Olivos orqopin Jesusqa tawa apostolninkunaman willaran chayamunan tiempomanta, tukukuy tiempomantawan. ¿Imatan chaymanta ruwaran?

Apostolninkunawanmi kutimpuran Betania llaqtachaman. Chay kutipin Jesusqa paykunata ninman karan: “Yachasqaykichis jina, kay iskay p’unchaymantan Pascua fiesta kanqa, chaypin runaq Churinqa k’aspipi warkusqa kananpaq entregasqa kanqa”, nispa (Mateo 26:2). Chhaynapin chay 11 de nisán p’unchay tukuran.

Paqaristin p’unchayqa 12 de nisán miercolesmi karan, chaypiqa mana imata ruwaspallan Jesusqa apostolninkunawan kanman karan. Ñaupaq p’unchay martespi lliupa qayllanpitaq judío umallikunata anyaran chayqa, paykunaqa wañuchiytan munasharanku. Chaychá Jesusqa mana runakunawan rikuchikuyta munaranchu, chhaynapi ama pipas 14 de nisán p’unchaypi apostolninkunawan Pascua mijunanta jark’ananpaq.

Chaykaman umalli sacerdotekunawan kuraq runakunapiwan uma sacerdote Caifaspa wasin patiopi juñunakuranku. Chaypin rimanakuranku “Jesusta ima tumpallapas jap’ispa wañuchinankupaq”. Ichaqa ninakurankun: “Ama fiestapiqa, mana chayqa runakunachá ch’aqwata jatarichinkuman”, nispa (Mateo 26:4, 5). Askha runakunan Jesustaqa allinpaq qhawariqku, chaymi chay umallikunaqa paykunata manchakusharanku.

Chayllamanmi jamuran Jesuspa jujnin apostolnin Judas Iscariote. Paytan Satanasqa tanqasharan Jesusta jap’ichinanpaq. Chaymi Judasqa chay umallikunata niran: “¿Imatan qowankichisman qankunaman Jesusta jap’ichinaypaq?”, nispa (Mateo 26:15). Chaywanmi paykunaqa anchata kusikuranku, rimanakurankutaq  Judasman “qolqeta qonankupaq” (Lucas 22:5). ¿Jayk’a qolqetan qonanku karan? 30 qolqetan. Chay tiempopiqa kamachi runakunatan 30 qolqemanqa vendeqku (Éxodo 21:32). Chaywanmi chay umallikunaqa rikuchisharanku pisi valorniyoqpaq Jesusta qhawarisqankuta. Chaymantapachan Judasqa “piensasharan imaynatachus runakunaq mana yachasqallan Jesusta jap’ichinman chayta” (Lucas 22:6).

Miércoles p’unchaypi inti jaykuywanmi qallariran 13 de nisán p’unchay, chay ch’isinllatañan Jesusqa Betania llaqtachapi alojakunan karan. Paqaristin p’unchayqa apostolninkunan Pascua mijunapaq imachus necesitakusqanta alistananku karan. Juj corderotan kankananku karan 14 de nisán p’unchaypi mijunankupaq. Ichaqa manan Jesusqa willaranchu maypichus chay ruwanankuta, pikunachus chayta alistanankutapas. Chhaynapin Judas mana sacerdotekunaman chayta willayta atiranchu.

Jueves p’unchaypin Jesusqa manaraq 14 de nisán qallarishaqtin Pedrota Juantawan Betania llaqtachamanta kacharan: “Rispa Pascua fiestapaq mijunata preparamuychis mijunanchispaq”, nispa. Chaymi paykunaqa niranku: “¿Maypi preparamunaykutan munashanki?”, nispa. Jinan Jesusqa niran: “Llaqtaman jaykuspaykichismi unu p’uyñu apashaq runawan tupankichis. Paypa qhepantan rinkichis maymanchus jaykunqa chay wasi ukhukama. Jinaspan wasiyoqta ninkichis: ‘Yachachikuqmi nin: “¿Maypin kashan visita chaskinayki cuarto, chaypi discipuloykunapiwan Pascua mijunata mijunaypaq?”’, nispa. Jinan payqa altospi juj jatun cuartota rikuchisunkichis listollataña, chaypin alistamunkichis”, nispa (Lucas 22:8-12).

Chay wasiyoq runaqa Jesuspa discipulonmi kanman karan. Payqa suyasharanchá apostolkuna jamunanta. Chay apostolkuna llaqtaman chayaspaqa Jesuspa nisqanta jinan tukuy imatapas tariranku. Chaymi tukuy necesitakusqanta alistaranku, chhaynapi Jesús 12 apostolninkunawan Pascua mijunata mijunanpaq.