Jesu wamanizya kuyiisya baapostolo bone aa Cilundu ca Maolifa, waingula mubuzyo wabo uujatikizya kubako kwakwe kumbele alimwi amamanino aabweende bwazintu.

Eelo kaka buzuba bwa Nisani 11 bwali buzuba bwakujata maankamaanka! Ambweni ndileelyo nobali munzila kupiluka ku Betaniya kuyakoona, Jesu naambila baapostolo bakwe kuti: “Mulizyi kuti kwainda buyo mazuba obilo kuzwa sunu kuyooba Pobwe Lyakwiindilila, eelyo Mwanaamuntu uyakwaabwa kutegwa akajaigwe acisamu.”—Matayo 26:2.

Kuboneka kuti mubuzuba butobela, muli Bwatatu, Jesu waile kukkala buyo alikke abaapostolo bakwe. Muli Bwabili, wakasinsa basololi babukombi akuyubununa bubi bwabo caantangalala. Lino bayanda kumujaya. Aboobo, mubuzuba bwa Nisani 12 tanaalibonya kubuleya kutegwa kutabi cimulesya kusekelela Pobwe Lyakwiindilila antoomwe abaapostolo bakwe lyabbila zuba kumangolezya aabuzuba butobela, bwatalika buzuba bwa Nisani 14.

Pele basilutwe babapaizi alimwi abaalu babantu tabakkede buyo kulindila Pobwe Lyakwiindilila. Bavwoomana mulubuwa lwamupaizi mupati, Kayafa. Nkaambo nzi? Balinyemede nkaambo Jesu wali kuyubununa bubi bwabo. Lino bamvwana “kuti bamujate Jesu cabucenjezu akumujaya.” Ino balacita buti oobo alimwi balacita lili? Baamba kuti: “Ikutali ciindi capobwe, kutegwa kutakabi manyongwe akati kabantu.” (Matayo 26:4, 5) Baliyoowede nkaambo mbanji bantu bamuyanda Jesu.

Aciindi nciconya eeci, basololi babukombi baswaigwa amuntu umwi. Bagambwa kuti muntu ooyo ngumwi wabaapostolo ba Jesu, Judasi Isikariote. Saatani wamunjila mumoyo akumupa muzeezo wakwaaba Simalelaakwe! Judasi wababuzya kuti: “Ino mulandipa nzi ndamwaaba kulindinywe?” (Matayo 26:15) Kabakondedwe kumvwa makani aaya, ‘bamvwana kumupa mali aansiliva.’ (Luka 22:5) Mali ongaye? Bazuminana kumupa mali aansiliva aali 30. Makani aaya mapati nkaambo  muulo wamuzike masyekeli aali 30. (Kulonga 21:32) Aboobo basololi babukombi batondezya kuti tabamubali Jesu, bamubona kuti takwe mulimo. Lino Judasi watalika “kuyandaula ciindi cibotu cakumwaaba kulimbabo kakunyina nkamu yabantu.”—Luka 22:6.

Buzuba bwa Nisani 13 bulatalika lyabbila zuba muli Bwatatu, alimwi oobu mbusiku bwacisambomwe alimwi bwamamanino Jesu mbwatiione mu Betaniya. Eelyo bwaca, beelede kumanizya kulibambila Pobwe Lyakwiindilila. Kweelede kujanwa mwanaambelele kutegwa akajaigwe akuyokwa buumbulu bwaakutalika buzuba bwa Nisani 14. Ino nkuli nkobayakulida cakulya eeci, alimwi ino nguni uuyakucibamba? Jesu kunyina naasyamwida muntu uuli woonse makani aaya. Aboobo, Judasi takonzyi kubazyibya makani aaya basilutwe babapaizi.

Ambweni imasyikati muli Bwane, Jesu watuma Petro a Johane kuzwa ku Betaniya, ulaamba: “Kamuya mukatubambile Pobwe Lyakwiindilila kutegwa tuzoolye.” Bamubuzya kuti: “Ino nkuli nkoyanda kuti tukalibambile nkuko?” Jesu wabaambila kuti: “Mwanjila mumunzi, mulayaanya muntu uunyamwide nongo yamaanzi. Amumutobele kuŋanda njayoonjila. Alimwi mukamwini ŋanda mumwaambile kuti, ‘Mwiiyi ubuzya kuti: “Ino ili kuli ŋanda yabeenzu mondikonzya kulida Pobwe Lyakwiindilila abasikwiiya bangu?”’ Eelyo muntu ooyo uyoomutondezya ŋanda mpati yamujulu, iijisi zintu zyoonse ziyandika. Amukalibambile mumo.”—Luka 22:8-12.

Cakutadooneka, mukamwini ŋanda ngusikwiiya wa Jesu. Kuboneka kuti ulangila Jesu kuti ulamulomba kubelesya ŋanda yakwe kucitila pobwe eeli. Baapostolo aabo bobilo nobasika ku Jerusalemu, bajana kuti zintu zyoonse nkozili mbubonya mbwaabaambila Jesu. Aboobo, babona masimpe kuti mwanaambelele ulibambidwe alimwi zintu zyoonse ziyandika kucakulya ca Pobwe Lyakwiindilila nkozili, zibambilidwe bantu aaba bali 13, nkokuti Jesu abaapostolo bakwe bali 12.