Hesus a kaba di kontestá e pregunta tokante e señal di su presensia i di e konklushon di e era ku su kuater apòstelnan a hasié riba Seru di Oleifi.

Dia 11 di nisan tabata un dia drùk pa Hesus i su apòstelnan. Podisé ta ora nan tabata riba kaminda pa bai Betania pa pasa nochi, Hesus a bisa su apòstelnan: “Boso sa ku aki dos dia ta Pasku, i e Yu di hende lo keda entregá den man di su enemigunan pa nan klab’é na staka.”—Mateo 26:2.

Aparentemente, Hesus lo a pasa e siguiente dia, djárason 12 di nisan, trankil huntu ku su apòstelnan. Ma e lidernan religioso ku un dia promé el a skual i desenmaskará públikamente tabata buska manera pa mat’é. Ta pa e motibu ei Hesus no a sali den públiko dia 12 di nisan. E no tabata ke pa nada stroba e i su apòstelnan di selebrá Pasku Hudiu dia 14 di nisan, ku lo a kuminsá despues ku solo baha dia 13 di nisan.

Pero e saserdotenan prinsipal i e ansianonan di e pueblo sí no a para ketu. Nan a reuní den patio di Kaifas, e sumo saserdote. Dikon? Nan tabata rabiá pasobra Hesus tabata saka nan malisia na kla. Pues, nan a konspirá ku otro “pa mira kon nan por [a] gara Hesus na un manera astuto i mat’é.” Awor, kon i na ki tempu nan tabata ke mat’é? Nan a bisa: “No durante e fiesta, pa esei no kousa un lantamentu den e pueblo.” (Mateo 26:4, 5) Nan tabatin miedu pasobra hopi hende tabata na banda di Hesus.

Na e momento ei, nan a haña un bishita. Pa nan sorpresa, tabata Hudas Iskariot, un di Hesus su propio apòstelnan. Satanas a hinka den kurason di Hudas e idea pa traishoná su Señor! Hudas a puntra e lidernan religioso: “Kiko boso lo duna mi pa entreg’é na boso?” (Mateo 26:15) Nan a keda masha kontentu i “a bai di akuerdo pa dun’é plaka.” (Lukas 22:5) Kuantu plaka nan  a ofres’é? Wèl, nan a bai di akuerdo pa dun’é 30 moneda di plata. Ta remarkabel ku e suma di plaka ku hende tabata paga e tempu ei pa un esklabo tabata 30 siklo. (Éksodo 21:32) Di e manera ei, e lidernan religioso a mustra nan despresio pa Hesus, kende pa nan tabata un persona di poko balor. Desde e momento ei, Hudas ‘a kuminsá buska un bon chèns pa entregá Hesus na nan ora no tabatin muchu hende presente.’—Lukas 22:6.

Awor bon, ora solo a baha, a bira 13 di nisan. E anochi ei lo tabata Hesus su di seis i último anochi na Betania. Su manisé, djaweps, e disipelnan mester a kuminsá hasi e último preparashonnan pa Pasku Hudiu. Nan mester a buska un lamchi ku mester a ser matá i di roster despues ku 14 di nisan kuminsá. Awor, na unda Hesus i su apòstelnan lo a selebrá Pasku Hudiu i ken lo a hasi e preparashonnan? Hesus no a duna e detayenan ei. P’esei, Hudas no por a duna e saserdotenan prinsipal e informashon ei.

Podisé ta djaweps tra’i mèrdia Hesus a manda Pedro i Huan for di Betania pa nan bai hasi preparashon. El a bisa nan: “Bai prepará e sena di Pasku pa nos kome.” Nan a puntra Hesus: “Unda bo ke pa nos prepar’é?” Hesus a bisa nan: “Ora boso drenta e stat, boso lo topa un hòmber ku ta karga un poron di awa. Siguié te den e kas ku e drenta. I boso tin ku bisa doño di e kas: ‘E Maestro ta manda puntra: “Unda e kamber di huéspet kaminda mi por tene e sena di Pasku huntu ku mi disipelnan ta?”’ I e hòmber ei lo mustra boso un kamber grandi ariba ku ta mueblá. Prepar’é einan.”—Lukas 22:8-12.

E doño di e kas mester tabata un disipel di Hesus. Podisé e tabata ferwagt ku Hesus lo a pidié pa nan usa su kas pa e okashon ei. Ora e dos apòstelnan a yega Herúsalèm, nan a haña tur kos, manera Hesus a bisa nan. Nan a sòru pa e lamchi tabata kla i a hasi tur otro preparashon pa asina nan tur, esta, e 12 apòstelnan i Hesus, por a selebrá Pasku Hudiu.