Muna nlekelo wansuka ye ntumwa zandi, Yesu ubalongele longi diamfunu vava kasadidi e salu kiasakala kia sukula malu mau. Ekuma kavangidi wo? Mu kuma kia lutovoko basongele. Bakiyekwele kwa Nzambi, kansi bakinu tokanene kana nani muna yau osundidi o nene. (Maku 9:33, 34; 10:35-37) O lutovoko lwau lutomene moneka omu fuku wau.

“Vabwidi ntantani zangolo vana bena, kana nani muna yau osundidi onene.” (Luka 22:24) Yesu okendalele wau kamwene alongoki andi betantananga diaka. Adieyi kavangidi?

Vana fulu kia kubafwemena mu kuma kia ngindu ye fu kiau, Yesu kuna luzindalalu lwawonso, ubavovese vo: “Ntinu mia zula bediatidilanga nkangu, ana mpe bena ye wisa muna yau beyikilwanga vo, Mimpanga-mawete. Vo i yeno, ke nukadi wau ko. . . . Nani i nene? Ndiona odianga vana meza yovo ndiona osadilanga akaka?” I bosi, Yesu ubasungamese e mbandu kekubasonganga ntangwa ke ntangwa, ovovele vo: “Kansi omono ngina va kati kweno nze ndiona osadilanga akaka.”—Luka 22:25-27.

Kana una vo antumwa mu sumuka bena, ke bayambwidi Yesu ko muna ntangw’ampasi. Yesu ubavovese vo: “Omono nkangidi yeno e kangu, wauna Se diame kakangila yame e kangu dia kintinu.” (Luka 22:29) Antumwa belandanga Yesu ye kwikizi kiawonso. Yesu ubavovese vo e kangu dina kakangidi yau, dikubavana o nswa wa kota muna Kintinu kiandi yo yala yandi e ntwadi.

Kana una vo antumwa bena ye vuvu kiaki, bakinu ye nitu a kinsuni yo usumuki. Muna kuma kiaki, Yesu ubavovese vo: “Satana olombele kanuveva nga masa.” (Luka 22:31) Ubazayisi vo: “O fuku wau yeno awonso sakuba nuta muna diambu diame, kadi diasonama vo: ‘Wanda iwanda o mvungudi, e kambi dia mameme dimwangana.’”—Matai 26:31; Zakariya 13:7.

Petelo ovakwidi o nkalu, ovovele ye vuvu kiawonso vo: “Kana nkutu awonso betel’e sakuba muna diambu diaku, omono kita nkutu sakuba ko!” (Matai 26:33) Yesu ovovese Petelo vo, vitila e nsusu yakokola e nkokola yanzole, Petelo okumvakula o nkalu. Yesu okudikidi vo: “Kansi omono ndodokele mu kuma kiaku, o lukwikilu luaku lwalembi yoya; ongeye avo ovilukidi o ntima, kumika mpangi zaku.” (Luka 22:32) Petelo ovutwidi vo: “Kana nkutu divava vo yafwa yaku, kilendi kuvanina nkalu ko.” (Matai 26:35) Alongoki awonso bavovele diau dimosi.

Yesu ovovese alongoki andi vo: “Kolo kiakete ikala yeno. Nukumpava; wauna yavovesa Ayuda vo, ‘Kuna nkuenda, oyeno ke nulendi ko kwiza ko,’ owau kwa yeno mpe mpovele wo. Nkanikinu ampa inuvene, nuzolaziana; wauna inuzolele, i una mpe nuzolazianina. Muna wau i bezayila o wantu awonso vo nu alongoki ame—avo nzolani nuna yau.”—Yoane 13:33-35.

Wau o Petelo kawilu Yesu ovovele vo kolo kia kete kaka ke kala yau, unyuvuidi vo: “E Mfumu, akweyi okwenda?” Yesu ovutwidi vo: “Kuna nkwenda, kulendi kwiza ndandi owau ko, kansi se wiza ndandi kuna sentu.” Petelo umvovese vo: “E Mfumu, ekuma kilendi kulandila owau ko? Moyo ame iyekola wo muna wete diaku.”—Yoane 13:36, 37.

Owau Yesu ovovele e ntangwa ina katuma alongoki andi benda samuna sangu zambote muna Ngalili lembi nata e nkutu a zimbu yovo kimpakala kia madia. (Matai 10:5, 9, 10) Yesu ubayuvuidi vo: “Vava yateka kunutuma, ke nwanata nkutu a nzimbu ko yovo kifunda, ngatu nsampatu, nga ma nwakondw’e?” Bavutwidi vo: “Nkatu kwandi!” Ozevo, adieyi alongoki bevanga muna lumbu ilanda? Yesu ubavovese vo: “Owau, ona una ye nkutu a nzimbu, mbula kanata yo, diau adimosi mpe ye kifunda, ona kena ye nsosolo ko, yambula kateka yunga kiandi, kasumba wo. Kadi inusamunwini vo, edi diasonama difwete lunganena omu mono, i sia vo, ‘Wabadikilwa kumosi ye yimpumbulu.’ Kadi ediadi mu lungana dina omu mono.”—Luka 22:35-37.

Muna mvovo miami, Yesu ovovele e ntangwa ina kekomwa vana nti kumosi ye yimpumbulu yovo mindembi zitisa nsiku. Kuna kulanda, alongoki andi bebangikwa kwayingi. Alongoki babenze vo bakubama kwau bena, bavovele vo: “E Mfumu, tala, nsosolo miole.” Yesu ubavovese vo: “Nusila wowo.” (Luka 22:38) Wau bena ye nsosolo miole, Yesu obakidi e lau dia kubalonga diambu diankaka diamfunu.