrë koi angatr.”—Luka 22:6.

Kola ha nyiqaane la drai 13 Nisan e Draihnacian, thupene la kola lö la jö. Nge hnaasikisine heji hë, heji tixenuë i Iesu me itretre dreng e Bethania. Ngöne la drai thupen, tro ha afenesine la itre hna hnëkëne göi Paseka. Troa itö neköi mamoe, me kulumath, me atron qëmekene troa nyiqaane la drai 14 Nisan. Tro angatr a xeni ekaa? Nge drei la ka hnëkën? Tha qaja pi kö Iesu, wanga iqejiqeji jë Iudra.

Nge ame hë la kola nyiqaane la hnaipajö ne Draikaco, Iesu a upi Peteru jë me Ioane troa tro qa Bethania. Öni nyidrë: “Tro jë, nge hnëkëne jë la Paseka matre tro së a xen.” Öni nyidroti jë hi: “Nyipëti a ajane tro nyio a hnëkën ekaa?” Sa jë hi Iesu ka hape: “Ame la epon a lö kowe la traon, tro epon a ixelë memine la ketre trahmanyi ka ajö trengene tim, xötrethenge angeice jë kowe la uma hnei angeic hna troa lö kow. Nge qaja ju kowe lai atrekë uman ka hape: ‘Önine la Atre Ini: “Ekaa la hnahag hnë tro ni me itretre dreng a xeni la Paseka?” ’ Tro hë angeice lai a amamai epon la ketre hnahag ka tru e koho hun, ka hetre alien nge hna hnëkëne hë. Haawe, hnëkëne jë hë e cili.”—Luka 22:8-12.

Ma ketre atre drei Iesu la atrekë hnalapan. Nge ma atre hë angeic ka hape, tro Iesu a sipone la uma i angeic troa feetëne la Paseka. Matre ame la Peteru me Ioane a lö e Ierusalema, traqa ju hi nyidroti a öhne la nöjei ewekë hna qaja hnei Iesu. Tro hë la neköi mamoe, nge ase hë hnëkëne la nöjei ewekë thatraqane la Paseka, koi Iesu memine la 12 lao aposetolo.