Yesu akumishile kunangula tumbaji twenyi vawana haPili yaMilive, nakukumbulula chihula chavo vahulishile kutalisa kukupwako chenyi nachikukulwishi chakatwamino kamyaka yino.

Likumbi lyaNyisane 11 lyapwile namilimo yayivulu chikuma. Jino haufuku uze vakindulukile kuMbetane, Yesu alwezele vaposetolo jenyi ngwenyi: “Munatachikiza ngwenu kunasale makumbi avali kuchilika chaPaseka, kaha Mwanamutu navamuhana kuvatu mangana vamusukike hachitondo.”—Mateu 26:2.

Likumbi lyaChitatu, Yesu apwile kaha navaposetolo jenyi nakuhwima. LyaChivali atenukilile vatwamina vamukwitava nakuvapopolola hatoma. Vasakile kumujiha. Ngocho kasolokeleko halikumbi lyaNyisane 12 mwomwo kasakile kumutangula kukapwa kuchiwanyino chaPaseka navaposetolo jenyi hakulauka chalikumbi haNyisane 14.

Oloze vapilishitu vavakulwane navakulwane javatu kavaholele kulu shimbu kanda chiwanyino chaPaseka chiputukeko. Valikungulwilile muchipango chakapilishitu wakulitulaho Kayafwase. Mwomwo ika? Vapihililile chikuma mwomwo Yesu avapopolwele. Ngocho valikashile mangana “vamukwate kuzachisa makuli mangana vamujihe.” Lwola muka valingile ngocho, kaha nawa mujila muka? Vambile ngwavo: “Hachiwanyinonyi chiku, kuchina vatu navakatula liuya.” (Mateu 26:4, 5) Vevwile woma mwomwo vatu vavavulu vevwililile Yesu kuwaha.

Kaha nawa vatwamina vamukwitava vatambwile ngeji. Ou ngeji apwile Yuta Isakalyote, kaposetolo kaYesu. Satana amuhungumwishile mangana asolole Mwata wenyi. Yuta avahulishile ngwenyi: “Namunguhana ika mangana ngumusolole kuli enu?” (Mateu 26:15) Vawahililile chikuma hakwivwa mazu kana, kaha “valivwasanyine kumuhana jimbongo japalata.” (Luka 22:5) Uno vamuhanyine jimbongo jingahi? Vetavilile kumuhana jimbongo japalata 30.  Jimbongo kana jatelemo, mwomwo ndungo vamulanjilenga najishekele 30. (Kulovoka 21:32) Kaha vatwamina vamukwitava vamwene Yesu kupwa wamokomoko hakumulanda najimbongo jajindende ngana. Ngocho Yuta aputukile “kutondatonda lwola lwamwaza lwakumusolola kuli vakiko chakuzeneka vatu kupwako.”—Luka 22:6.

Likumbi lyaNyisane 13 lyapwile haChitatu, kaha lyaputukile hakulauka chalikumbi. Eli likiko lyapwile likumbi lyamakumishilo hamakumbi 6 aze Yesu atwamine muMbetane. Kaha lyacheleko lyapwile likumbi lyamakumishilo kuwahisa vyuma vyachiwanyino chaPaseka. Vatelele kujiha mwanamukoko nakumwocha wosena wamuundu hakulauka chalikumbi haNyisane 14. Uno vatelelele kulila kulihi, kaha veya vatelele kuwahisa kulya kana? Yesu kavulukile vyuma kanako. Ngocho, Yuta kahashile kulweza vapilishitu vavakulwane vyuma kanako.

Atela lyapwile likumbi lyaChiwana namusana, kaha Yesu atumine Petulu naYowano kufuma kuMbetane, ambile ngwenyi: “Yenu muwahise Paseka mangana tulyenga.” Vakiko vamukumbulwile ngwavo: “Kulihi unasake ngwove tuwahishileko Paseka?” Yesu alumbunwine ngwenyi: “Omu namwingila munganda navamihumangana kuli lunga nambate mulondo wameya. Kaha mukavenu swi namuzuvo yize mwakengila. Kaha kambenu kuli mwenyazuvo yize ngwenu, ‘Muka-kunangula nambe kuli ove ngwenyi: “Kapete kavangeji kalihi, muze nangulila Paseka natumbaji twami?”’ Kaha uze lunga mwamilweza kapete kakanene kahelu, kaze vanawahisa lyehi. Wahishilenu Paseka kuze vene.”—Luka 22:8-12.

Chakuzeneka kuhuhwasana, ou mwenyazuvo apwile kambaji kaYesu. Atela uze mwenyazuvo apwile nakushinganyeka ngwenyi Yesu mweza nakumulomba zuvo vayizachise kuchilika kanechi. Omu vaze vaposetolo vavali vahetele kuYelusalema, vawanyine vyuma vyosena, ngana muze ahanjikile Yesu. Ngocho valongesele mwanamukoko navyuma vyeka vize vyasakiwile kutalisa kuchilika chaPaseka mangana vyuma vyavatu 13 vitengamo kanawa, Yesu navaposetolo jenyi 12.