Ona ko te fakatonuga a Iesu, ne oko atu eiloa a Petelu mo Ioane ki Ielusalema ke fakatoka mō te Paseka. Fakamuli ifo, ne olo atu ei a Iesu mo nisi apositolo e toko sefulu ki konā. Ko te fakatutonu tenā, kae ko fanaifo eiloa o galo te mata o te la i te feitu ki matū o te lagi i te taimi ne tiakina ei ne Iesu mo ana soko a te Mauga o Olive. Tenei eiloa te ‵toe taimi i te ao ne maua ne Iesu ke kilo mai luga i konā ke oko ki te aso mai tua o tena toetuga.

E seki leva kae ne oko atu a Iesu mo tena kau ki te fa‵kai kae olo atu ki te fale telā ka fai i ei a te ‵kaiga o te Paseka. Ne ‵kake aka latou ki te potu lasi tafa ki luga. Ne maua atu ei ne latou me ko oti ne fai a fakatokaga katoa mō te lotou ‵kaiga i a latou eiloa. Ne olioli eiloa a Iesu ki te taimi tenei, me ne fai mai a ia: “Ne manako malosi au ke ‵kai fakatasi tatou i te Paseka tenei a koi tuai au o puapuaga.”—Luka 22:15.

I te fia o tausaga mai mua atu i ei, ne masani o fakateka atu a nai ipu uaina ki tino kolā ne ‵kau atu ki te Paseka kae ne fai foki penā i te taimi tenā. Nei la, mai tua o te taliaga ne ia o se ipu e tasi, ne fai atu ne Iesu te fakafetai kae fai atu: “Puke te ipu tenei kae fakasolo o inu i ei, me e fai atu au ki a koutou, mai te taimi nei o fano ki mua, ka se toe inu eiloa au ki te sua o te vine ke oko ki te taimi e oko mai ei te Malo o te Atua.” (Luka 22:17, 18) Ne lavea ‵lei atu eiloa i ei me ko pili mai tena mate.

I te taimi o te ‵kaiga o te Paseka, ne tupu se mea fai fakaatea. Ne tu aka a Iesu, tala tena gatu ‵loa mai tua, kae puke aka ne ia se solo. Ne ‵ligi atu ei ne ia a vai ki se tīsi telā e pili atu. E masani sāle a te tino i a ia te ‵kaiga, o fakamautinoa aka ne ia me ne ‵fulu a vae o ana tino ‵kami, kāti e fai te galuega tenā ne se tavini. (Luka 7:44) I te vaitaimi tenei, e seai se tino i a ia te ‵kaiga i konā, telā ne fai ei ne Iesu a te galuega tenei. Ne mafai faeloa o fakaaoga ne so se apositolo a te avanoaga tenei ke fai ne ia te galuega tenei, kae e seai eiloa se tino i a latou ne gasue. E mata, ne fai penei ona ko kinauga kolā ne ‵sae aka faeloa i a latou? Faitalia me se a te fakalavelave, ne ‵ma latou i te ‵fuluga ne Iesu olotou vae.

I te taimi ne fanatu ei a Iesu ki a Petelu, ne ‵teke atu a ia: “Ka se mulumulu eiloa ne koe oku vae.” Ne tali atu a Iesu: “Kafai e se mulumulu ne au a koe, e seai sou vaega e maua mai i a au.” Ne tali atu a Petelu mo ana lagonaga ‵loto: “Te Aliki, sa mulumulu fua oku vae kae ko oku lima foki mo toku ulu.” Kāti ne ofo masei a ia i te tali a Iesu: “So se tino ko oti ne koukou e manakogina fua ke mulumulu ana vae, me e ‵ma katoatoa a ia. A koutou e ‵ma, kae e se ko koutou katoa.”—Ioane 13:8-10.

Ne ‵fulu ne Iesu a vae o latou katoa e toko 12, e aofia i ei a vae o Iuta te Isikaliota. I te otiga ne pei tena gatu ‵loa mai tua kae toe sagasaga atu i te taipola, ne fesili atu a Iesu: “E malamalama koutou i te mea telā ne fai ne au ki a koutou? E taku ne koutou au ki te ‘Faiakoga,’  mo te ‘Aliki’ kae e ‵tonu eiloa koutou, me ko au eiloa tenā. Tela la, kafai au ko te Aliki mo te Faiakoga kae ne mulumulu ne au otou vae, e ‵tau foki mo koutou o fakatau mulumulu otou vae. Me ne tuku atu ne au se fakaakoakoga mō koutou, tela la, e pelā mo te mea ko oti ne fai ne au ki a koutou, e ‵tau foki o fai koutou penā. Au e fai tonu atu ki a koutou, a te pologa e se sili atu i tena matai, a te tino telā ne uga mai e se sili atu i te tino telā ne uga mai ne ia a ia. Kafai e iloa ne koutou a mea konei, ka fia‵fia eiloa koutou māfai e fai ne koutou.”—Ioane 13:12-17.

Ko se faka‵tau eiloa i te gali o te akoakoga ne maua mai i te faiga o se galuega fatauva! E se ‵tau o taumafai a soko o Iesu ki te tulaga muamua, mai te mafau‵fau me e tāua latou kae e ‵tau o tavini atu a tino ki a latou. I lō te fai penā, e ‵tau o fakaakoako latou ki a Iesu, e se mai i te faiga o so se vaegā ‵fuluga o vae, kae mai i te loto fiafia ke tavini atu mo te loto maulalo e aunoa mo te fakailoga tino.