Jesus baru udah ngajar empat iku rasul iya ba atas Bukit Kana. Maya nya, iya nyaut tanya sida pasal tanda iya deka pulai baru enggau tanda pengujung dunya tu.

11 Nisan nya hari ti amat kisuk ba Jesus. Ba hari nya, sida bejalai ngagai Betani laban deka bemalam dia. Engka ba maya nya, Jesus madah ngagai bala rasul iya: “Kita nemu, Pengerami Paska deka belabuh dua hari da agi, lalu Anak Mensia deka diserahka ngagai munsuh ngambika diukum bunuh ba tiang.”—Matthew 26:2.

Ba hari siti, iya nya Hari Tiga, Jesus meri awak begulai enggau bala rasul iya aja. Sehari sebedau nya, Jesus ngutuk bala tuai pengarap lalu mantaika penyai sida ba mua orang mayuh. Nya alai, sida deka munuh iya. Nya meh kebuah iya enda ngagai endur orang mayuh maya 12 Nisan, ngambika nadai utai ulih nagang iya ngintu Pengerami Paska enggau bala rasul iya kena 14 Nisan.

Tang bala tuai imam enggau bala tuai bansa orang Judah begelumu sebedau Pengerami Paska. Sida baum ba laman rumah imam besai, Kaiapas. Nama kebuah? Tu ketegal sida berasai ringat laban Jesus mantaika penyai sida ngagai orang mayuh. Sida deka “ngena pemula ngambika ulih nangkap Jesus lalu munuh iya.” Taja pia, baka ni sereta kemaya sida deka ngereja nya? Ku sida: “Anang nangkap iya maya pengerami, enggaika orang begau.” (Matthew 26:4, 5) Sida takut laban mayuh orang rinduka Jesus.

Lebuh maya nya, Judas Iskariot betemu enggau bala tuai pengarap nya. Sida berasai tekenyit laban iya siku ari bala rasul Jesus. Sitan udah nyimpan pengingin dalam ati iya ngambika iya sanggup nyerahka Tuan iya ngagai sida! Nyadi  Judas nanya sida: “Nama utai ti deka diberi kita ngagai aku enti aku nyerahka Jesus ngagai kita?” (Matthew 26:15) Sida gaga ati ninga Judas munyi nya, lalu “besetuju deka meri iya duit pirak.” (Luke 22:5) Berapa penyampau duit ke deka diberi sida ngagai iya? Sida deka meri iya 30 singkap duit pirak. Penyampau nya sama rega enggau siku ulun. (Pemansut 21:32) Enggau nya, bala tuai pengarap nunjukka sida ngumbai Jesus enda berega. Nya alai, Judas berengkah “begigaka peluang ti manah kena nyerahka Jesus ngagai sida enggau chara belalai ngambika enda ditemu orang mayuh.”—Luke 22:6.

13 Nisan berengkah lebuh mata panas padam ba Hari Tiga, lalu nya meh malam ti penudi Jesus diau ba Betani. Sehari pengudah nya, sida patut nyediaka semua utai ke diguna kena ngintu Pengerami Paska. Taja pia, dini alai sida deka makai begulai, lalu sapa ke deka nyayat enggau manggang anak bedus ke diguna sida ngintu Pengerami Paska sebedau 14 Nisan berengkah? Jesus nadai meri nama-nama penerang ngagai bala rasul iya. Nya alai, Judas enda ulih madahka nama-nama utai ngagai bala tuai imam.

Pengudah nya engka lebuh tengah hari, Hari Empat, Jesus meri pesan tu ngagai Peter seduai John: “Mupuk seduai lalu sediaka pemakai kena kitai ngintu Pengerami Paska.” Sida lalu nyaut iya: “Dini nuan deka kami nyediaka utai nya?” Ku Jesus nerang ngagai sida: “Lebuh seduai tama ngagai Jerusalem, siku lelaki ke mai kebuk ai deka betemu enggau seduai. Titihka iya ngagai rumah ti endur iya tama. Udah nya sebut ngagai orang ke bempu rumah nya, ‘Pengajar nanya nuan: “Dini alai bilik temuai endur aku ulih makai maya Pengerami Paska enggau bala murid aku?”’ Lalu iya deka nunjukka seduai siti bilik besai ba tingkat atas ke udah disedia lalu tau dikena. Sediaka pemakai Pengerami Paska ke kitai ba dia.”—Luke 22:8-12.

Orang ke bempu rumah nya tentu murid Jesus. Iya engka nemu Jesus deka ngena rumah iya ngintu Pengerami Paska. Lebuh Peter enggau John datai ba Jerusalem, seduai iya beratika semua utai amat nyadi baka ke dipadah Jesus. Nya alai, seduai iya nyediaka anak bedus sereta utai bukai ke diguna ngambika Jesus enggau 12 iku rasul iya ulih ngintu Pengerami Paska.