Maʼ bisiidiʼ Jesús tapa apóstol stiʼ lu dani olivo ne maʼ gúdxibe laacaʼ xi señal zusihuinni presencia stibe ne dxi guiluxe guidxilayú.

Guizáʼ maʼ stale cosa maʼ bíʼnicabe 11 de nisán riʼ. Zándaca ora zécabe Betania para chiguiziiláʼdxicabe raqué, gudxi Jesús ca apóstol stiʼ: «Nánnatu cayaadxaʼ xhupa si gubidxa para gaca Pascua, ne zuni entregárcabe Xiiñiʼ Hombre ne zuuticabe laa lu ti yaga» (Mateo 26:2).

Martes que nga gudindenebe ne bisihuínnibe ximodo naca ca líder stiʼ ca religión nezalú binni, ne pur ngue nuucaʼ guuticaʼ laabe. Ngue runi qué niree Jesús miércoles 12 de nisán para cadi guʼyaʼ binni laa, ne biaananebe ca apóstol stibe guidubi dxi. Qué racaláʼdxibe gucueeza xiixa laabe de guni celebrarnebe ca apóstol stibe Pascua ni chigaca sti dxi que guiaaziʼ si Gubidxa, purtiʼ óraque nga ruzulú 14 de nisán.

Peru nuu ca sacerdote principal ne ca ancianu de guidxi que gúnicaʼ xiixa ante gaca Pascua. Ngue runi guca reunircaʼ lu patiu stiʼ sumo sacerdote, Caifás. ¿Xiñee yaʼ? Purtiʼ guizáʼ cadxiichinécabe Jesús pur bisihuinni ca cosa ni cadi jneza rúnicabe. Pur ngue «guníʼ stiidxacaʼ ximodo quíxhecaʼ ti trampa Jesús ne guuticaʼ laabe». ¿Ximodo ne paraa gúnicabe ni yaʼ? Laacaʼ guniʼcaʼ: «Cadi gúninu ni lu saa, cadi málasi gucaalú guidxi riʼ laanu» (Mateo 26:4, 5). Cadxíbicabe ca binni que purtiʼ stale de laacaʼ runi crecaʼ Jesús.

Málasi guyé tuuxa ra nuu ca líder stiʼ ca religión. Guca si ni tobi de ca apóstol stiʼ Jesús, Judas Iscariote. Gudxite Binidxabaʼ íquebe para guni entregarbe maestru stibe. Ngue runi gunabadiidxaʼ Judas laacabe: «¿Xi gudiitu naa pa guneʼ entregar laatu Jesús?» (Mateo 26:15).  Aque biéchecabe ora binadiágacabe ndiʼ, ne guníʼ stiidxacabe «gudiicabe laabe bueltu» (Lucas 22:5). ¿Pabiáʼ yaʼ? dede cayéchecaʼ nacaʼ zudiicaʼ laabe 30 moneda de plata, biaʼ riʼ nga risaca ti esclavu (Éxodo 21:32). Zacá bisihuinni ca líder stiʼ ca religión que pabiáʼ nanaláʼdxicaʼ Jesús ne para laacaʼ qué risácabe. De raqué «nisi cuyubi [Judas] pora jma galán guni entregar laabe lu náʼ ca hombre que» peru cadi nezalú binni (Lucas 22:6).

Ruzulú 13 de nisán que guiaaziʼ si Gubidxa miércoles que. Ndiʼ nga últimu gueelaʼ biaana Jesús Betania. Sti dxi que naquiiñeʼ cuʼ ca discípulo ca cosa que listu para guni celebrárcabe Pascua. Naquiiñeʼ guyúbicabe ti dendxuhuiiniʼ, guuticabe laa ne guquiicabe xpeelame lu buu despué de guzulú 14 de nisán. ¿Paraa chiguni celebrárcabe Pascua que ne tu chiguni ni yaʼ? Caʼruʼ guiníʼ Jesús ni, ngue runi qué zanda diʼ chitidxi Judas ni ca sacerdote principal que.

Zándaca jueves despué de galaa dxi ngue, laga nuurúcabe Betania, biseendaʼ Jesús Pedro ne Juan ndaaniʼ guidxi que ne gúdxibe laacaʼ: «Laché, ne laguni preparar Pascua para guidoʼno». Para nacaʼ: «¿Paraa racaláʼdxiluʼ guni preparardu ni yaʼ?». Óraque gúdxibe laacaʼ: «Laguuyaʼ, ora guiuutu ndaaniʼ guidxi, zadxaagalutu ti hombre nuaʼ ti jarru de yu daʼ nisa. Lachinanda laabe ne laguiuu ndaaniʼ yoo ra guiuube. Ne lagabi dueñu stiʼ yoo ca: “Cayabi Maestru lii: «¿Paraa nuu cuartu para ca invitadu ra zanda gahuaniaʼ ca discípulo stinneʼ Pascua riʼ?»”. Ne zuluíʼ hombre que laatu ti cuartu naroʼbaʼ ni nuu luguiáʼ, ra nuu guiráʼ mueble. Laguni preparar pascua ca raqué» (Lucas 22:8-12).

Nánnanu ti discípulo stiʼ Jesús nga dueñu stiʼ yoo que. Zándaca nánnabe zanabaʼ Jesús laabe iquiiñeʼ yoo que dxi que. Ora yendá guiropaʼ apóstol que Jerusalén bizaaca guiráʼ ni casi peʼ gudxi Jesús laacaʼ. De raqué biiyaʼ chaahuicabe cadi guiaadxaʼ gastiʼ para ca 12 apóstol que ne Jesús ne zacá guni celebrárcabe guendaroxhi stiʼ Pascua que.