KAPITE 115
Kua Ovi Mai Ia Te Pasikate Fakaʼosi ʼa Sesu
MATEO 26:1-5, 14-19 MALEKO 14:1, 2, 10-16 LUKA 22:1-13
-
ʼE TOTOGI IA SUTASI ISEKALIOTE KE INA LAVAKIʼI IA SESU
-
ʼE TEUTEUʼI E HE ʼU APOSITOLO ʼE TOKO LUA IA TE PASIKATE
Neʼe kua osi leva te akoʼi e Sesu te ʼu apositolo ʼe toko fa ʼi te Moʼuga ʼo Oliveto, ʼi tana tali age ki tanatou fehuʼi ʼo ʼuhiga mo tana ʼi heni ʼi te ka haʼu pea mo te fakaʼosi ʼo te tuʼu ʼo te ʼu faʼahiga meʼa ʼaeni.
Neʼe lahi te ʼu meʼa neʼe hoko ʼi te ʼaho 11 ʼaia ʼo Nisani. Neʼe lagi ko te temi ʼae neʼe natou toe liliu ai ki Petania ke natou nonofo ai ʼi te poʼuli, ʼae neʼe ui fenei ai e Sesu ki te kau apositolo: “ ʼE kotou iloʼi kei toe ʼaho ʼe lua ki te Pasikate, pea ʼe tuku anai te Foha ʼo te tagata ke tutuki ki he pou.”—Mateo 26:2.
ʼI te ʼaho ake, ʼi te Feliafa, neʼe lagi fia nofo pe ia Sesu mo ʼana apositolo, ke maʼu honatou kiʼi temi malolo. ʼI te Feliatolu, neʼe ina fakatonutonuʼi te kau takitaki lotu pea neʼe ina fakaha ia muʼa ʼo te hahaʼi tonatou ʼuhiga moʼoni. Neʼe natou kumi ai ke natou matehi ia ia. Koia, ʼi te ʼaho 12 ʼo Nisani, neʼe mole sisio te hahaʼi kia te ia. Neʼe mole loto ke hoko he meʼa ʼe ina taʼofi anai ia ia mo ʼana apositolo ke natou fakamanatu ia te Pasikate ʼae ka hoko ʼi te apogipogi ake, ʼi te ʼosi to ʼo te laʼa, ʼo kamata ai te ʼaho 14 ʼo Nisani.
Kaʼe ʼi muʼa ʼo te Pasikate, neʼe ʼi ai te meʼa neʼe fia fai e te kau pelepitelo pule pea mo te kau takitaki Sutea. Neʼe natou fakatahitahi ʼi te malaʼe ʼo te pelepitelo lahi ko Kaifa. Kotea tona tupuʼaga? Neʼe natou iita he neʼe fakaha e Sesu tonatou ʼuhiga moʼoni. “Neʼe natou fonofono ai ke natou fai ni puleʼaki kaka ke natou puke pea mo matehi ia Sesu.” ʼE feafeaʼi anai tanatou fai te faʼahi ʼaia pea ʼi te temi fea? Neʼe natou ui fenei: “ ʼAua naʼa tou fai lolotoga te ʼaho lahi, naʼa hoko he maveuveu ʼi te hahaʼi.” (Mateo 26:4, 5) Neʼe natou matataku he neʼe hahaʼi ia natou ʼae neʼe natou leleiʼia ia Sesu.
Pea neʼe punamaʼuli leva te kau takitaki lotu he neʼe alu age kia natou ia Sutasi Isekaliote, ʼae neʼe kau ʼi te kau apositolo ʼa Sesu. Neʼe ʼai e Satana ki tona loto te manatu ʼae ke ina lavakiʼi tona Pule. Neʼe fehuʼi fenei age e Sutasi: “Kotea ʼae ka kotou Mateo 26:15) “Neʼe natou fiafia ai ʼo natou tukuʼaki ke natou foaki age he ʼu foʼi piesi siliva.” (Luka 22:5) Ko foʼi piesi siliva ʼe fia? ʼI tonatou fiafia, neʼe natou tukuʼaki kia foʼi piesi siliva ʼe 30. ʼE lelei ke tou tokagaʼi, ko te totogi ʼo he tagata kaugana neʼe ko foʼi sikele ʼe 30. (Ekesote 21:32) ʼE tou mahino ai ki te fehiʼa ʼa te kau takitaki lotu ia Sesu pea mo tanatou meʼa noaʼi ia ia. Neʼe kamata kumi ai leva e Sutasi “he faigamalie ke ina lavakiʼi ia ia kaʼe mole iloʼi e te hahaʼi.”—Luka 22:6.
foaki mai anai ke au tuku atu ia ia?” (Neʼe kamata te ʼaho 13 ʼo Nisani ʼi te Feliafa, ʼi te ʼosi to ʼo te laʼa, pea neʼe ko te po fakaʼosi ʼaia ʼo Sesu ʼi Petania. ʼI te ʼaho ake, neʼe tonu ke fakaʼosi te teuteuʼi ʼo te Pasikate. Neʼe tonu ke maʼu he akeno, ke matehi pea ke taʼo katoa ʼi te kua ʼosi kamata ʼo te ʼaho 14 ʼo Nisani. ʼE natou fai anai ʼifea ia te Pasikate, pea ko ai ʼae ka ina teuteuʼi anai? Neʼe mole fakaha e Sesu te ʼu faʼahi ʼaia. Koia, neʼe mole feala ai kia Sutasi ke ina tala ki te kau pelepitelo pule.
ʼI te Felianima, lagi ʼi te hili hoʼata, ʼi tanatou ʼi Petania, neʼe fekauʼi e Sesu ia Petelo mo Soane, ʼo ina ui fenei: “Kolua olo ʼo teuteuʼi maʼa tatou ia te Pasikate ke tou kakai.” Neʼe nā tali fenei age kia te ia: “Kofea ʼae ʼe ke loto ke ma teuteuʼi ai te Pasikate?” Neʼe fakamahino fenei age e Sesu kia naua: “Ka kolua hu ki te kolo, ʼe alu atu anai kia koulua he tagata ʼe ina ʼamo te ʼaiʼaga vai. Kolua muliʼi ia ia ki te ʼapi ʼae ka ulu anai ki ai. Pea kolua ui fenei ki te pule ʼo te ʼapi: ‘Neʼe ui fenei mai e te ʼAliki: “Kofea te koga fale ʼae ʼe feala ke au kai ai te Pasikate mo ʼaku tisipulo?” ’ Pea ʼe fakaha atu anai e te tagata ʼaia te koga fale lahi ʼi te lau fata, kua teuteuʼi. Kolua fai ai te ʼu teuteu.”—Luka 22:8-12.
ʼE mahino ia ko te pule ʼo te ʼapi neʼe ko he tisipulo ʼa Sesu. Neʼe kua lagi ina iloʼi pe ʼe kole anai e Sesu ke fakaʼaogaʼi tona ʼapi ki te Pasikate. ʼI te tau atu ʼa te ʼu apositolo ʼaia ʼe toko lua ki Selusalemi, neʼe nā maʼu ia meʼa fuli ohage pe ko tona fakaha age e Sesu. Koia neʼe nā tokakaga ʼo teuteuʼi te akeno pea ke maʼu ia meʼa fuli ʼae neʼe ʼaoga ki te kai ʼo te Pasikate maʼa natou fuli, ia Sesu mo ʼana apositolo ʼe toko 12.