Jesus okwa hangwa a mana okuhonga ovayapostoli vaye vane kOmhunda yEemono, eshi a nyamukula epulo lavo li na sha nokukala po kwaye nosho yo lexulilo lounyuni.

Omafiku 11 Nisan, omwa li omalipyakidilo mahapu. Otashi dulika Jesus novayapostoli vaye va li tava shuna kuBetania oufiku oo, eshi e va lombwela a ti: “Omu shi shii kutya okudja paife oku na omafiku avali opo ku danwe Opaasa, nOmona womunhu ota ka yandjwa a valelwe komuti.” — Mateus 26:2.

Mefiku la landula ko, mEtitatu, Jesus okwa li ashike a uhala novayapostoli vaye. MEtivali, okwa li a hanyena ovawiliki vomalongelokalunga nokunyaneka pomutenya oihelele yavo moipafi yovanhu. Ova li tava kendabala oku mu dipaa. Ashike ka li e liholola momafiku 12 Nisan opo paha kale oshinima tashi mu imbi a dane Opaasa pamwe novayapostoli vaye ngeenge etango la ningine eshi 14 Nisan taa hovele.

Ovapristeri ovakulunhu novakulunhu voshiwana ova kala nokuninga eenghendabala ofimbo Opaasa inai fika. Ova li va ongala moshihale shomupristeri munene, Kajafas. Omolwashike mbela? Ova li va handuka molwaashi Jesus okwa kala nokunyaneka pomutenya oihelele yavo. Ova li va “kundafana va kwate po Jesus moku mu ningifa a popye sha sha puka opo va dule oku mu dipaa.” Ongahelipi nonaini va li tave ke shi ninga? Ova ti: “Inatu mu kwata po pefimbo loshivilo opo paha holoke epiyaano mokati kovanhu.” (Mateus 26:4, 5) Ova li va tila molwaashi ovanhu vahapu ova li va fimaneka Jesus.

Pomhito oyo, ovawiliki vomalongelokalunga ova li va mona omweenda. Ova li va kumwa molwaashi omweenda oo a li e uya oku va talela po okwa li umwe womovayapostoli vaJesus, Judas  Iskariot. Satana okwa li e mu pukifa opo a kengelele Omwene waye. Judas okwa li e va pula a ti: “Otamu pe nge shike ngeenge onda yandje Jesus momake eni?” (Mateus 26:15) Osho osha li ve va hafifa, ndele tava “udafana ve mu pe oimaliwa yoisilveri.” (Lukas 22:5) Mbela ova li ve mu pa ingapi? Ova li va dimina oku mu pa oimaliwa oisilveri 30. Osha li shididilikwedi molwaashi eesekeli doisilveri 30 oda li ofuto yomupika. (Exodus 21:32) Kungaho, ovawiliki vomalongelokalunga ova li va tala ko Jesus ehe na ongushu. Judas okwa li a “hovela okukonga omhito tai wapalele opo e mu yandje momake avo ofimbo pehe na ovanhu vahapu.” — Lukas 22:6.

Efiku 13 Nisan ola li la hovela mEtitatu eshi etango la ningina, naasho osha li oshikando oshitihamano noufiku waxuuninwa waJesus muBetania. Efiku la ka shikula ko, ola li efiku laxuuninwa lokuninga omalongekido Opaasa. Odi oya li i na okukongwa opo i dipawe nokuyofwa aishe mo 14 Nisan. Openi tava ka lila ouvalelo, noolyelye tave ke u longekida? Jesus ka li a yandja ouyelele wa tya ngaho. Onghee Judas ka li ta dulu oku u lombwela ovapristeri ovakulunhu.

Omutenya wEtine, Jesus okwa li a tuma Petrus naJohannes, a ti: “Indeni mu ka longekide oshivilo shOpaasa tu uye tu lyeni.” Ove mu pula va ti: “Openi wa hala tu ke shi longekidile?” Jesus okwe va yelifila a ti: “Ngeenge mwa i muJerusalem otamu ka shakeneka mo omulumenhu a humbata oshitoo shomeva. Mu landuleni fiyo omeumbo omu ta i. Tyeni kumwene weumbo, ‘Omuhongi ota ti kwoove: “Onduda yovaenda oi li peni opo ndi danene mo Opaasa novahongwa vange?”’ Opo nee omulumenhu oo ote ke mu ulikila onduda ya kula yopombada, ya longekidilwa ovaenda. Omo mu longekidila Opaasa.” — Lukas 22:8-12.

Kape na omalimbililo kutya mwene weumbo olo okwa li omuhongwa waJesus. Okwa li a tambula eindilo laJesus opo a longife eumbo laye omolwoshiningwanima osho. Eshi ovayapostoli ovo vavali va fika muJerusalem, ova li va mona oinima aishe oyo Jesus e va lombwela. Opo nee ova li va longekida odi nokuninga omalongekido makwao e na sha nouvalelo wOpaasa, opo Jesus novayapostoli vaye aveshe 12 va dule oku i dana.