යේසුස් තවමත් ඉන්නේ ඔලීව කන්දේ. තමන් පැමිණ සිටින කාලය සහ පවතින සමාජයේ අවසාන කාල පරිච්ඡේදය ගැන නියෝජිතයන් අහපු ප්‍රශ්නයට ඔහු පිළිතුර පැහැදිලි කරලයි තියෙන්නේ.

නීසාන් 11වෙනිදා හරිම කාර්යබහුල දවසක්. යේසුස් නියෝජිතයන්ට මෙහෙම කියනවා. “තව දවස් දෙකකින් පාස්කුව පැමිණෙන බව ඔබ දන්නවා. එවිට ඔවුන් මනුෂ්‍ය පුත්‍රයාව කණුවක ඇණ ගසා මරා දමයි.” (මතෙව් 26:2) සමහරවිට ඔහු ඒ දේ කියන්න ඇත්තේ රාත්‍රියේ නවාතැන් ගන්න නියෝජිතයන් එක්ක බෙතානියට යන අතරතුරේදී වෙන්න ඇති.

පෙනෙන විදිහට ඊළඟ දවස ඒ කියන්නේ නීසාන් 12වෙනි බදාදා දවස යේසුස් ගෙවන්නේ නියෝජිතයන් එක්ක. අඟහරුවාදා ඔහු ආගමික නායකයන්ගේ වැරදි ප්‍රසිද්ධියේම හෙළි කරපු නිසා ඔවුන් යේසුස්ව මරන්න බලාගෙනයි ඉන්නේ. ඒ නිසා බදාදා දවසේ යේසුස් අනිත් අයට පෙනෙන්න ඉන්නේ නැහැ. මොකද නීසාන් 14වෙනිදා නියෝජිතයන් එක්ක පාස්කුව සමරන එකට කිසිම දෙයක් නිසා බාධාවක් ඇති වෙනවාට ඔහු කැමති නැහැ.

කොහොමවුණත් තමන්ගේ වැරදි ප්‍රසිද්ධියේම කියපු එක ගැන කේන්තියෙන් ඉන්න නායක පූජකයන් සහ ජනතාව අතර හිටිය වැඩිමහල්ලන් නම් නිහඬව ඉන්නේ නැහැ. උත්තම පූජකයා වන කායෆස්ගේ නිවසේ ඇතුල් මළුවේ එක් රැස් වෙන ඔවුන් “කපටි උපායක් යොදාගෙන යේසුස්ව අල්ලාගෙන මරා දැමිය හැකි අයුරු ගැන” සාකච්ඡා කරනවා. “සෙනඟ අතර කෝලහලයක් ඇති විය හැකි නිසා අපි ඒ දේ උත්සව දවස්වලදී නොකර සිටිමු” කියලා ඔවුන් කතා වෙන්නේ හුඟක් මිනිසුන් යේසුස්ට පක්ෂව ඉන්න නිසයි.—මතෙව් 26:4, 5.

දැන් සිද්ධ වෙන්නේ ආගමික නායකයන් නොහිතපු දෙයක්. යේසුස්ගේ නියෝජිතයෙක් වුණු යූදස් ඉස්කාරියොත් ඔවුන් ළඟට එනවා. සාතන්ගේ පෙලඹීමට අහු වෙලා ඉන්න යූදස් ඔවුන් ළඟට යන්නේ තමන්ගේ ස්වාමියාව පාවා දෙන්නයි. “මම ඔහුව ඔබට පාවා දුන්නොත් ඔබ මට දෙන්නේ මොනවාද” කියලා ඔහු ඔවුන්ගෙන් අහනවා. (මතෙව් 26:15) ඒ ගැන හුඟක් සතුටු වෙන ඔවුන්  “ඔහුට රිදී මුදල් දීමට එකඟ” වෙනවා. (ලූක් 22:5) ඔවුන් පොරොන්දු වෙන්නේ රිදී කාසි 30ක් දෙන්නම් කියලයි. සාමාන්‍යයෙන් දාසයෙක් වෙනුවෙන් තමයි රිදී ෂෙකෙල් 30ක් ගෙව්වේ. (නික්මයාම 21:32) ඒකෙන් පැහැදිලි වෙනවා ඔවුන් යේසුස්ව සලකන්නේ මොන තරම් පහත් විදිහටද කියලා. “සෙනඟ නැති වේලාවක යේසුස්ව ඔවුන් අතට පාවා දීමට සුදුසු අවස්ථාවක් පැමිණෙන තෙක්” තමයි යූදස් දැන් බලාගෙන ඉන්නේ.—ලූක් 22:6.

