Jesus ndisụk n̄kpep apostle inan̄ oro n̄kpọ mma edi oro ke Obot Olive. Enye onyụn̄ ọbọrọ se mmọ ẹkebụpde ẹban̄a edidu esie ke ini iso ye akpatre ini editịm n̄kpọ emi.

Enye anam ekese ke Nisan 11 emi! Etie nte ini emi mmọ ẹnyọn̄de Bethany ke enye ọdọhọ mme apostle esie ete: “Mbufo ẹmefiọk ẹte usen iba osụhọ passover ọmọn̄ ada itie, ẹyenyụn̄ ẹyak Eyen owo ẹnọ ẹte ẹkọn̄ ke eto.”—Matthew 26:2.

Etie nte Jesus ikaha ebiet ndomokiet ke ndan̄nsiere emi edide Wednesday; enye odu ye mme apostle esie. Ke Tuesday, enye ama asua ọnọ mme adaiso ido ukpono onyụn̄ ayarade mbubịk mmọ. Mmọ ke ẹyom usụn̄ ndiwot enye, ntre enye iyakke mme owo ẹdiọn̄ọ ebiet emi enye odude ke Nisan 12 man n̄kpọ ndomokiet okûkpan enye ndidia Passover ye mme apostle esie ke mbubreyo emi Nisan 14 ọtọn̄ọde.

Edi mbọn̄ oku ye mbiowo mme Jew idopke-dop itie mbemiso usen Passover oro. Mmọ ẹsop idem ke okụre Caiaphas emi edide akwa oku. Nso ke mmọ ẹnam do? Esịt ayat mmọ nte Jesus akayararede mbubịk mmọ. Idahaemi mmọ ẹdụk ediomi “ndida n̄kari mmụm Jesus n̄wot.” Mmọ ẹdisan̄a didie imụm enye, ndien ini ewe ke mmọ ẹdimụm enye? Mmọ ẹdọhọ ẹte: “Yak okûdi ke ini usọrọ, mbak ndutịme edidu ke otu mme owo.” (Matthew 26:4, 5) Ndịk ananam mmọ koro ediwak owo ẹma Jesus.

Nte mmọ ẹsụk ẹdude do, esenowo odụk. Idem akpa mmọ sia esenowo emi edi Judas Iscariot, apostle Jesus. Satan anam enye oyom ndida Eteufọk esie nnọ! Judas obụp mmọ ete: “Nso ke mbufo ẹdinọ mi man nda enye nnọ mbufo?” (Matthew 26:15) Esịt enem mmọ, mmọ ẹnyụn̄ “ẹnyịme ndinọ enye okụk silver.” (Luke  22:5) Edi okụk ifan̄ ke ẹnyịme ndinọ enye? Mmọ ẹnyịme ndinọ enye mbak silver 30. Okụk emi enyene se ọwọrọde koro ẹkesinyam ifịn ke shekel 30. (Exodus 21:32) Mme adaiso ido ukpono ndikpe utọ okụk emi ọwọrọ ke mmọ idaha Jesus ke n̄kpọ ndomokiet. Ntem Judas ọtọn̄ọ “ndiyom eti ifet ndida enye nnọ mmọ ke ini otuowo mîdụhe ikpere.”—Luke 22:6.

Nisan 13 ọtọn̄ọ ke utịn ama okosụhọde ke Wednesday. Ọyọhọ usen itiokiet ye akpatre usen emi enye odude ke Bethany edi emi. Ke ndan̄nsiere, mme mbet ẹyenam se ededi emi okosụhọde ndida ntịm idem nnọ Passover. Ana ẹdep eyenerọn̄, ẹwot, ẹnyụn̄ ẹfọp ke Nisan 14 ama ọkọtọn̄ọ. Jesus itịn̄ke kan̄a ebiet emi ẹdinịmde Passover ye owo emi editịmde n̄kpọ iben̄e. Ntem Judas idiọn̄ọke, inyụn̄ inyeneke se emende eketịn̄ ọnọ mbọn̄ oku.

Etie nte uwemeyo Thursday ke Jesus etie ke Bethany ọdọn̄ Peter ye John utom ete: “Ẹka ẹketịm passover ẹben̄e ẹnịm ẹnọ nnyịn man nnyịn idia.” Mmọ ẹbụp enye ẹte: “M̀mọ̀n̄ ke afo oyom nnyịn itịm n̄kpọ iben̄e inịm?” Jesus ọbọrọ mmọ ete: “Ke ini mbufo ẹdụkde obio, owo kiet emi obiomde aban̄ mmọn̄ oyosobo ye mbufo. Ẹtiene enye ẹdụk ufọk emi enye edidụkde. Mbufo ẹnyụn̄ ẹdọhọ enyeneufọk oro ẹte, ‘Andikpep ọdọhọ fi ete: “Ubet isen emi ami ndidiade passover ye mme mbet mi odu m̀mọ̀n̄?”’ Ndien owo oro oyowụt mbufo akwa ubet enyọn̄ emi ẹbanade. Ẹtịm n̄kpọ do ẹben̄e.”—Luke 22:8-12.

Anaedi enyeneufọk oro edi mbet Jesus. Onyụn̄ ekeme ndidi enye ama ọdiọn̄ọ ke Jesus ayada ufọk imọ enịm Passover. Ke ini apostle iba emi ẹsịmde Jerusalem, kpukpru n̄kpọ edi kpa nte Jesus eketịn̄de. Mmọ ẹkụt ke ẹma ẹwot eyenerọn̄, ẹnyụn̄ ẹbon mme n̄kpọ eken emi ẹdikemde owo 13, oro edi Jesus ye apostle 12, ndida nnịm Passover.