Yĩla Yesũ wathambisye atũmwa make maaũ wĩoo wa mũthya, nĩwamamanyĩisye ũndũ wa vata ĩũlũ wa kwĩthĩwa na wĩnyivyo na kũthũkũma ala angĩ. Nĩkĩ ũndũ ũsu waĩ wa vata? Nũndũ ve wonzu atũmwa make maĩ naw’o. O na kau nĩmeeyumĩtye kũmũthũkũma Ngai, nĩmathĩnĩkaa mũno ĩũlũ wa nũũ ũla mũnene katĩ woo. (Maliko 9:33, 34; 10:35-37) Wonzu ũsu nĩwoonekie ĩngĩ wĩoo ũsu.

Atũmwa nĩmeethĩiwe na “ngananĩo mbyũ katĩ woo ĩũlũ wa nũũ ũla watalawa ta we mũnene katĩ woo.” (Luka 22:24) No nginya Yesũ ethĩwe eewie woo mwingĩ kwona atũmwa make maikananĩa ĩngĩ. Oosie ĩtambya yĩva?

Vandũ va kũmatetya nũndũ wa woni woo na meko moo, Yesũ aneenie namo e na wũmĩĩsyo na amea: “Asumbĩ ma andũ ma mbaĩ ingĩ nĩmenenevasya, na ala methĩawa na ũkũmũ ĩũlũ woo metawa Atethya. Ĩndĩ inyw’ĩ mũyaĩle kwĩthĩwa mũilye ũu. . . . Nũndũ nũũ mũnene, nĩ ũla ũkũya kana nĩ ũla ũkũthũkũma?” Na ĩndĩ amalilikany’a ngelekany’o ĩla weethĩĩtwe aimaiĩa na amea: “Ĩndĩ nyie nĩilye ta ũla ũkũthũkũma katĩ wenyu.”—Luka 22:25-27.

O na kau atũmwa asu maĩ o andũ ene naĩ, mayaamũtia Yesũ o na yĩla maũndũ maĩ metu. Kwoou nĩwameie atĩĩ: “Nĩngũtianĩa ũtianĩo vamwe nenyu, o tondũ Asa wakwa watianĩe ũtianĩo vamwe nakwa, kwondũ wa ũsumbĩ.” (Luka 22:29) Aũme asu maĩ aatĩĩi ma Yesũ aĩkĩĩku. Na nũndũ wa ũu, nĩwamaĩkĩĩthisye kana kwĩsĩla ũtianĩo wake vamwe namo, makasumbĩka vamwe nake Ũsumbĩnĩ wake.

O na kau atũmwa maĩ na wĩkwatyo ũsu ũseũvĩte ũu, maĩ o na mwĩĩ, o na maĩ ene naĩ. Kwoou Yesũ amea atĩĩ: “Satani nũkũlĩtye anengwe inyw’ĩ inyw’onthe nĩ kana amũthũngũthangye ta nganũ,” ĩla ĩnyaĩĩkaa yĩla ĩkũthũngũthangw’a. (Luka 22:31) O na nĩwasyokie amea atĩĩ: “Inyw’onthe nĩmũũlulutĩka nũndũ wakwa ũtukũ ũũ, nĩkwĩthĩwa nĩkũandĩkĩtwe: ‘Ngakũna mũĩthi, na ĩĩthya ya malondu yĩkanyaĩĩka.’”—Mathayo 26:31; Nzekalia 13:7.

