Jesuspa kamachisqanman jinan Pedrowan Juanwanqa Jerusalén llaqtaman ñauparanku Pascua mijunata alistaq. Chaymantañan Jesuspas wakin apostolkunapas llaqtaman puririranku. Inti jaykuy horapaqqa ñan Olivos orqotaña uraykusharanku. Chay kutillatañan Jesusqa chay orqomanta llaqtata rikunan karan manaraq wañuchisqa kashaspa.

Llaqtaman chayaspan Jesusqa apostolninkunawan riran Pascua mijunata mijunanku wasiman. Altosman seqaspataq lliuta tariranku allin preparasqata. Jesusqa anchatapunin munasharan chay hora chayamunanta, chaymi niran: “Maytapunin munasharani manaraq ñak’arishaspay kay Pascua fiesta mijunata qankunawan kuska mijuyta”, nispa (Lucas 22:15).

Chay tiempopiqa vino copakunatan pasaqku mijuqkunaman. Jujnin copata chaskispan Jesusqa Diosman graciasta qospa niran: “Kay copata jap’iychis, jinaspa sapankaykichis chaymanta ujaychis, niykichismi: Kunanmantaqa manapunin vinotaqa wajmanta ujasaqchu Diospa gobiernon chayamunankama”, nispa (Lucas 22:17, 18). Chaywanmi rikuchisharan wañunan horaqa cercaña kashasqanta.

Mijushaqtinkun Jesusqa apostolkunaq mana jayk’aq piensasqankuta ruwaran. Sayarispan jawa p’achanta ch’utikuran, jinaspa juj toallata oqariran, juj puruñaman unuta jich’aykuspataq apostolkunaq chakinta maqchiyta qallariran. Chay tiempopiqa wasiyoqpa kamachinkunan chaytaqa ruwaqku (Lucas 7:44). Manataq chay wasipi pipas karanchu paykunata chaskiq chayqa, apostolkunan chaytaqa ruwananku karan, ichaqa manan pipas chayta ruwaranchu. Yaqapaschá paykunaqa uma kaytaraq munasharanku. Imaynaña kaqtinpas, p’enqasqachá karanku Jesús paykunaq chakinta maqchiqtin.

Pedroman Jesús achhuykuqtinmi payqa niran: “Qanqa manapunin chakiytaqa maqchiwankimanchu”, nispa. Chaymi Jesusqa niran: “Manachus maqchisayki chayqa, manañan noqawanchu purinki”, nispa. Jinan Pedroqa niran: “Señor, chhaynaqa [...] makiytawan umaytawan maqchiway”, nispa. Jesustaq payta niran: “Allin bañasqa kaqqa llapan cuerponpin limpioña kashan, chakillantañan maqchikunan. Qankunaqa limpioñan kashankichis, ichaqa manan llapaykichischu”, nispa (Juan 13:8-10).

Chaymantataq Jesusqa 12 apostolkunaq chakinta maqchiyta tukuspa niran: “¿Entiendenkichischu  imaraykuchus chay ruwasqayta? Qankunaqa ‘yachachikuq’, ‘Señor’ niwankichismi ¿riki? Chaytaqa allintan ninkichis, chaypunin kani. Noqaqa Señorña yachachikuqña kashaspapas maqchiraykichistaq chakiykichista chayqa, qankunapas maqchinakunaykichismi chakiykichistaqa. Noqan ejemplota churashaykichis [...]. Kamachiqa manan patronninmantaqa kuraqchu, manallataqmi kachasqapas kachaqninmantaqa kuraqchu. Yachankichistaq chaykunata chayqa, chayman jina ruwaspaykichisqa ancha kusisqan kankichis”, nispa (Juan 13:12-17).

Chhaynaqa Jesusta qatikuqkunaqa pay jina k’umuykukuqmi kananchis, manataq pitapas rijch’ayninta qhawaspachu ajllananchis. Chaymantapas manan servichikuytaqa maskhananchischu, aswanpas jujkuna serviytan maskhananchis.