Sa vakacavara o Jisu nona vakavulici ratou voli na va na yapositolo ena Ulunivanua ni Veiolive, a sauma kina nodratou vakatataro me baleta na nona tiko ena gauna se bera mai kei na icavacava ni veika vakavuravura.

Levu sara na ka e vakaogai koya kina o Jisu ena ika11 ni Naisani! Ni ratou sa rairai lesu tiko i Pecani, e qai kaya o Jisu vei ratou na yapositolo: “Dou kila ni sa vo ga e rua na siga me vakayacori na Lakosivia, oti sa na qai soli yani na Luve ni tamata me vakamatei ena kau.”—Maciu 26:2.

Ena siga tarava, oya na Vukelulu, e toka voli ga o Jisu kei ratou na nona yapositolo. A cudruvi ira na iliuliu ni lotu ena Tusiti qai vakatakilai ira e matanalevu. O ira qori era via vakamatei koya tiko. E sega gona ni vakaraitaki koya e matanalevu ena ika12 ni Naisani, me rawa ni solevutaka kei ratou na nona yapositolo na Lakosivia ni dromu na siga ena yakavi ni siga tarava ena ika14 ni Naisani.

Sa voleka na Lakosivia, ia e sega ni cegu nodra sasaga na iliuliu ni bete kei ira na qase. Era soqoni yani ena nona rara ni vale na bete levu o Kaiafa nira rarawataka nona vakatakilai ira voli o Jisu. Era sa qai bosea vata “vakailawaki mera vesuki Jisu ra qai vakamatei koya.” Gauna cava era na cakava kina qori? Era na cakava tale ga vakacava? Era kaya: “Meda kua ni vakayacora ena gauna ni soqo de ra vakatubuca na lewenivanua.” (Maciu 26:4, 5) Io, era lomaleqa ni levu era taleitaki Jisu.

Era kurabuitaka na iliuliu ni lotu ni lai raici ira yani o Jutasa Isikarioti, dua sara ga vei ratou na yapositolo i Jisu. Sa rawai koya o Setani me soli nona Turaga! E tarogi ira sara na iliuliu ni lotu o Jutasa: “Na cava oni na solia vei au keu soli koya vei kemuni?” (Maciu 26:15) Dua na ka nodra  marautaka qori, ra “vakadonuya sara mera solia vua na ilavo siliva.” (Luke 22:5) Era duavata me soli vua e 30 na tikinisiliva. Na isau ni dua na bobula e 30 na sikeli. (Lako Yani 21:32) Era beci Jisu na iliuliu ni lotu nira nanuma ni tawayaga. Sa “qai waraka voli [o Jutasa] e dua na gauna vinaka me soli Jisu kina vei ira, mera kua ni kila na lewenivanua.”—Luke 22:6.

E tekivu na ika13 ni Naisani ni dromu na siga ena Vukelulu, e iotioti ni bogi i Jisu e Pecani. Ena vakayacori ena siga tarava na veika e se vo me vakarautaki me baleta na Lakosivia. Ena vaqarai e dua na lami me vakamatei qai vavi taucoko ni sa tekivu na ika14 ni Naisani. Ena vakayacori e vei na solevu? O cei ena vakarautaka? A sega ni vakamatatataka qori o Jisu, sega ni rawa ni lai tukutuku kina o Jutasa vei ira na iliuliu ni bete.

E rairai talai rau o Pita kei Joni o Jisu mai Pecani ena yakavi ni Lotulevu, e kaya: “Drau lako drau lai vakarautaka na kakana ni Lakosivia me datou kania.” Erau kaya: “I vei oni vinakata me keirau lai vakarautaka kina?” E tukuna o Jisu: “Ni drau curu ina koro, drau na sota kei na dua na tagane e colata tiko e dua na saqa wai, drau muri koya sara ina vale e curu kina. Mo drau tukuna vua na itaukeinivale, ‘E tukuna mai na Qasenivuli: “I vei na rumu ni vulagi meu vakayagataka kina na kakana ni Lakosivia kei ratou noqu tisaipeli?”’ Ena qai vakaraitaka vei kemudrau o koya na rumu levu ena tabavale e cake e sa vakaiyaya tu. Drau lai vakarau kina.”—Luke 22:8-12.

E tisaipeli tale ga i Jisu na itaukeinivale. Sa rairai kila rawa tu ni na via vakayagataka o Jisu nona vale me baleta na solevu. Ni rau yaco i Jerusalemi na yapositolo, e sa tu kece sara ga na ka e tukuna vei rau o Jisu. Erau vakarautaka sara na lami kei na so tale na ka e vinakati me ratou solevutaka kina na Lakosivia o Jisu kei na 12 nona yapositolo.