Jesusqa tawa apostolesninman Olivos orqopi yachacherqa. Pay kutimunanmanta, kay mundoj imasninpa tukukuyninmantawan tapusqankumanpis kuticherqa.

Jesusqa 11 de nisán diapi mana tiempoyoj kasharqa. Payqa ichá chay tarden Betaniaman kutipushaspa apostolesninman nerqa: “Qankunaqa yachankichej iskay diasmantawan Pascua kananta. Chaypachataj noqataqa kʼaspipi wañuchinawankupaj jaywaykuwanqanku”, nispa (Mateo 26:2).

Jesusqa martes diapi judiospa religionninkuta ñaupajman apajkunata kʼamerqa, imayna runaschus kasqankutataj tukuypa ñaupaqenpi nerqa. Chayrayku Jesusta wañuchiyta munarqanku. Jesustajrí, qʼayantin miércoles 12 nisanta ichapis pakayllapi apostolesninwan khuska samarikorqa. Payqa mana munarqachu imapis kananta niraj Pascuata apostolesninwan ruwashajtin. Pascua fiestaqa qʼayantinraj inti yaykupusqantawan 14 de nisán fechapi qallarinan karqa.

Jinapis kuraj sacerdoteswan llajtamanta kurajkunawanqa, kuraj kaj sacerdote Caifaspa wasi pationpi tantakorqanku. Paykunaqa Jesús sajra kasqankuta rikuchisqanmanta phiñasqa kasharqanku. Chayrayku “yachachinakorqanku Jesusta llullerioswan japʼichispa wañuchinankupaj”. Jinapis nerqanku: “Ama fiestapeqa japʼichinachu, runas ama chʼajwanankupaj”, nispa (Mateo 26:4, 5). Chayta nerqanku runasta manchachikusqankurayku. Imajtinchus runasqa Jesuspi creej kanku.

Jinallapi tantasqa kasharqanku chayman Jesuspa apostolnin Judas Iscariote chayaykorqa. Paytaqa Kuraj Supay yuyaychasqa Jesusta wasanchananpaj. Chayrayku pay kuraj sacerdotesta nerqa: “Jesustachus japʼichiykichejman chayqa, ¿imatataj  qowankichejman?”, nispa (Mateo 26:15). Paykunataj chayta uyarispa “kusikorqanku, qolqeta qonankupajtaj parlarqanku” (Lucas 22:5). May kusiywan 30 qolqeta qonankuta nerqanku. Chaytaj ichapis 30 siclos karqa. Unay tiempotaj uj esclavoj precion chay karqa (Éxodo 21:32). Judiospa religionninkuta ñaupajman apajkunaqa, Jesusrayku uj esclavoj precionta pagaspa payta pisipaj qhawasqankuta rikucherqanku. Judastajrí, yuyaychakorqa “imaynamantachus Jesusta japʼichinanta mana runaj rikunallanta” (Lucas 22:6).

Chantá inti yaykupusqantawan miércoles tardenta 13 de nisán qallarerqa. Jesustaj chay chʼisillatawanña Betaniapi qhepakorqa. Qʼayantenqa yachachisqasnin Pascua fiestapaj tukuy imata wakichinanku karqa. Paykunaqa uj corderota conseguinanku karqa. Chantá 14 de nisán qallarisqantawan chay corderota ñakʼananku karqa, enterontataj kankananku karqa. Maypichus chayta ruwanankuta, pichus chayta ruwanantaqa Jesús mana willarqachu. Chayrayku Judasqa ni imata kuraj sacerdotesman willamuyta aterqachu.

Jesusqa juevesta Betaniapi kasharqa. Chantá ichapis las doce pasayta Pedrotawan Juantawan Jerusalenman kacharqa. Paykunata nerqa: “Rispa Pascuata wakichimuychej mikhunanchejpaj”, nispa. Paykunataj taporqanku: “¿Maypitaj wakichinaykuta munanki?”, nispa. Jesustaj nerqa: “Llajtaman yaykojtiykichej uj runa qankunawan tinkukonqa. Payqa pʼuñupi yakuta apashanqa, paypa qhepantataj rinkichej may wasimanchus yaykonqa chay ukhukama. Wasiyojtataj ninaykichej tiyan: ‘Yachachejniyku nisunki: “¿Mayqen cuartopitaj yachachisqasniywan Pascuata mikhusaj?”, nispa’. Chay runataj rikuchisonqachej alto patapi jatun cuartota kʼuchunchasqata. Chaypi Pascuata mikhunanchejpaj wakichiychej”, nispa (Lucas 22:8-12).

Chay wasej dueñonqa Jesuspa yachachisqanchá kanman karqa. Ichapis payqa yacharqaña Jesús wasinpi Pascuata ruwayta munananta. Chayrayku Pedrowan Juanwanqa, Jerusalenpi tukuy imata Jesús nisqanman jinapuni tarerqanku. Chantá corderota wakicherqanku, 13 runas mikhunankupaj imaschus necesitakusqantapis mesaman churarqanku. Ajinamanta Jesuswan 12 apostolesninwan Pascuata ruwayta aterqanku.