Ne fatoa oti atu te akoakoatuga ne Iesu ana apositolo e tokofa i luga i te Mauga o Olive, mai te tali atu o olotou fesili e uiga ki tena fakatasi mai i aso mai mua mo te gataga o te olaga masei tenei.

Ko se faka‵tau eiloa i te fakalavelave o te po 11 o Nisani! Kāti ne fai penā ona ko te mea telā ne fai atu ne Iesu ki te kau apositolo i te taimi ne ‵foki atu ei latou ki Petania: “E iloa ne koutou me e toe lua nei aso kae fai te Paseka, kae ka tuku atu a te Tama a te tagata ke tamate i luga i se lakau.”—Mataio 26:2.

Kāti ne fakamāumāu ne Iesu a te aso mai tua ifo, telā ko te Aso Tolu, mo ana apositolo i a latou eiloa. I te Aso Lua, ne fatoa oti ne taku fakamasei ne ia a takitaki lotu kae fakaasi faka‵sau atu latou i mua o tino. Ne taumafai latou ke tamate a ia. Tela la, ne seki fanatu tou tagata o fakasaesae ki tino i a Nisani 12, ko te mea ke seai se mea e fakalavelave atu ki te fakamanatuga ne ia o te Paseka fakatasi mo ana apositolo, mai tua o te ‵tōga o te mata o te la, i te kamataga o Nisani 14.

Kae ne seki ‵nofo filemu a faitaulaga pule mo toeaina fakamatua‵tua mai mua o te Paseka. Ne maopoopo latou i te koga ateatea o te fale o te faitaulaga sili, ko Kaiafa. Kaia? Ne ita latou me ne fakaasi faka‵sau atu ne Iesu te lotou ma‵sei. Nei la, ko fai‵pati fakatasi latou “ki se togafiti ke puke a Iesu o tamate.” Ka fai pefea kae ko te taimi fea foki ka fai ei ne latou te mea tenā? Ne fai mai latou: “E se ‵tau o fai te mea tenā i te aso o te fakamanatuga i te mea ma fakatupu ei ne tino se fakalavelave.” (Mataio 26:4, 5) Ne ma‵taku latou me ne fia‵fia a tino e tokouke ki a Iesu.

I te taimi tenā, ne āsi atu se tino ki takitaki lotu. Ne ofo latou me i a ia se tokotasi o apositolo a Iesu, ko Iuta te Isikaliota. Ne ‵toki ne Satani i loto i a ia a te manatu ke fakatogafiti ne ia tena Matai! Ne fesili atu a Iuta ki a latou: “Se a toku ‵togi e tuku mai ne  koutou ke fakatogafiti ne au a ia?” (Mataio 26:15) Ona ko te fia‵fia ki te mea tenei, ne “lotoma‵lie [latou] ke tuku atu ki a ia ne tupe siliva.” (Luka 22:5) E fia? Ne fia‵fia latou ke tuku atu a tupe siliva e 30. Ne fakaofoofogia eiloa me i te ‵togi o te pologa e 30 sekela. (Esoto 21:32) Ne fakaasi atu ne takitaki lotu me e se tāua malosi a Iesu i te lotou kilokiloga. Ne kamata ei a Iuta “o salasala ki se avanoaga ‵lei ke fakatogafiti ne ia a Iesu i se koga telā e seai se vaitino i ei, ke tuku atu ki a latou.”—Luka 22:6.

Ne kamata a Nisani 13 i te taimi ne tō ei te mata o te la i te Aso Tolu, kae tenei eiloa te ono mo te ‵toe po o Iesu i Petania. I te suā aso, ne ‵tau o fai a toe fakatokatokaga mō te Paseka. Ne ‵tau o ‵sala mai se tamā mamoe ko te mea ke tamate kae tao kātoa mai tua o te kamataga o Nisani 14. Tefea te koga ka fai ei ne latou te ‵kaiga, kae ko oi ka fakatoka ne ia? Ne seki tuku mai ne Iesu a vaegā fakamatalaga penā. Tela la, ne seki mafai o fai atu ne Iuta a fakamatalaga konā ki faitaulaga pule.

Kāti ko te kamataga o te fakatutonu i te Aso Fa, ne uga atu ei ne Iesu a Petelu mo Ioane mai Petania, kae fai atu: “Olo o fakatoka te Paseka ke ‵kai ei tatou.” Ne tali atu lāua: “Tefea te koga e manako koe ke fakatoka ne māua?” Ne fakamatala atu a Iesu: “Kafai e ulu atu koulua ki te fa‵kai ka fetaui koulua mo se tagata e amo ne ia se tiā vai. Tau‵tali i a ia ki loto i te fale telā e ulu a ia ki ei. Ko fai atu ei koulua ki te tino i o ia te fale, ‘A te Faiakoga ne fai mai ki a koe: “Tefea te potu talimalo telā ka ‵kai ei au mo oku soko i te Paseka?”’ Kae ka fakaasi atu ne te tagata tenā ki a koulua se potu lasi i luga telā e toka a mea katoa i ei. Ko fakatoka atu ei ne koulua.”—Luka 22:8-12.

E seai se fakalotolotolua me i te tino e o ia te fale, se soko o Iesu. Kāti ne olioli eiloa a ia ki te taimi e fakamolemole atu a Iesu ke fakaaoga tena fale mō te mea tenei. I te taimi ne oko atu ei a te tokolua apositolo ki Ielusalema, ne maua atu ne lāua a mea katoa e ‵tusa mo mea ne fai atu ne Iesu ki a lāua. Tela la, ne lavea ne lāua me ko toka te tamā mamoe kae e penā foki a nisi fakatokaga mō te Paseka, ko toka ‵lei mō tino e toko 13—ko Iesu mo ana apositolo e toko 12.