Asumpal lan binangatan nen Jesus so apatiran apostol to diad Palandey na Saray Olibo, inebatan toy tepet da ed kiwawala tod arapen tan say kaunoran a parte na sistema na mundo.

Talagan dakel so kimey dad saman ya agew na Nisan 11! Nayarin papawil la rad Betania pian diman manpalabi nen imbaga nen Jesus ed saray apostol to: “Amta yo a duaran agew ni et nagawa lay Paskua, tan say Anak na too et iyawat pian nipasak.”​—Mateo 26:2.

Diad tinmumbok ya agew, Mierkoles, nayarin kaiba nen Jesus iray apostol to diad lugar ya anggapoy totoo. Nen Martes et sinimbawa nen Jesus iray lider na relihyon tan impaamta toy kaugsan da. Manaanap iray paraan pian pateyen da. Kanian agnampanengneng nen Nisan 12 pian anggapoy makasbel ed panselebra toy Paskua kaiba iray apostol to kaselek na agew diad onsublay ya labi, kagapo na Nisan 14.

Balet aglabat nampareen iray manunan saserdote tan mamasiken antis na Paskua. Nantitipon irad sular na abung na atagey a saserdoten si Caifas. Akin? Mansyodot ira ta pinapaway nen Jesus so kaugsan da. Natan et nantotongtongan da ya “erelen si Jesus diad masilib a paraan pian pateyen da.” Panon tan kapigan da itan gawaen? Inkuan da: “Aleg no piesta, pian agmanggulo iray totoo.” (Mateo 26:4, 5) Antakot ira ta labalabay na totoo si Jesus.

Legan na satan et walay sinmabin bisita. Abigla ra ta si Judas Iscariote, sakey ed saray apostol nen Jesus. Inkarga nen Satanas ed isip to so ideyan traidoren so Katawan to! Tinepetan ira nen Judas: “Antoy iter yod siak no sikatoy iyawat kod sikayo?” (Mateo 26:15) Aliketan ira, kanian “nampapaknaan da ya ikdan na pilak a kuarta.” (Lucas 22:5) Pigara? Akipakna ran sikatoy ikdan day 30 piraso na pilak. Say bili  na sakey ya aripen et 30 siklo. (Exodo 21:32) Kanian talagan agrerespetoen na saray lider na relihyon si Jesus, memelmelagen da. Natan si Judas et ginmapon ‘mananap na pankanawnawa pian traidoren si Jesus no anggapoy dakel a totoo.’​—Lucas 22:6.

Onggapoy Nisan 13 kaselek na agew na Mierkoles, tan saya so komanem tan sampot lan labi nen Jesus diad Betania. Diad onsublay ya agew, manparaan la ra parad Paskua. Nepeg ya walay kordero ya pateyen tan ikalot kagapo na Nisan 14. Iner da gawaen so pangdem, tan siopay mangiparaan ed satan? Ag-imbaga nen Jesus iray detalye. Kanian anggapoy nipasabi nen Judas ed saray manunan saserdote.

Nayarin ngarem na Huebes nen pinasipot nen Jesus si Pedro tan Juan manlapud Betania ya inkuan to: “La kayo tan iparaan yoy pangdeman tayod Paskua.” Inmebat ira: “Iner so labay mon pangiparaanan mi?” Impaliwawa nen Jesus: “Sano onloob kayod syudad, abeten kayo na sakey a lakin sankasakbat toy sambuyog a danum. Tumbok yod abung a looban to. Tan ibaga yod akan-abung, ‘Papaibaga na Managbangat: “Iner so kuarto parad saray sangkaili a nayarin panganan koy Paskua a kaibak iray disipulok?”’ Tan ipanengneng ed sikayo na laki so baleg a kuarto ed tagey a wala la ray kagawaan. Ditan kayo mangiparaan.”​—Lucas 22:8-12.

Seguradon say akan-abung et disipulo nen Jesus. Nayarin iilaloan to lan kerewen nen Jesus ya usarey abung to parad sayan okasyon. Kasabi na duaran apostol ed Jerusalem, anengneng dan amin so imbaga nen Jesus ed sikara. Kanian sineguro dan walay akaparaan ya kordero tan maayos so amin ya kaukolan parad Paskua tan na saray 13​—si Jesus tan 12 apostol.