Ua tae ê na Petero e Ioane i Ierusalema no te faaineine i te Pasa mai ta Iesu i faaue. I muri aˈe e haere atu ai Iesu e na ahuru aposetolo. Te topa ra te mahana i te pae tooa o te râ a pou ai Iesu e ta ˈna mau pǐpǐ mai nia mai i te mouˈa Oliveta. Eita Iesu e ite faahou i teie vahi e tae roa i to ˈna tia-faahou-raa.

Tae atura Iesu e ta ˈna mau pǐpǐ i te oire e haere atura i te fare e amu ai ratou i te Pasa i te piha rahi i nia. Ite aˈera ratou e ua ineine te mau mea atoa ia tamaa ratou anaˈe. I tiai ru na Iesu i taua mahana ra, ua parau hoi oia: “Ua hinaaro roa vau e amu i teie Pasa e outou hou vau e mauiui ai.”—Luka 22:15.

E rave rahi matahiti na mua ˈtu, e peu ia faahaerehia te tahi mau auˈa uaina i tera e tera taata e amu ra i te Pasa. A rave mai ai Iesu i te hoê auˈa tei horoahia mai ia ˈna, haamauruuru aˈera oia i te Atua e na ô atura: “A rave i teie auˈa e a horoa ˈtu i te tahi e te tahi, te parau atu nei hoi au: Mai teie atu nei, e ore roa vau e inu faahou i te uaina e tae noa ˈtu i te taime e tae mai ai te Faatereraa arii a te Atua.” (Luka 22:17, 18) Papu maitai fatata oia i te pohe.

A amu noa ˈi ratou i te Pasa, tupu ihora te hoê ohipa maere. Tia aˈera Iesu, tatara ˈtura i to ˈna ahu tapoˈi, e rave maira i te hoê tauera. Manii atura oia i te pape i roto i te hoê farii na pihai iho mai. Te tanoraa, na te fatu fare e haapao e ia horoihia te avae o ta ˈna mau manihini e te tahi anei tavini. (Luka 7:44) Aita râ te fatu fare i reira, na Iesu ïa i haapao i te reira. I nehenehe na te hoê aposetolo e rave i teie ohipa, aita râ hoê aˈe i na reira. No te mea anei e aimârôraa to rotopu ia ratou? Ta tatou noa i ite, ua haama ratou i to Iesu horoiraa i to ratou avae.

I to Iesu tapiriraa ia Petero, parau maira Petero: “Eiaha oe e horoi i to ˈu avae.” Pahono atura Iesu: “Ia ore au e horoi i to avae, e ere ïa oe i te pǐpǐ na ˈu.” Parau maira Petero: “E te Fatu, eiaha ïa to ˈu noa avae, to ˈu rima atoa râ e to ˈu upoo.” Eaha paha oia i te maere i te pahonoraa Iesu: “O tei hopu ê na i te pape, ua mâ ïa to ˈna tino taatoa, o to ˈna noa ïa avae te horoi. Mea mâ outou, e ere râ outou pauroa.”—Ioane 13:8-10.

Horoi atura Iesu i te avae o na 12, to Iuda Isakariota atoa. Oomo atura oia i to ˈna ahu tapoˈi e tarava ˈtura i te amuraa maa. Ui atura Iesu: “Te taa ra ia outou ta ˈu i rave iho nei ia outou? E parau mai outou ia ˈu ‘Orometua’ e ‘Fatu,’ ua  tano outou, e Orometua e e Fatu iho â vau. No reira, ua horoi au te Fatu e te Orometua i to outou avae, ia horoi atoa ïa outou i te avae o te tahi e te tahi e tia ˈi. Ua horoa ˈtu hoi au i te hiˈoraa, mai ta ˈu i rave ia outou, ia na reira atoa ïa outou e tia ˈi. E parau mau ta ˈu e parau atu: Aita te hoê tavini i hau aˈe i to ˈna fatu, aita atoa tei tonohia i hau aˈe i tei tono ia ˈna. Ua ite outou i teie mau mea, e oaoa outou ia rave outou i te reira.”—Ioane 13:12-17.

E haapiiraa nehenehe mau teie o te taviniraa ma te haehaa! Eiaha te mau pǐpǐ a Iesu e imi i te parahiraa matamua, a manaˈo ai mea faufaa ratou, e ia tavinihia ratou e tia ˈi. Ia pee râ ratou i te hiˈoraa o Iesu, eiaha ma te horoi i te avae ei peu faaroo, ia ineine râ i te tavini te tahi e te tahi ma te haehaa e te maitiiti ore.