Yesu osetieko puonjo jootene ang’wen e Got Zeituni kodwoko penjo ma gisepenje e wi ranyisi ma biro nyiso ni entie e loch kendo ni giko mar ndalo okayo machiegni.

Mano kaka Nisan 11 osebedo odiechieng’ modich miwuoro! Nenore ni sama gidok nindo Bethania e ma Yesu wachoe ne jootene niya: “Ung’eyo ni chakre sani odong’ odiechienge ariyo to Pasaka timore, kendo ibiro chiw Wuod dhano mondo onege e yath.”​—Mathayo 26:2.

Yesu osekwedo jotend din kendo elo kitgi kod timbegi maricho chieng’ Tich Ariyo. Omiyo, jotend din-go dwaro nege. Nenore ni kinyne ma en Tich Adek, Yesu riyo ka en gi jootene kar kendgi. Kuom mano, chieng’ Nisan 12, ok owuoth e lela mondo kinyne bang’ podho chieng’ ka Nisan 14 chakore, kik gimoro amora omone chamo Pasaka gi jootene.

Kata kamano, ka chieng’ Pasaka podi, jotend-jodolo kod jodongo mag oganda chapni ahinya. Gichokore e laru mar jadolo maduong’ ma en Kayafa. Nikech ang’o? Gin gi mirima nikech Yesu osebedo ka elo kitgi kod timbegi maricho. Kuom mano, giriwo paro kanyachiel “mondo gimak Yesu ka gitiyo gi wuond mariek mondo ginege.” En karang’o ma gibiro timoe mano, to e yo mane? Jogo wacho kama: “Ok e kinde sawo dipo ka koko obetie e kind oganda.” (Mathayo 26:4, 5) Gin gi luoro nikech ji mang’eny dhi ir Yesu kendo gihere.

Jotend din-go po mana ka ng’at moro biro irgi. Ng’atno en Judas Iskariot ma en achiel kuom joote Yesu. Satan oseketo paro e chunye mondo ondhog Ruodhe! Judas penjo jotend din-go kama: “Ang’o ma ubiro miya mondo andhognugo?” (Mathayo 26:15) Nikech gimor gi chenrono,  “giyie miye pesa mar fedha.” (Luka 22:5) Mano pesa ma romo nade? Giwinjore mondo gimiye fedha 30 ma mingli. Ber ng’eyo ni chon nengo ma ne ing’iewogo misumba ne en shekel 30 mag fedha. (Wuok 21:32) Omiyo, sama jogo miyo Judas mana pesa ma rom kamano, ginyiso kaka gichayo Yesu. Bang’ mano, koro Judas chako “manyo thuolo maber mar ndhoge ka oganda onge machiegni.”​—Luka 22:6.

Nisan 13 chakore chieng’ Tich Adek bang’ podho chieng’, kendo en e odiechieng’ mar auchiel kendo mogik ma Yesu nindogo Bethania. Kinyne, biro dwarore ni otim ikruok mogik ne Pasaka. Nyaka many nyarombo mibiro yang’ kendo bul ka Nisan 14 osechakore. Nyarombono ne ibuloga kaka en oduto pep. To gibiro chamo Pasakano kanye, to jomage ma biro ike? Yesu pok ochiwonegi wechego. Omiyo, onge weche ma Judas nyalo fulo ne jotend-jodolo.

Yesu oro Petro gi Johana mondo owuog Bethania gidhi Jerusalem. Owachonegi kama: “Dhiuru uiknwa Pasaka mondo wacham.” Nyalo bedo ni seche ma oorogieno en Tich Ang’wen odiechieng’. Gipenje kama: “Idwaro ni wadhi waike kanye?” Yesu leronegi niya: “Ka udonjo e taon, ng’at moro moting’o aguch lowo mar pi biro romo kodu. Luweuru nyaka e ot modonjoe. Kendo uwach ne wuon odno ni, ‘Japuonj penjo kama: “Ere od welo kama dachamie Pasaka gi jopuonjrena?”’ Eka ng’atno biro nyisou ot mamalo malach moseikie gik moko. Kanyo e ma unuikee.”​—Luka 22:8-12.

Onge kiawa ni wuon odno en japuonjre Yesu. Bedo ni Yesu okwaye mondo otim Pasaka e ode en gima ok kawe gi wuoro. Sama joote ariyogo ochopo Jerusalem, giyudo ka gik moko duto ni mana kaka Yesu nosewachonegi. Kuom mano, giiko nyarombo kod gik mamoko ma dwarore ma ji 13 nyalo chamogo Pasaka, tiende ni Yesu kod jootene 12.