Jisas i stap long maunten Oliv na em i wok long skulim 4-pela aposel bilong em, na em i bekim askim bilong ol long kam bek bilong em long bihain na pasin nogut bilong dispela graun bai pinis.

Tru tumas, Nisan 11 em wanpela bisi de stret! Ating long dispela nait ol i wokabaut i go bek long Betani na Jisas i tokim ol aposel olsem: “Yupela i save olsem tupela de moa na Pasova bai kamap, na ol bai putim Pikinini bilong man long han bilong ol birua na ol bai nilim em long pos.”—Matyu 26:2.

Long Tunde, Nisan 11, Jisas i krosim ol hetman bilong lotu na em i kamapim long ples klia pasin giaman bilong ol. Olsem na ol i painim rot bilong kilim em i dai. Ating em as na long Trinde, Nisan 12, Jisas i stap tasol wantaim ol aposel bilong em, long wanem, em i no laik bai wanpela samting i pasim em long mekim laspela Pasova wantaim ol bihain long taim san i go daun long neks de, em kirap bilong Nisan 14.

Tasol ol bikpris na ol hetman i tingting planti long samting ol bai mekim paslain long Pasova. Ol i bung long ples bung long haus bilong hetpris Kaiafas. Long wanem, ol i belhat long Jisas i bin kamapim long ples klia ol pasin giaman bilong ol. Olsem na ol i “wokim toktok bilong painim rot long holim Jisas na kilim em i dai.” Ol bai mekim olsem wanem na long wanem taim? Ol i tok: “Yumi no ken mekim long taim bilong bikpela bung, yumi no laik kirapim ol manmeri long kros na pait.” (Matyu 26:4, 5) Ol i pret, long wanem, planti manmeri i save laikim Jisas.

I no longtaim na Judas Iskariot i kam lukim ol hetman bilong lotu. Ol i kirap nogut long lukim wanpela aposel bilong Jisas. Satan i givim tingting long em long putim Bikman bilong em Jisas long han bilong ol birua! Judas i askim ol: “Yupela bai givim wanem samting long mi sapos mi putim  Em long han bilong yupela?” (Matyu 26:15) Ol i amamas long dispela tok, na ol i “pasim tok long givim silva mani long Judas.” (Luk 22:5) Ol bai givim hamas mani long em? Ol i wanbel long givim em 30 mani silva. Long bipo, pe bilong baim wanpela wokboi nating em 300 kina, o 30 sekel. (Kisim Bek 21:32) I klia tru olsem ol hetman bilong lotu i lukim Jisas olsem wanpela man nating. Nau Judas “i kirap painim wanem taim i gutpela long putim Jisas long han bilong ol long taim i no gat bikpela lain manmeri i stap.”—Luk 22:6.

Nisan 13 i kirap long taim san i go daun long Trinde, na dispela em i de namba 6 na laspela nait bilong Jisas long stap long Betani. Long neks de, ol bai redim ol laspela samting bilong Pasova. Ol i mas kisim wanpela sipsip na kilim i dai na rostim olgeta long kirap bilong Nisan 14. Ol bai bung long we na kaikai? Na husat bai redim kaikai? Jisas i no mekim wanpela tok long ol dispela samting. Olsem na Judas i no toksave long ol bikpris.

Ating long Fonde apinun, Jisas i tokim Pita na Jon long lusim Betani. Em i tokim ol: “Go na redim Pasova bilong yumi long kaikai.” Na ol i tok: “Yu laik bai mipela i redim long we?” Na Jisas i tok: “Harim! Taim yutupela i go insait long taun, wanpela man i karim sospen graun i gat wara long en bai bungim yutupela. Bihainim em na go insait long haus em i go insait long en. Na yutupela i mas tokim papa bilong haus, ‘Tisa i tokim yu: “Rum em mi na ol disaipel bilong mi bai kisim kaikai bilong Pasova long en, em i stap we?”’ Na dispela man bai soim yutupela wanpela bikpela rum i stap antap, na i gat ol samting i stap pinis long en. Yutupela redim kaikai long hap.”—Luk 22:8-12.

I klia tru olsem papa bilong haus em i wanpela disaipel bilong Jisas. Ating em i wok long tingting olsem Jisas bai askim long yusim haus bilong em long mekim dispela bung. Taim tupela aposel i go kamap long Jerusalem, ol i lukim olsem olgeta samting Jisas i tokim ol long en i stap. Olsem na ol i redim sipsip na ol narapela samting long kaikai bilong Pasova inap long 13 man olgeta, em 12-pela aposel na Jisas.