බදාදා හිරු බැස යෑමත් එක්කම ඇරඹෙන්නේ නීසාන් 13වෙනිදා. මේක තමයි යේසුස් බෙතානියේ ගත කරන හයවෙනි සහ අන්තිම රාත්‍රිය. පාස්කුව අත ළඟටම ඇවිත් තියෙන නිසා ඒකට අවශ්‍ය කරන හැම දෙයක්ම සූදානම් කරන්න වෙනවා. උදාහරණයකට නීසාන් 14වෙනි දවස පටන්ගද්දීම බැටළු පැටවෙක්ව මරලා පුලුස්සන්න ඕන නිසා බැටළු පැටවෙක්ව කලින්ම සූදානම් කරන්න ඕනේ. යේසුස් සහ නියෝජිතයන් පාස්කු උත්සවය කොහේ පවත්වයිද? ඒකට අවශ්‍ය දේවල් සූදානම් කරන්නේ කවුද? යේසුස් මේ වෙන කල් ඒ ගැන කිසිම දෙයක් කියලා නැහැ. ඒ නිසා නායක පූජකයන්ට කිසිම තොරතුරක් දෙන්න යූදස්ට බැහැ.

බෙතානියේ ඉන්න යේසුස් පෙනෙන විදිහට බ්‍රහස්පතින්දා දවාලේදී පේතෘස්ට සහ යොහන්ට කතා කරලා “ගොස් අප සඳහා පාස්කු භෝජනය සූදානම් කරන්න” කියලා කියනවා. “ඒ සඳහා අප සූදානම් කළ යුත්තේ කොයි වගේ තැනක්ද” කියලා ඔවුන් ඇහුවාම යේසුස් කියන්නේ මෙහෙමයි. “ඔබ නුවරට ඇතුල් වූ විට වතුර පිරුණු මැටි භාජනයක් උසුලාගෙන යන මිනිසෙක් ඔබට හමු වෙයි. ඔහු සමඟ ගොස් ඔහු යන නිවසට ඇතුල් වෙන්න. එම නිවසේ අයිතිකරුට මෙහෙම කියන්න. ‘මගේ ගෝලයන් සමඟ පාස්කු භෝජනය ගැනීමට මට වෙන් කළ කාමරය කොතැනද කියා අපේ ගුරුතුමා ඔබෙන් අසන්න කිව්වා.’ එවිට ඒ මිනිසා අවශ්‍ය දේවල් සහිතව පිළියෙල කර ඇති විශාල උඩුමහල් කාමරයක් ඔබට පෙන්වයි. ඔබ භෝජනය සූදානම් කළ යුත්තේ එතැනයි.”—ලූක් 22:8-12.

ඒ මිනිසා යේසුස්ගේ ගෝලයෙක් කියලා නම් සැකයක් නැහැ. යේසුස් පාස්කුව පවත්වන්න තමන්ගේ ගෙදරට එයි කියලා ඔහු බලාපොරොත්තුවෙන් ඉන්න ඇති. නියෝජිතයන් දෙන්නා යෙරුසලමට ආවාම යේසුස් කියපු විදිහටම දේවල් වෙනවා කියලා ඔවුන් තේරුම්ගන්නවා. යේසුස්ට සහ නියෝජිතයන් 12දෙනාට පාස්කුව සමරන්න අවශ්‍ය බැටළු පැටවාව සහ අනිත් දේවල් සූදානම් කරලා තියන්න ඔවුන් දෙන්නා වගබලා ගන්නවා.