Jesuseʼ tsʼoʼok u kaʼansik kantúul u apostoloʼob tu puʼukil le Olivoʼoboʼ, letiʼeʼ tu núukaj le kʼáatchiʼ tu beetoʼob tiʼ baʼax kun eʼesik way yaneʼ yéetel taʼaytak u xuʼulsaʼal tiʼ le yóokʼol kaabaʼ.

Bey túunoʼ, tu kʼiinil 11 tiʼ nisaneʼ jach yaʼab baʼax tu kaʼansaj Jesús. Beoraaʼ, maʼ xaaneʼ le táan u suutoʼob Betania le tsʼoʼok u yáakʼabtaloʼ, Jesuseʼ tu yaʼalaj tiʼ u apostoloʼob: «Jeʼex a wojlileʼexeʼ, ichil kaʼapʼéel kʼiineʼ yaan u kʼiinbesaʼal le Pascuaoʼ yéetel u Paal máakeʼ yaan u kʼuʼubul utiaʼal ka baʼajak tiʼ junpʼéel cheʼ» (Mateo 26:2).

Maʼ xaaneʼ Jesuseʼ tu máansaj u kʼiinil miércoles yéetel u apostoloʼob. Tu kʼiinil marteseʼ tu yaʼalaj tiʼ u nuuktakil le judíoʼob maʼ maʼalob baʼaxoʼob ku beetkoʼoboʼ. Letiʼobeʼ táan u kaxtikoʼob bix u kíimskoʼob. Le oʼolal maʼ jóokʼ utiaʼal ka ilaʼak tu kʼiinil 12 tiʼ nisaniʼ, beyoʼ yaan u kʼiinbesik le Pascua le ken áakʼabchajak uláakʼ kʼiin, le ken káajak le 14 tiʼ nisanoʼ.

Baʼaleʼ u nuuktakil le sacerdoteʼob yéetel u nuuktakil le judíoʼoboʼ maʼ jetsʼlajoʼob táanil tiʼ le Pascuaoʼ. Baʼaxeʼ binoʼob tu paach u yotoch Caifás, u nojchil le sacerdoteʼoboʼ. ¿Baʼaxten? Jach pʼujaʼanoʼob yoʼolal le baʼaxoʼob tsʼoʼok u yaʼalik Jesús tiʼoboʼ. Ka joʼopʼ u kaʼa tuklikoʼob «bix ken u machiloʼob Jesús yéetel baʼax tuusil ken u yaʼaloʼob utiaʼal u kíimskoʼob». ¿Bixi yéetel baʼax kʼiin jeʼel u páajtal u beetkoʼobeʼ? Letiʼobeʼ ku yaʼalikoʼob: «Maʼ teʼ kʼiinbesajoʼ, utiaʼal maʼ u líikʼil le kaaj t-contraoʼ» (Mateo 26:4, 5). Letiʼobeʼ saajkoʼob tumen yaʼab máakoʼob creertik baʼaxoʼob ku kaʼansik Jesús.

Baʼaleʼ kʼuch juntúul máak tu yiknaloʼob. Maʼ xaaneʼ maʼ tu creertikoʼob, tumen juntúul tiʼ u apostoloʼob Jesús, Judas Iscariote. Satanaseʼ tu yoksaj tu tuukul u traicionartik le Máax kaʼansoʼ. Judaseʼ tu kʼáatajtiʼob: «¿Baʼax ken a tsʼáaʼexten utiaʼal ka in kʼub Jesús ta kʼabeʼex?» (Mateo 26:15). Letiʼob túuneʼ jach kiʼimakchaj u yóoloʼob ka «tu yaʼaloʼob  jeʼel u tsʼáaikoʼob u taakʼinil plata tiʼeʼ» (Lucas 22:5). ¿Bajux? Letiʼobeʼ tu yaʼaloʼob u tsʼáaikoʼob 30 u pʼéelel u taakʼinil plata tiʼ. Lelaʼ letiʼe bajux ku koʼonol juntúul palitsil kaʼachoʼ (Éxodo 21:32). U nuuktakil le judíoʼoboʼ tu yeʼesoʼob mix baʼal u yilkoʼob Jesús, le oʼolal chéen letiʼe bajux tu yaʼaloʼob u boʼotkoʼoboʼ. Ka bin Judaseʼ káaj «u kaxtik u súutukil utiaʼal u traicionartik Jesús le ken pʼáatak minaʼan le yaʼabkach máakoʼob tu yiknaloʼ» (Lucas 22:6).

U kʼiinil miércoles 13 tiʼ nisaneʼ yaan u káajal ken tʼúubuk le Kʼiinoʼ, lelaʼ letiʼe u seis áakʼab ken u máans Jesús tu kaajil Betaniaoʼ. Ken sáaschajkeʼ yaan u beetkoʼob tuláakal le baʼax kʼaʼabéet utiaʼal le Pascuaoʼ. Unaj u maʼanal juntúul chan taman, u kíimsaʼal yéetel u kʼáaʼtaʼal táanil tiʼ u káajal le 14 tiʼ nisanoʼ. ¿Tuʼux ken u jaantoʼob yéetel máax kun beetik? Lelaʼ maʼ aʼalaʼak tumen Jesusiʼ. Beyoʼ Judaseʼ maʼ tu páajtal u bin u yaʼal tiʼ u nuuktakil le sacerdoteʼoboʼ.

Maʼ xaaneʼ tu jaʼatskabil jueveseʼ, Jesuseʼ tu túuxtaj Pedro yéetel Juan tu kaajil Betania, ka tu yaʼalajtiʼob: «Xeeneʼex, ka a beeteʼex u jaanlil le Pascua utiaʼal k-jaanteʼexoʼ». Letiʼobeʼ tu kʼáatoʼobtiʼ: «¿Tuʼux a kʼáat ka k-beete?». Letiʼeʼ tu yaʼalajtiʼob: «¡Ileʼex! Ken ookkeʼex teʼ kaajoʼ, yaan a wilkeʼex juntúul máak táan u bisik junpʼéel pʼúul chuup yéetel jaʼ. Xeeneʼex tak teʼ naj tuʼux kun ookloʼ. Teʼexeʼ yaan a waʼalikeʼex tiʼ u yuumil le najoʼ: ‹Le j-Kaʼansajoʼ tu túuxtoʼon k-aʼaltech: «¿Tuʼux yaan le cuarto utiaʼal uʼulaboʼob tuʼux jeʼel u páajtal in jaantik le Pascua yéetel in disipuloʼoboʼ?»›. Letiʼ túuneʼ yaan u yeʼesikteʼex junpʼéel nuxiʼ cuarto yaan kaʼanal, tuʼux yaan tuláakal baʼax kʼaʼabéetiʼ. Tiʼ túun ka a beeteʼexiʼ» (Lucas 22:8-12).

Lelaʼ juntúul u disipulo xan Jesús. Maʼ xaaneʼ tu listokíintaj tuláakal utiaʼal u meyaj wa ka kʼáataʼak tumen Jesús. Ka kʼuch le kaʼatúul apostoloʼoboʼ, tu yiloʼob jach jeʼex aʼalaʼabik tumen Jesusoʼ. Tu yiloʼobeʼ le tamanoʼ tsʼoʼok u kʼáaʼtaʼal yéetel tiaʼan u maasil baʼaxoʼob kun kʼaʼabéettal utiaʼal u kʼiinbesaʼal le Pascua tumen Jesús yéetel u doce apostoloʼoboʼ.