Mana kaka Yesu nochiko Petro gi Johana, koro gisechopo Jerusalem mi gitimo ikruok ma dwarore ne Pasaka. Bang’e, Yesu kod joote mamoko apar bende ochomo kuro. Koro piny en odhiambo kendo chieng’ dhi ka podho sama Yesu kod joma owuothogo ridore ka gia e Got Zeituni. Mano e odiechienge mogik ka en kanyo ka pok otho mi ochiere.

Mapiyo, Yesu kod joma en-go chopo Jerusalem kendo gidhi nyaka e dala ma gibiro chamoe Pasaka. Giidho nyaka e ot mamalo malach. Giyudo ka gik moko duto oseik mondo gibed gi nyasino. Yesu osebedo gi siso ahinya ne odiechieng’no. Omiyo, owacho kama: “Asegombo ahinya chamo Pasakani kodu ka pok ayudo sand.”​—Luka 22:15.

Higni moko motelo, tim moro nochakore mar tiyo gi okombe mogwaro e sawo mar Pasaka. Ne iolo divai e okombe kae to imiyo ng’ato mondo en bende omi nyawadgi. Koro, bang’ kawo achiel kuom okombego, Yesu goyo erokamano kowacho niya: “Kawuru mae mondo umi ng’ato ka ng’ato kuomu, nimar awachonu ni, chakre sani, ok abi madho divai mar olemb mzabibu kendo, nyaka Pinyruodh Nyasaye bi.” (Luka 22:17, 18) Wechego nyiso maler ni thone chiegni.

Sama Pasaka dhi nyime, gimoro miwuoro timore. Yesu a malo kendo ogolo lepe ma oko, kae to okawo taulo. Bang’e, oolo pi e besen man kanyo. Pile, ng’at morwako welo e ma ne neno ni olwok tiend welo, ka seche moko onyiso jatije otim kamano. (Luka 7:44) Gie kindeni, onge ng’at minyalo wach ni e wuon welo. Omiyo, Yesu tiyo tijno owuon. Jaote moro amora ne nyalo chiwore timo kamano, to onge kata achiel kuomgi ma ne ochiwore. Be dibed ni en nikech piem ma pod nie kindgi? Onge kiawa ni wigi okuot sama Yesu lwokonegi tiendegi.

Ka Yesu ochopo ir Petro, Petro kwer kama: “Ok ibi lwoko tiendena ngang’.” Kae to Yesu dwoke niya: “Ka ok alwoko tiendeni, to ionge gi pok kanyachiel koda.” Petro wacho ne Yesu kama: “Ruoth, kik ilwok mana tiendena kende, to lwok lwetena kod wiya bende.” Nyaka bed ni Petro wuoro ahinya gimomiyo Yesu dwoke ni: “Dwarore ni ng’ato ang’ata moselwokore olwokne mana tiendene kende, nimar dende duto ler. Un uler, to ok uduto.”​—Johana 13:8-10.

Yesu lwoko tiende jootene 12 duto moriwo nyaka Judas Iskariot. Bang’ rwako lepe ma oko mobedo e mesa kendo, Yesu penjo jootene  kama: “Be ung’eyo tiend gima asetimonu? Un uluonga ni, ‘Japuonj,’ kendo ni, ‘Ruoth,’ to un kare nikech an kamano. Kuom mano, ka an Ruodhu kendo Japuonju aselwoko tiendeu, un bende ng’ato ka ng’ato kuomu onego olwok tiende nyawadgi. Nimar aketonu ranyisi, mondo mana kaka asetimonu, un bende onego utim kamano. Adier, adier, awachonu ni, misumba ok duong’ moloyo ruodhe, kata ng’at moor ok duong’ moloyo ng’at moore. Kung’eyo wechegi, un joma mor ka utimogi.”​—Johana 13:12-17.

Mano kaka timo tich ma nenore ni ni pinyno chiwo puonj ma jaber e wi kido mar bolruok! Jolup Yesu ok onego obed gi chuny mar dwaro duong’ ka giparo ni giloyo jowetegi gi ber kendo ni gin e ma onego otinegi. Kar mano, onego giluw ranyisi mar Yesu kuom bedo gi chuny mar tiyo ne jomamoko ka gibolore ma ok gibuon ng’ato ang’ata. To mano ok nyis ni gilwok tiende ji e yo masie.