Yesu onnakuchula waahusiha arummwa awe asese va Mwaako Oliveti , aakhulaka makoho aya vooloca sa orwa wawe omwaahiyu ni makuchuwelo a mukhalelo yoola wa ichu.

Nihiku 11 na Nisani nootepa waacano muteko! Akhweya nihiku nenla anakookelaaya o Petaniya ohiyu, vaavaa Yesu onaaleeleiye arummwa awe ariki: “Mòsuwela wi ahanle mahiku meli ophiya Pasikha, ni Mwana a mutxhu onanvelèliwa wi akhomeliwe [vamwirini].”—Mateu 26:2.

Mwawooneya Yesu onnamaliha nihiku noothene Naneeraru, moomaaleleya vamoha ni amuhuseryaawe. Mu nihiku Nanawiili, owo aahaavaanya ahooleli a malapelo ni waalokoha vanlakani. Awo annamwaavya Yesu wi emwiiphe. Nlelo, Yesu hiisoonihale vanlakani mu nihiku 12 na Nisani, mwawiihiiha wi ehikhalevo echu enahaala omooceeliha ompaka Paskha awe ni arummwa awe nsuwa nimanle omorelamo ohiyu woocharela, vaavaa onapaceryeiye 14 a Nisani.

Nyenya asitokweene a mukucho ni alopwana akina hanatitelela okhala oomaaleleya ahaakumve Paskha. Awo annathukumana vaate va mutokweene a anamukucho, Kayafa. Ntakhara heeni? Awo aanyeenyeya nthowa nawi Yesu ohaavaanya. Vano annaphakana vamoha “makhutxe omphara ni omwipha Yesu.” Ti mwawiihai nave ti liini anayaaya weerano yeela? Awo annaloca: “Nto nihikhale nihiku na efesta, wi ohikhalevo ekhotxo velaponi.” (Mateu 26:4, 5) Annoova nthowa nawi Yesu onneemereryiwa ni achu ancipale.

Mu elukuluku yeele, asitokweene a malapelo annamwaakhela muleco. Mootutusa, owo ti mmoha a arummwa a Yesu, Yutasi Isikariote.  Satana oohela mwa yoowo muupuwelo wa omutumiha Pwiya awe. Yutasi onnaakoha yaawo: “Muni mukivaheni mikonnyani Kristu?” (Mateu 26:15) Ehakalanle mwa yeela, “yàvanela onvaha ikhorowa [sa eparata].” (Luka 22:5) Ikhorowa kavi? Moohakalala annamuroromeliha omwinnya ikhorowa makhumi mararu sa eparata. Ela ti yoophwanelela woona wi ikhorowa sa kapuro ti makhumi mararu sa eparata. (Mukwaha 21:32) Asitokweene a mukucho mmukhalelo yoola annooniherya munyemu ntakhara Yesu, emoonaka ntoko wi haanono esisapo. Vano Yutasi “ànasya elukuluku yonvelèla wa yawo, atxhu ehisuwelaka.”—Luka 22:6.

Onnapacerya 13 a Nisani nsuwa nneelaka mu nihiku Naneeraru, nave ola ohiyu waneethanu nammoha ni wookuchula Yesu onamaliheiye o Petaniya. Nihiku noocharela, marehereryo ookuchula anahaala ochuneya wi apakiwe Paskha. Mwaasaana a epucepuche onaphwanela ophwanyiwa wi awerye ohitiwa ni woosiwa amanle opacerya 14 a Nisani. Ti woowi anayaaya opakawo yoolya, nave taani oni arehererye? Yesu haavaherenrye meerelo ene. Mwawiihiiha Yutasi hani aaveleele yaawo wa mutokweene a anamukucho.

Akhweya woopaceryani wa othana wa nihiku Naneesese, Yesu onnaarumiha Petro ni Yohani orweela o Petaniya ariki: “Haweni mwanreheryele solya sa Pasikha, wi nlye.” Awo annaakhula: “Ti wowi onakhwelawe wi nreheryewo solya?” Yesu onnathariha: “Murikinvolowaru mpoma, munamumphwanya mulopwana okunse murinka wa mahi. Mmutxhare yowo ophiyerya empa onereiye avolowe. Mmulèle mwanene a empa muriki: ‘Muhusiha onnokoha: ti nivi nipuro kineraka kimulyemo Paska ni amuhuseryaka?”’ Nave owo onan’wonihani, mwa empa yosulu, nipuro ntokotoko orimo mipatxo sorèra. Mmureherye mwemmo Paska.”—Luka 22:8-12.

Moohikhwa minikwa mwaneene a empa muhuserya a Yesu. Akhweya owo aahirehererya ichu Yesu aamvenkeiye vooloca sa opharihela empa awe ntakhara elukuluku yeele. Vaava arummwa eeli anayaaya o Yerusalemu, annaphwanya echu eri yoothene hiiha ntoko Yesu aaleenleiye. Mwawiihiiha awo annoona wi mwaasaana a epucepuche ori ookhaleene nave wi marehereryo makina a yoolya ya Paskha aamalela wi ekhaviherye soothowa sa arummwa khumi napiili vamoha ni Yesu.