Yezu amala kupfundzisa apostolo ace anai Paphiri ya Milivera na kutawira mbvundzo wawo thangwi yakuonekera kwace na kumala kwa makhaliro a dziko.

Yezu aphata basa kakamwe pa ntsiku ya Nisane 11! Panango ndi mu ndzidzi ukhabwerera iye kuenda kagona ku Bhetanya mudapanga iye apostolo ace kuti: “Imwe musadziwa kuti zasala ntsiku ziwiri toera anthu akumbuke Paskwa, pontho Mwana wa munthu anadzaperekwa m’manja mwa anyamalwa ace toera aphiwe pamuti.”—Mateu 26:2.

Pisaoneka kuti mangwana mwace ikhali Citatu, Yezu na apostolo ace akhala paokha. N’Cipiri, iye asandika atsogoleri auphemberi mbalonga pakweca pinthu pyakuipa pikhacita iwo. Iwo akhafuna kumupha. Ndi thangwi yace iye nee aonekera pakweca pa Nisane 12. Iye acita pyenepi toera akhonde kupingizwa kucita Paskwa pabodzi na apostolo ace. Paskwa ineyi ikhafunika kucitwa mangwana mwace pakubira kwa dzuwa pakutoma kwa Nisane 14.

Mbwenye akulu a anyantsembe na akulu a mbumba akhapitiriza kusaka njira toera kuphata Yezu Paskwa mbidzati kufika. Iwo agumanyikana panyumba ya nyantsembe wankulu akhacemerwa Kayifa. Thangwi yanji? Iwo akhadaipirwa thangwi Yezu akhadalonga pakweca pinthu pyakuipa pikhacita iwo. Natenepa iwo akhabverana “toera kuphata Yezu na kumupha.” Iwo acita tani pyenepi, pontho lini? Iwo alonga: “Tilekeni kum’phata pa phwando, gopa anthu anacita uviyaviya.” (Mateu 26:4, 5) Iwo akhagopa thangwi anthu azinji akhafuna kakamwe Yezu.

Mwakukhonda dikhira, atsogoleri auphemberi atambira mulendo. Iwo adzumatirwa thangwi mulendo unoyu akhali Yuda Iskariyoti, m’bodzi wa apostolo a Yezu. Sathani ndiye adacitisa Yuda kukhala na cifuno cakupereka Mbuya wace! Yuda abvundza  atsogoleri auphemberi: “Munandipasanji ndingampereka kuna imwe?” (Mateu 26:15) Iwo akomerwa kakamwe, “mbabverana kumpasa kobiri za parata.” (Luka 22:5) Ampasa kobiri zingasi? Iwo abverana kumpasa kobiri 30 za parata. Mu ndzidzi unoyu bitcu akhaguliswa na kobiri 30 za parata. (Eksodo 21:32) Pyenepi pisapangiza kuti atsogoleri auphemberi akhaona Yezu ninga munthu wakusowa basa. Natenepa Yuda atoma “kusaka ndzidzi wakuthema toera kupereka Yezu kuna iwo pa mbuto yakusowa mwinji wa anthu.”—Luka 22:6.

Ntsiku ya Nisane 13 yatoma n’Citatu namaulo pakubira kwa dzuwa. Yezu agona masiku matanthatu ku Bhetanya, pontho anewa akhali masiku ace akumalisa. Mangwana mwace, masasanyiro akumalisa a Paskwa akhafunika kucitwa. Akhafunika kugumana mwana bira na kumuotca pakutoma kwa Nisane 14. Mbani akhunganya cakudya, pontho acidyera kupi? Yezu nee akhadalonga thangwi ya pyenepi. Natenepa Yuda nee apanga akulu a anyantsembe thangwi iye nee akhadziwa mbuto na akhafuna kukhunganya cakudya.

Panango n’Cinai namasikati Yezu atuma Pedhru na Juwau kubulukira ku Bhetanya toera aende ku Yerusalemu. Iye aapanga: “Ndokoni katikhunganyira Paskwa toera ife tidye.” Iwo ambvundza: “Ndi kupi kunafuna imwe kuti tiende kakhunganye Paskwa?” Iye aapanga: “Mungapita mu nzinda, munagumanikana na mamuna m’bodzi adathukula nkhali ya madzi. Ntowereni mpaka panyumba inafuna kupita iye. Pangani mwanaciro nyumba kuti: ‘Mpfundzisi alonga: “Iri kupi sala ya alendo toera ndidye Paskwa mwenemu na anyakupfundza anga?”’ Iye anakupangizani sala ikulu yandzulu, idamala kusasanyirwa mwadidi. Tikhunganyireni Paskwa mwenemu.”—Luka 22:8-12.

Mwakukhonda penula, mwanaciro nyumba ndi nyakupfundza wa Yezu. Panango iye akhadikhira kuti Yezu mbadam’phemba toera kuphatisira nyumba yace pa ndzidzi wa Paskwa. Mudafika apostolo awiri ku Yerusalemu, agumana pyonsene ninga mudaapangira Yezu. Natenepa iwo atoma kukhunganya mwanabira na cakudya cikhafunika pa Paskwa toera cikwane kuna anthu 13. Anthu anewa akhali Yezu na apostolo ace 12.