Natapos na hi Jesus ha pagtutdo ha upat han iya mga apostol didto ha Bukid han mga Olibo, iya ginbaton an ira mga pakiana mahitungod han iya presensya ha tidaraon ngan han ikatarapos hini nga sistema.

Damu gud an ginbuhat durante ha adlaw han Nisan 11! Posible nga tipabalik na hira ha Betania basi didto magpalabay han gab-i han ginsidngan ni Jesus an mga apostol: “Maaram kamo nga duha ka adlaw tikang yana isiselebrar an Paskua, ngan an Anak han tawo igtutubyan basi igraysang ha kahoy.”—Mateo 26:2.

Posible nga kinabuwasan, Mierkoles, bug-os nga adlaw nga kaupod niya an iya mga apostol. Han Martes, iya pa la ginsaway an mga lider han relihiyon ngan iginbuhayhag an ira pagkahipokrito. Gin-iparatay nira hiya. Salit, waray hiya magpakita ha mga tawo han Nisan 12 basi waray makaulang ha iya pagsaurog han Paskua kaupod an iya mga apostol kinabuwasan han gab-i katunod han adlaw, an tinikangan han Nisan 14.

Pero an punoan nga mga saserdote ngan katigurangan waray mahimutang antes an Paskua. Nagtirirok hira ha bungsaran han hitaas nga saserdote nga hi Caifas. Kay ano? Kay nasina hira han iginbuhayhag hira ni Jesus. Yana nagsarabot hira “ha pag-aresto kan Jesus ha malimbong nga paagi ngan ha pagpatay ha iya.” Paonan-o ngan san-o nira ito bubuhaton? Hira nagsiring: “Ayaw naton ito buhata ha panahon han piyesta basi diri magsaramok an mga tawo.” (Mateo 26:4, 5) Nahadlok hira kay damu an nadapig kan Jesus.

Hito nga panahon, an mga lider han relihiyon nagkaada bisita. Diri hira makatoo kay usa hiya han mga apostol ni Jesus, hi Judas Iscariote. Gin-impluwensyahan hiya ni Satanas nga trayduron an iya Agaron! Nagpakiana ha ira hi Judas: “Ano an ihahatag niyo ha akon kon itubyan ko hiya ha iyo?” (Mateo 26:15) Nalipay hira, salit “nagkauruyon [hira] nga tagan hiya hin silber nga kwarta.” (Lucas 22:5) Pira ito? Trenta nga silber nga sinselyo. Makatirigamnan ini kay an presyo han usa nga uripon 30 ka siklo. (Eksodo 21:32) Salit iginpapakita han mga lider han relihiyon an ira pagtamay kan Jesus. Para ha ira, hamubo an iya bili. Yana hi Judas ‘namiling hin maopay nga higayon ha pagtraydor kan Jesus nga waray mga tawo ha palibot.’—Lucas 22:6.

An Nisan 13 nagtikang ha katunod han adlaw han Mierkoles, ngan ini an ikaunom ngan ultimo nga gab-i ni Jesus ha Betania. Kinabuwasan, kinahanglan himoon na an ultimo nga mga pagpangandam para ha Paskua. Kinahanglan kuhaon an nati nga karnero basi ihawon ito ngan bug-os nga litsunon katapos magtikang an Nisan 14. Diin hira magsasaurog, ngan hin-o an mag-aandam hito? Waray ighatag ni Jesus an sugad nga mga detalye. Salit, diri ito maisusumat ni Judas ha punoan nga mga saserdote.

Posible nga temprano han Huwebes han kulop, ginsugo ni Jesus hira Pedro ngan Juan tikang ha Betania, ha pagsiring: “Lakat kamo ngan pag-andam para ha Paskua basi mangaon kita.” Nagpakiana hira: “Diin mo karuyag nga iandam namon ito?” Binaton hiya: “Pagsulod niyo ha syudad, tatapoon kamo hin lalaki nga may dara nga tibod hin tubig. Upod kamo ha iya ngadto ha balay nga iya susudlan. Ngan sidnga an tagbalay, ‘An Magturutdo nasiring ha imo: “Hain an kwarto para ha bisita nga akon kakaonan para han panihapon ha Paskua upod an akon mga disipulo?”’ Ipapakita niya ha iyo an daku nga kwarto ha igbaw nga nakaandam na. Pag-andam kamo didto.”—Lucas 22:8-12.

An tagbalay sigurado nga disipulo ni Jesus. Bangin naglalaom hiya nga maghahangyo hi Jesus nga gamiton an iya balay para hini nga okasyon. Pag-abot ha Jerusalem han duha nga apostol, nakita nira an ngatanan sugad la han ginsiring ha ira ni Jesus. Salit ginsiguro nira nga an nati nga karnero andam na pati an iba pa nga angay iandam para ha panginahanglan han 13—hi Jesus ngan an iya 12 nga apostol—nga magsasaurog han Paskua.