Vetelo nĩwaleanile na ũndũ ũsu e na ũnyiau. Aisye atĩĩ: “O na kau ala angĩ makalulutĩka nũndũ waku, nyie ndikalulutĩka!” (Mathayo 26:33) Yesũ amwĩie Vetelo kana ũtukũ ũsu nzamba ĩtanasya kelĩ, akamũkaĩa. Ĩndĩ Yesũ nĩwongelile kwasya atĩĩ: “Nĩnĩvoyete na kĩthing’ĩĩsyo kwondũ waku nĩ kana mũĩkĩĩo waku ndũkaleele; naku wasyoka, mekĩe vinya ana-a-asa maku.” (Luka 22:32) O na ũu wĩ o vo, Vetelo asyokie asya ũũ e na ũkũmbaũ: “O na natw’ĩka nĩngũkw’a vamwe naku, ndikakũkaĩa nongi.” (Mathayo 26:35) Namo amanyĩw’a ala angĩ masya oou.

Yesũ ameie amanyĩw’a make atĩĩ: “Nĩĩthĩwa nenyu ĩvinda ĩnini. Mũkamantha; na o tondũ nĩtavisye Ayuti, yu nĩngũmũtavya o nenyu, ‘Vala nĩthi mũitonya kũka.’” Na ĩndĩ ongela kwasya: “Nĩngũmũnenga mwĩao mweũ kana, mwendane inyw’ĩ kwa inyw’ĩ; o tondũ nyie namwendie, o nenyu mwendane o ta ũu. Nũndũ mweeka ũu andũ onthe makamanya kana mwĩ amanyĩw’a makwa—ethĩwa mũkeethĩwa na wendo katĩ wenyu.”—Yoana 13:33-35.

Yĩla Vetelo weewie Yesũ ayasya kana eĩthĩwa namo ĩvinda ĩnini, nĩwamũkũlilye atĩĩ: “Mwĩaĩi, wĩthi va?” Nake Yesũ amũsũngĩa: “Vala ngũthi ndũtonya kũngatĩĩa oyu, ĩndĩ  ũkangatĩĩa ĩvinda yũkĩte.” Nake Vetelo aseng’a na amwĩa: “Mwĩaĩi, nĩkĩ ndatonya kũkũatĩĩa oyu? Ngeeyumya nĩkw’e kwondũ waku.”—Yoana 13:36, 37.

Yesũ nĩwawetie ĩvinda yĩla watũmie amanyĩw’a make makatavany’e Kalilii matakuĩte mũvuko wa mbesa kana mũvuko wa lĩu. (Mathayo 10:5, 9, 10) Amakũlilye atĩĩ: “Vaiĩ kĩndũ kyaamwaĩa, kana nĩmwaaĩiwe?” Namo mamũsũngĩa: “Aiee!” Ĩndĩ maaĩlĩte kwĩka ata mĩthenya ĩla yaatĩĩe? Yesũ ameie: “Eka yu ĩndĩ ũla wĩ na mũvuko wa mbesa awose, na ũla wĩ na mũvuko wa lĩu ayĩka oou, na eka ũla ũte na ũvyũ athoosye ngũa yake ya ĩũlũ athooe ũmwe. Nũndũ nĩngũmwĩa kana ũndũ ũla ũandĩkĩtwe no nginya wĩanĩw’e ĩũlũ wakwa, naw’o nĩ, ‘Nake nĩwatalanĩlw’e vamwe na atũli ma mĩao.’ Nĩkwĩthĩwa maũndũ ala mangonetye nĩmaendeee kwĩanĩw’a.”—Luka 22:35-37.

Yesũ awetaa ĩvinda yĩla waĩ aathĩĩwe mũtĩnĩ vamwe na eki ma naĩ kana atũli ma mĩao. Ĩtina wa vau aatĩĩi make maĩ mathĩnw’e mũno. Ĩndĩ atũmwa asu meew’aa meyũmbanĩtye, na kwoou mamwĩa: “Mwĩaĩi, sisya! vaa ve mbyũ ilĩ.” Nake amea: “Isu nĩsyĩanĩtye.” (Luka 22:38) Kwoou, nũndũ maĩ na mbyũ ilĩ, ĩtina wa ĩvinda ĩkuvĩ Yesũ aĩ amamanyĩsye ũndũ ũngĩ wa vata.